ໃນຕອນຄໍ່າວັນທີ 28 ສິງຫາ 2020 ນີ້, ທີ່ນະຄອນຫລວງວຽງຈັນ ທ່ານ ຫງວຽນ ບາ ຮຸ່ງ ເອກອັກຄະລັດ ຖະທູດວິສາມັນ ຜູ້ມີອໍານາດເຕັມ ແຫ່ງ ສສ ຫວຽດນາມ ປະຈໍາ ສປປ ລາວ ໄດ້ຈັດງານລ້ຽງອາຫານຄໍ່າ ສະເຫລີມສະຫລອງ ວັນຊາດ ສສ ຫວຽດ ນາມ ຄົບຮອບ 75 ປີ ໂດຍມີທ່ານ ບຸນທອງ ຈິດມະນີ ຮອງນາຍົກລັດຖະມົນຕີ, ປະທານຄະນະກວດກາ ສູນກາງພັກ, ປະທານອົງການກວດກາລັດຖະບານ, ປະທານອົງການປ້ອງກັນ ແລະ ຕ້ານສໍ້ຫລາດບັງຫລວງສູນກາງ, ມີບັນດາການ ນໍາພັກ-ລັດ, ທູຕານຸທູດ-ຜູ້ຕາງໜ້າ ອົງການຈັດຕັ້ງສາກົນ ແລະ ພ້ອມດ້ວຍພາກສ່ວນທີ່ກ່ຽວຂ້ອງ ເຂົ້າຮ່ວມ.

ທ່ານ ຫງວຽນ ບາ ຮຸ່ງ ໄດ້ກ່າວ​ວ່າ: ຕະຫລອດ​ໄລຍະ 75 ປີ ຜ່ານ​ມາ ຂະ​ແໜງ​ການ​ທູດ​ຫວຽດນາມ​ ໄດ້​ປະກອບ​ສ່ວນ​ສໍາຄັນ ​ເຂົ້າ​ໃນ​ພາລະກິດ​ຕໍ່​ສູ້​ ເພື່ອ​ຄວາມ​ເປັນ​ເອກະ ລາດ​ແຫ່ງຊາດ, ທ້ອນ​ໂຮມ​ປະ​ເທດ​ຊາດ​ເປັນ​ເອກະ​ພາບ​ ກໍ​ຄື ​ພາລະກິດ​ປ່ຽນ​ແປງ​ໃໝ່,​ເຊື່ອມ​ໂຍງ ​ແລະ ປົກ​ປັກ​ຮັກສາ​ປະ​ເທດ​ຊາດ, ປະກອບສ່ວນ​ເຮັດ​ໃຫ້ ​ຖານະ​ບົດບາດ​ຂອງ​ຫວຽດນາມ ​ພົ້ນ​ເດັ່ນ​ຂຶ້ນ​ໃນ​ເວທີ​ສາກົນ. ​ໃນ 6 ​ເດືອນ​ຕົ້ນ​ປີ 2020 GDP ບັນລຸ​ໄດ້ 1,81% ອີງຕາມ​ບົດລາຍ​ງານ ​ຂອງ​ທະນາຄານ​ໂລກ, ການ​ເຕີບ​ໂຕ​ເສດຖະກິດ ​ຂອງ​ຫວຽດ ນາມ​ ໃນ​ປີ 2020 ຈະ​ສູງ​ອັນ​ດັບ 5 ຂອງ​ໂລກ, ອາດ​ບັນລຸ​ລະດັບ 2,8% ​ໃນ​ປີ 2020 ​ແລະ 6,8% ​ໃນ​ປີ 2021 ທະນາຄານ​ໂລກ​ໄດ້​ຈັດ​ໃຫ້​ຫວຽດນາມ​ແມ່ນ 1 ​ໃນ 6 ພື້ນຖານ​ເສດຖະກິດ ​ພົ້ນ​ເດັ່ນ​ໃໝ່​ທີ່​ປະສົບ​ຜົນ​ສໍາ​ເລັດ ​ທີ່​ສຸດ​ໃນ​​ໂລກ, ການ​ລົງທຶນ​ໂດຍ​ກົງ​ຈາກ​ຕ່າງປະ​ເທດ​ບັນລຸ​ໄດ້​ມູນ​ຄ່າ 3,15 ຕື້​ໂດລາ​ສະຫະລັດ, ​ເພີ່ມ​ຂຶ້ນ 79,8% ທຽບກັບ​ໄລຍະ​ດຽວກັນ​ຂອງ​ປີ​ກາຍ, ການ​ສົ່ງ​ອອກ​ເກີນ​ດູ​ນ 7,5 ຕື້​ໂດ​ລາ​ສະຫະລັດ.  

ທ່ານ ຫງວຽນ ບາ ຮຸ່ງ ກ່າວຕື່ມ​ວ່າ: ຕະຫລອດ​ໄລຍະ​ປະຫວັດສາດ ​ກໍ​ຄື ​ໃນ​ອານາ​ຄົດ, ຍາມ​ໃດ​ຫວຽດນາມ​ກໍ​ຖື​ສໍາຄັນ ​ແລະ ​ໃຫ້​ບູລິ​ມະ​ສິດ​ແກ່ສາຍ​ພົວພັນ ມິດຕະພາບ​ອັນ​ຍິ່ງ​ໃຫຍ່, ຄວາມ​ສາມັກຄີ​ພິ​ເສດ ​ແລະ ການ​ຮ່ວມ​ມື​ຮອບດ້ານ ​ກັບ​ປະຊາຊົນ ​ແລະ ປະ​ເທດ​ລາວ​ອ້າ​ຍນ້ອງ, ຊາຕະ​ກໍາ​ຂອງ​ສອງ​ປະ​ເທດ, ສອງ​ຊາດ​ຍາມ​ໃດ​ກໍ​ມີ ​ຄວາມ​ຕິດ​ພັນ​ກັນ​ຢ່າງ​ສະໜິດ​ແໜ້ນ. ​ກ່ອນ​ໜ້າ​ນີ້ 75 ປີ, ​ໄປຄຽງຄູ່ກັບ​ການ​ປະຕິວັດ ​ເດືອນ​ສິງຫາ​ຢູ່​ຫວຽ​ດນາມ, ຢູ່​ລາວ​ປະຊາຊົນ​​ໄດ້​ລຸກ​ຮື້​ຂຶ້ນ ​ຍາດ​ອໍານາດ​ຢ່າງ​ມີ​​ໄຊ​ ຢູ່ທ້ອງ​ຖິ່ນຄື: ວຽງ​ຈັນ, ທ່າ​ແຂກ ​ແລະ ສະຫວັນ​ນະ​​ເຂດ. ໃນ​ປີ​ດຽວ​ກັນວັນທີ 02/12/1975 ສປປ ລາວ ​ໄດ້​ຮັບ​ການ​ສະຖາປະນາ ສອງ​ຊາດ ຫວຽດນາມ-ລາວ ອ້າຍ​ນ້ອງ ​ໄດ້​ຮ່ວມ​ກັນ​ສູ້​ຮົບ​ ແລະ ​ຜ່ານ​ຜ່າ​ຄວາມ​ຫຍຸ້ງຍາກ​ລໍາບາກ​ນາ​ໆປະການ ຍອມ​ເສຍສະຫລະ​ ທີ່​ແກ່ຍາວ​ເປັນ​ເວລາ 30 ປີ​ລຽນຕິດ​ເພື່ອ​ຍາດ​ເອົາ​ຄວາມ​ເປັນ ​ເອກະລາດ​ຂອງ​ແຕ່​ລະ​ຊາດ. ປະຫວັດ​ຊາດ​ແຫ່ງ​ສາຍ​ພົວ ພັນລາ​ວ-ຫວຽ​ດນາມ ​ໃນ​ສະຕະວັດ​ທີ່​ຜ່ານ​ມາ​ ບໍ່​ພຽງ​ແຕ່​ພິສູດ​ໃຫ້​ເຫັນ​ເຖິງ ​ລັດທິ​ວິລະ​ຊົນ​ປະ ຕິວັດຂອງ​ສອງ​ຊາດ​ເທົ່າ​ນັ້ນ ຫາກ​ຍັງ​ສະ​ແດງ​ໃຫ້ເຫັນ​ເຖິງ ​ສາຍ​ພົວພັນ​ທີ່​ບໍລິສຸດ​ຜຸດ​ຜ່ອງ ​ແລະ ຫາ​ຍາກ​ໃນ​ການ​ພົວພັນ​ ສາກົນ​ຂອງ​ຍຸກ​ປັດຈຸບັນ. ຄື​ດັ່ງ​ການ​ນໍາ​ຂອງ​ສອງ​ພັກ, ສອງ​ລັດ​ໄດ້​ຢືນຢັນ​ເຖິງ​ວ່າ ​ສະພາບ​ການຂອງ​ໂລກ ​ແລະ​ ພາກ​ພື້ນ​ມີ​ການ​ຜັນ​​ແປ ​ແນວ​ໃດ​ກໍ​ຕາມ, ສອງ​ຊາດ​ຈະ​ຄຽງ​ບ່າ​ຄຽງ​ໄຫລ​ແບ່ງປັນ ​ແລະ ຊ່ວຍ​ເຫລືອ​​ເຊິ່ງກັນ ​ແລະ ກັນ​ ໃນ​ພາລະກິດ​ສ້າງສາ​ພັດທະນາ ​ແລະ ປົກ​ປັກ​ຮັກສາ​ປະ​ເທດ​ຊາດ​ ເພື່ອ​ຄວາມ​ອີ່ມ​ໜໍາ​ສໍາລານ, ສືບ​ຕໍ່​ປົກ​ປັກ​ຮັກສາ, ຖາ​ນຸຖະໜ​ອມ ​ເພີ່ມ​ພູນ​ຄູນ​ສ້າງສາ​ຍພົວພັນ ​ພິ​ເສດ​ຫວຽດນາມ-ລາວ ​ເພື່ອ​ໃຫ້​ສົມ​ເປັນ​ຊັບ​ສົມບັດ​ ອັນ​ສໍ້າຄາ​ຂອງ​ທັງ​ສອງ​ຊາດ.

ໃນ​​ໂກາດ​ນີ້, ທ່ານ ບຸນ​ທອງ ຈິດ​ມະນີ ກໍໄດ້ກ່າວ​ວ່າ: ຕະຫລອດ​ໄລຍະ 75 ປີ ​ແຫ່ງ​ການ​ສ້າງ​ຕັ້ງ ສສ ຫວຽດນາມ ສາມາດ​ຍາດ​ໄດ້ຜົນ​ສໍາ​ເລັດ​ໃໝ່​ ໃຫຍ່​ຫລວງ​ໃນ​ຫລາຍ​ດ້ານ ​ໂດຍ​ສະ​ເພາະ​ພາຍຫລັງ ​ການ​ປະຕິວັດ​ນະ​ໂຍບາຍ​ ປ່ຽນ​ແປງ​ໃໝ່, ​ເສດຖະກິດ​ຈະ​ຫຍາ​ຍ​ໄວ​ໃນ​ບລະດັບ ​ແຖວ​ໜ້າ​ຂອງ​ອາ​ຊຽນ ກໍຄື​ພາກ​ພື້ນ, ຊີວິດ​ການ​ເປັນ​ຢູ່ ​ຂອງ​ປະຊາຊົນ​ໄດ້​ຮັບ​ການ​ປັບປຸງ​ດີ​ຂຶ້ນ ​ແລະ ສັງຄົມ​ຮັບປະກັນ​ຄວາມ ​ສະຫງົບ​ຮຽບຮ້ອຍ, ຜົນ​ສໍາ​ເລັດ​ທີ່​ໄດ້​ຮັບ​ນັ້ນ​ແມ່ນ ​ຍ້ອນ​ການ​ນໍາພາ​ອັນ​ປີ​ຊາ​ສາມາດ ​ແລະ ສະຫລາດ​ສ່ອງ​ໄສ​ ຂອງ​ພັກ​ຄອມ​ມູນິດ​ຫວຽດນາມ ກໍ​ຄື ​ລັດຖະບານ ​ແລະ ປະຊາຊົນ​ຫວຽດນາມ​ ອ້າ​ນນ້ອງ​ທີ່​ໄດ້​ຮ່ວມ​ແຮງ​ຮ່ວມ​ໃຈ​ກັນ​ ສ້າງສາ​ປະ​ເທດ​ຊາດ​ ໃຫ້​ຈະ​ເລີ​ນກ້າວໜ້າ ​ແລະ ຮຸ່ງ​ເຮືອງ​ເຫລືອງ​ເຫລື້ອມ​ຄື​ປະຈຸ​ບັນ. ​ຂ້າພະ​ເຈົ້າ​ຕາງໜ້າ​ພັກ, ລັດ ​ແລະ ປະຊາຊົນ​ລາວ​ບັນດາ​ເຜົ່າ ຂໍສະ​ແດງ​ຄວາມຂອບ​ໃຈ​ຢ່າງ​ຈິງ​​ໃຈ ​ແລະ ຮູ້​ບຸນຄຸນ​ຢ່າງ​ເລິກ​ເຊິ່ງຕໍ່​ພັກ, ລັດ ​ແລະ ປະຊາຊົນ​ຫວຽດນາມ​ອ້າ​ນນ້ອງ ​ແລະ ສະ​ແດງ​ຄວາມ​ພາກ​ພູມ​ໃຈ ​ເປັນ​ຢ່າງ​ຍິ່ງ ​ທີ່​ເຫັນ​ສາຍ​ພົວພັນ ຮ່ວມ​ມື​ຮອບດ້ານ​ລະ ຫວ່າງ ​ສອງ​ປະ​ເທດ​ລາວ ​ແລະ ຫວຽດນາມ​ ທີ່​ນັບ​ມື້​ນັບ​ໜັກ​ແໜ້ນ ​ແລະ ​ເລິກ​ເຊິ່ງຂອງ​ພັກ ​ແລະ ລັດຖະບານ, ພວກ​ຂ້າ​ພະ​ເຈົ້າ​ຢືນຢັນ ​ຈະ​ສືບ​ຕໍ່​ຮັດ​ແໜ້ນສາຍ​ພົວພັນ​ ມິດຕະພາບ​ອັນ​ຍິ່ງ​ໃຫຍ່, ຄວາມ​ສາມັກ​ຄີ​ແບບ​ພິ​ເສດ ​ແລະ ການ​ຮ່ວມ​ມື​ຮອບດ້ານ​ລະຫວ່າງ ​ສອງ​ປະ​ເທດຈະ​ເລີ​ນງອກ​ງາມ ​ແລະ ​ແຕກ​ດອກ​ອອກ​ຜົນ​ຍິ່ງໆ​ຂຶ້ນ​ໄປ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)