ສານຂອງທ່ານ ນາຍົກລັດຖະມົນຕີ ແຫ່ງ ສປປ ລາວ ເນື່ອງໃນໂອກາດ ວັນໄຂສົກຮຽນໃໝ່ ສົກຮຽນ 2020-2021

0
160

ເນື່ອງໃນໂອກາດ ວັນໄຂສົກຮຽນໃໝ່ 2020-2021 ໃນວັນທີ 01 ກັນຍາ ແລະ ວັນເປີດໂທລະພາບການສຶກສາ ຢ່າງເປັນທາງການ, ຂ້າພະເຈົ້າ ຕາງໜ້າກົມການ ເມືອງສູນ ກາງພັກ ແລະ ລັດຖະບານ ຂໍສົ່ງຄວາມຢ້ຽມຢາມຖາມຂ່າວ, ອັນອົບອຸ່ນ, ຄວາມຮັກແພງອັນຈິງໃຈ ມາຍັງຜູ້ບໍລິຫານການສຶກສາທຸກຂັ້ນ, ຄູອາຈານ ແລະ ນັກຮຽນ-ນັກສຶກສາທຸກຊັ້ນ, ທຸກສາຍ ທຸກລະດັບ ທຸກຂົງເຂດໃນຂອບເຂດ ທົ່ວປະເທດມານະໂອກາດນີ້.

ດັ່ງທີ່ພວກເຮົາເຂົ້າໃຈ ກັນເປັນຢ່າງດີ ແລະ ເລິກເຊິ່ງນຳກັນແລ້ວວ່າ ການສຶກສາ ແມ່ນການສ້າງ ຊັບພະຍາກອນມະນຸດ, ຊັບພະຍາກອນບຸກຄົນ, ເປັນກໍາລັງແຮງ, ເປັນປັດໃຈສໍາຄັນຍິ່ງ ທີ່ມີລັກສະນະຕັດສິນກວ່າໝູ່ ໃນການພັດທະນາປະເທດຊາດ ຂອງທຸກຍຸກທຸກສະໄໝ. ຍ້ອນເຫັນຄວາມສຳຄັນຍິ່ງ ຂອງວຽກງານການສຶກສາ, ພັກເຮົາຍາມໃດກໍໃຫ້ທິດທາງ,​ ນະໂຍບາຍ ທີ່ໜັກແໜ້ນຕະຫລອດມາວ່າ: ການສຶກສາຕ້ອງໄປກ່ອນກ້າວໜຶ່ງ. ຕະຫລອດໄລຍະທີ່ຜ່ານມາ ລັດຖະບານທຸກຍຸກ ທຸກສະໄໝ ໄດ້ເອົາໃຈໃສ່ວຽກງານ ການພັດທະນາການສຶກສາ ຢ່າງບໍ່ຢຸດຢັ້ງ ແລະ ໄດ້ມີການພັດທະນາ ເປັນຮູບປະທຳຕະຫລອດມາ ແລະ ຈະສືບຕໍ່ໃຫ້ຄວາມເອົາໃຈໃສ່ ວຽກງານພັດທະນາ ການສຶກສາ ຂອງຊາດເຮົາຕໍ່ໄປ ເພື່ອສ້າງຄົນລາວ ໃຫ້ມີຄວາມຮູ້, ຄວາມສາມາດສູງຂຶ້ນ ເພື່ອໃຫ້ກາຍເປັນກໍາລັງແຮງ ໃນການປົກປັກຮັກສາ ແລະ ສ້າງສາພັດທະນາ ປະເທດຊາດ ໃຫ້ຈະເລີນກ້າວໜ້າ ຕໍ່ໄປຢ່າງບໍ່ຢຸດຢັ້ງ. ດັ່ງນັ້ນ,​ ພາລະໜ້າທີ່ຂອງ ຜູ້ບໍລິຫານການສຶກສາ, ຄູ-ອາຈານ ຈຶ່ງເປັນຜູ້ທີ່ມີຄວາມ ຮັບຜິດຊອບພິເສດ ຕໍ່ພາລະກິດການສຶກສາຂອງຊາດ ຂອງພວກເຮົາ ໃນປັດຈຸບັນ ແລະ ອະນາຄົດ.

ໃນສົກຮຽນຜ່ານມາ ປະເທດເຮົາໄດ້ຮັບຜົນກະທົບ ຢ່າງໜັກໜ່ວງ ຕໍ່ການຮຽນ, ການສອນ ຢູ່ໃນທົ່ວປະເທດ ເນື່ອງຈາກການລະບາດ ຂອງເຊື້ອພະຍາດ ໂຄວິດ-19, ທັງໄດ້ສົ່ງຜົນກະທົບ ໃນວົງກວ້າງ, ໃນນັ້ນ ຂະແໜງການສຶກສາ ແລະ ກິລາ ກໍໄດ້ຮັບຜົນກະທົບ ຢ່າງຫລີກລ້ຽງບໍ່ໄດ້. ໂຮງຮຽນໄດ້ມີການໂຈະ ການຮຽນ-ການສອນຊົ່ວຄາວ ເປັນເວລາກວ່າ 2 ເດືອນ ໃນຂອບເຂດທົ່ວປະເທດ, ໂຮງຮຽນຫລາຍກວ່າພັນແຫ່ງ ໄດ້ຖືກນໍາໃຊ້ເປັນສູນ ກັກກັນຄົນລາວ ທີ່ມາຈາກຕ່າງປະເທດ. ການລະບາດຂອງເຊື້ອພະຍາດ ໂຄວິດ-19 ເຖິງວ່າຈະສົ່ງຜົນກະທົບ ແລະ ສິ່ງທ້າທາຍໃນ ການຮຽນ-ການສອນ ຢ່າງໃຫຍ່ຫລວງ, ແຕ່ຂະແໜງການສຶກສາ ກໍໄດ້ມີຄວາມພະຍາຍາມ ຫັນເອົາວິກິດນີ້ ເພື່ອປັບປຸງການປ່ຽນແປງໃໝ່ ໃນລະບົບການສຶກສາເປັນຕົ້ນ ໄດ້ນໍາໃຊ້ສື່ການຮຽນ-ການສອນ ອອນລາຍ ເຂົ້າໃນການຖ່າຍທອດ ຄວາມຮູ້ຢ່າງແຜ່ຫລາຍ ໃນຊ່ວງທີ່ໂຈະການຮຽນ ແບບປົກກະຕິ, ຜົນງານທີ່ພົ້ນເດັ່ນອັນໃໝ່ ຂອງຂະແໜງການສຶກສາ ແລະ ກິ ລາ ໄດ້ມີການເປີດນໍາໃຊ້ຊ່ອງ ໂທລະພາບຜ່ານດາວທຽມ ຊ່ອງ 8(LAO ESTV) ເປັນຊ່ອງໂທລະພາບການສຶກສາ ແລະ ກິລາ ເປັນຄັ້ງທຳອິດ ຂອງຊາດລາວເຮົາ ທີ່ມີການຖ່າຍທອດທຸກມື້ ແຕ່ 5:00 ໂມງເຊົ້າ ຈົນຮອດ 23:00 ໂມງ. ໃນໂອກາດນີ້ ຂ້າພະເຈົ້າ ຂໍສະແດງຄວາມຊົມເຊີຍ ຕໍ່ຄວາມເອົາໃຈໃສ່ ຂອງຄະນະນໍາ ກະຊວງສຶກສາທິການ ແລະ ກິລາ ທຸກຂັ້ນ ແລະ ນັກວິຊາການ ຈາກພາກສ່ວນທີ່ກ່ຽວຂ້ອງ ໃນການພັດທະນາ ລະບົບການຮຽນຜ່ານໂທລະພາບດັ່ງກ່າວ ເຊິ່ງຖືວ່າເປັນບາດກ້າວ ຂະຫຍາຍຕົວ ທີ່ສຳຄັນ ແລະ ເປັນປະໂຫຍດມະຫາສານ ຕໍ່ວົງການສຶກສາ ຂອງຊາດລາວເຮົາຕໍ່ໄປ.

ເພື່ອເຮັດໃຫ້ການໄຂສົກຮຽນໃໝ່ ສົກປີ 2020-2021 ໄດ້ມີບັນຍາກາດທີ່ດີ ແລະ ທັນກັບເວລາຕາມ ປະຕິທິນປີການສຶກສາ ຂອງແຕ່ລະຊັ້ນ, ແຕ່ລະສາຍ. ຂ້າພະເຈົ້າຂໍຮຽກຮ້ອງ ມາຍັງຄະນະພັກ ຄະ ນະນໍາ, ຜູ້ບໍລິຫານການສຶກສາ, ຄະນະພັດທະນາ ການສຶກສາທຸກຂັ້ນ ແລະ ທຸກພາກສ່ວນ ໃນສັງ ຄົມລວມທັງພາກເອກະຊົນ ຈົ່ງເປັນເຈົ້າການຮ່ວມກັນ ກະກຽມຄວາມພ້ອມ ແລະ ອໍານວຍຄວາມສະດວກຕາມເງື່ອນໄຂ ແລະ ຄວາມສາມາດຕົວຈິງ ຂອງຂະແໜງການ ແລະ ທ້ອງຖິ່ນ ໂດຍສະເພາະແມ່ນ ການຊັບຊ້ອນບັນຈຸຄູສອນ, ກະກຽມ ອາຄານສະຖານ ທີ່ຫ້ອງຮຽນ, ອຸປະກອນການສອນ-ການຮຽນ, ລວມທັງບ່ອນທີ່ພັກອາໄສ ຂອງຄູຢູ່ເຂດ ຫ່າງໄກສອກຫລີກ ແລະ ດ້ານທີ່ຈໍາເປັນອື່ນໆ ເພື່ອຮັບໃຊ້ໃຫ້ແກ່ການ ເປີດສົກຮຽນ ແລະ ຮັບໃຊ້ແກ່ການສອນ-ການຮຽນ ຕະຫລອດຮອດສົກຮຽນໃໝ່ ໃຫ້ໄດ້ຮັບຜົນດີ. ພ້ອມທັງມີມາດຕະການປ້ອງກັນ ເຊື້ອພະຍາດ ໂຄວິດ-19 ໂດຍການໝັ່ນລ້າງມືດ້ວຍສະບູ່ ຫລື ນໍ້າຢາຂ້າເຊື້ອ, ສະໜອງຜ້າອັດປາກ-ດັງ, ກວດວັດອຸນຫະພູມ ຢ່າງເປັນປະຈຳ ໃຫ້ກາຍເປັນຄວາມເຄີຍຊິນ ໃນການດຳລົງຊີວິດປະຈຳວັນ ຂອງປະຊາຊົນເຮົາ ໂດຍສະເພາະບັນດາ ນັກຮຽນນັກສຶກສາ, ຊາວໜຸ່ມ, ເຍົາວະຊົນ ແລະ ອະນຸຊົນ ຂອງພວກເຮົາ.

ທ້າຍສຸດນີ້, ຕາງໜ້າໃຫ້ການນໍາພັກ ແລະ ລັດຖະບານ, ຂ້າພະເຈົ້າ ຂໍອວຍພອນໄຊອັນປະເສີດ ມາຍັງຜູ້ບໍລິຫານ ການສຶກສາ, ຄູ-ອາຈານ, ນັກຮຽນ-ນັກສຶກສາ, ພະນັກງານ-ລັດ ຖະກອນ, ທະຫານ, ຕໍາຫລວດ ຕະຫລອດຮອດ ປະຊາຊົນລາວບັນດາເຜົ່າ ໃນທົ່ວປະເທດ ຈົ່ງມີສຸຂະພາບເຂັ້ມແຂງ ມີຄວາມສຸກຄວາມຈະເລີນ ແລະ ມີຜົນສໍາເລັດໃນໜ້າທີ່ ວຽກງານຂອງຕົນ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)