ກອງປະ ຊຸມໃຫຍ່ຄັ້ງທີ VII ຂອງຄະນະບໍລິຫານງານ ສະຫະພັນກໍາມະບານຫ້ອງວ່າການ ປະທານປະເທດ ຈັດຂຶ້ນໃນວັນທີ 28 ສິງຫາ 2020 ພາຍໃຕ້ການເປັນປະທານຂອງສະຫາຍ ຄໍາຕາ ລາດຊະວົງ ປະທານກໍາມະບານ ຫ້ອງວ່າການປະທານປະເທດ, ຫົວໜ້າກົມຈັດຕັ້ງ, ກວດກາ ແລະ ໂຄສະນາ ຫ້ອງວ່າການປະທານປະເທດ, ໂດຍມີສະຫາຍ ຄໍາເມິງ ພົງທະດີ ກໍາມະການສູນກາງພັກ, ລັດຖະມົນຕີ, ຫົວໜ້າຫ້ອງວ່າ ການປະທານປະເທດ, ສະຫາຍ ປ້ານ ນ້ອຍມະນີ ກໍາມະການສູນກາງພັກ, ປະທານສູນກາງ ສະຫະພັນກໍາມະບານລາວ, ພ້ອມດ້ວຍສະມາຊິກກໍາມະບານ ຫ້ອງວ່າການປະທານ ປະເທດ ແລະ ແຂກຖືກເຊີນເຂົ້າຮ່ວມ.

ສະຫາຍ ຄໍາຕາ ລາດຊະວົງ ໄດ້ຜ່ານບົດລາຍງານ ການເມືອງຂອງຄະນະບໍລິ ຫານງານສະຫະພັນກໍາມະບານ ຫ້ອງວ່າການປະທານປະເທດ ໂດຍໄດ້ຍົກໃຫ້ເຫັນວ່າ: ກອງປະຊຸມນີ້, ແມ່ນເຫດການການ ເມືອງທີ່ສໍາຄັນໜຶ່ງ ທີ່ສ່ອງແສງເຖິງບົດບາດ ການນຳພາຂອງການ ຈັດຕັ້ງມະຫາຊົນ, ຢັ້ງຢືນເຖິງການເຕີບໃຫຍ່ ຂະຫຍາຍຕົວຂອງວຽກງານ ກໍຄື ຈໍານວນສະມາຊິກ ກຳມະບານພາຍໃນຫ້ອງວ່າການປະທານປະເທດ ໃນຖານະເປັນ ເສນາທິການຊ່ວຍຄະນະພັກ-ຄະນະ ນໍາຫ້ອງວ່າການປະທານປະເທດ ແລະ ມີຄວາມອຸ່ນອ່ຽນທຸ່ນທ່ຽງຕໍ່ໜ້າທີ່ວຽກງານ, ພ້ອມທັງໄດ້ເອົາໃຈໃສ່ ປະຕິບັດມະຕິ ກອງປະຊຸມໃຫຍ່ຂອງພັກ ກໍຄືມະຕິກອງປະຊຸມໃຫຍ່ ກຳມະບານຫ້ອງວ່າການ ປະທານປະເທດສໍາເລັດ ເປັນກ້າວໆ. ອັນສໍາຄັນແມ່ນ ຕະຫລອດໄລຍະ 5 ປີຜ່ານມາ, ໄດ້ຖືເອົາວຽກງານການ ເມືອງແນວຄິດເປັນກົກ, ໂດຍໄດ້ຈັດຕັ້ງເຜີຍແຜ່ ບັນດາເອກະສານສຳຄັນຕ່າງໆ ຂອງ ກຳມະບານ, ພ້ອມທັງຈັດຕັ້ງເຊື່ອມຊຶມມະຕິ, ຄໍາສັ່ງ, ແນວທາງນະໂຍ ບາຍຂອງພັກ, ລະບຽບກົດໝາຍຂອງລັດ ແລະ ເອກະສານສໍາຄັນຕ່າງໆ ຂອງຊາດ ແລະ ສາກົນເປັນປົກກະຕິ, ເພື່ອເຮັດໃຫ້ຖັນແຖວ ພະນັກງານ-ສະມາຊິກ ກຳມະບານມີສະຕິຕໍ່ການຈັດຕັ້ງ, ເປັນເຈົ້າການພັດທະນາຄອບຄົວ,​ ບົນຈິດໃຈເພິ່ງຕົນເອງກຸ່ມຕົນເອງ ແລະ ປະກອບສ່ວນເຂົ້າໃນ ພາລະກິດປົກປັກຮັກສາ ແລະ ສ້າງສາປະເທດຊາດ.

 ໃນກອງປະຊຸມຄັ້ງນີ້, ຍັງມີພິທີມອບທຸງໄຊກໍາມະບານ, ປະດັບຫລຽນກາກໍາມະບານ ແລະ ມອບໃບຍ້ອງຍໍ ໃຫ້ຜູ້ມີຜົນງານດີເດັ່ນ ໃນໄລຍະຜ່ານມາ, ພ້ອມທັງປ່ອນບັດເລືອກຕັ້ງ ເອົາຄະນະບໍລິຫານງານ ສະຫະພັນກໍາມະບານ ຫ້ອງວ່າການປະທານປະເທດ ຊຸດໃໝ່, ເຊິ່ງກອງປະຊຸມ ໄດ້ເປັນເອກະສັນ ເລືອກເອົາສະຫາຍ ຄໍາຕາ ລາດຊະວົງ ເປັນປະທານ, ສະຫາຍນາງ ສຸກດາວັນ ເດດວົງສອນ ເປັນຮອງປະທານ, ສະຫາຍ ກອງແກ້ວ ໄຊວັງເມືອງ ເປັນຮອງປະທານທັງ ເປັນປະທານກວດກາ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)