​ວັນ​ທີ 28 ສິງຫາ 2020 ນີ້, ສະມາຄົມ​ນັກ​ຂ່າວ ​ແຫ່ງ ສປປ ລາວ ຮ່ວມ​ກັບ​ສະພາ​ອຸດສາຫະກຳ ​ແລະ ການ​ຄ້າ​ແຫ່ງ​ຊາດ​ລາວ​ ​ໄດ້​ຈັດ​ກິດຈະກຳ​ແຂ່ງ​ຂັນ ​ກິລາ​ບານ​ເຕະ ຍິງ-​ຊາຍ ຢູ່​ສະໜາມກິລາ​ເຈົ້າ​ອານຸວົງ ນະຄອນຫລວງ​ວຽງ​ຈັນ ​​ໂດຍມີ​ບັນດາຮອງ​ລັດຖະມົນ​ຕີ ຈາກກະຊວງ​ຖະ​ແຫລ​ງຂ່າວ, ວັດທະ​ນະ​ທຳ ​ແລະ ທ່ອງ​ທ່ຽວ, ມີປະທານ, ຮອງ​ປະທານ ສະພາ​ອຸດສາຫະກຳ ​ແລະ ການ​ຄ້າ​ແຫ່ງ​ຊາດ​ລາວ, ພ້ອມ​ດ້ວຍ​ຊາວ​ໜຸ່ມ, ພະນັກງານ​ອາວຸ​ໂສ, ພະນັກງານ-ລັດຖະກອນ ຂອງ​ທັງ​ສອງ​ພາກສ່ວນ ​ເຂົ້າ​ຮ່ວມ.

ການ​ຈັດ​ກິ​ດຈະ​ກຳ​ແຂ່ງຂັນ​ກິລາ ​​ເຕະບານ​ມິດຕະພາບ ​ໃນ​ຄັ້ງ​ນີ້, ​ເປັນ​ການ​ຮັດ​ແໜ້ນ​ຄວາມ​ສາມັກຄີ​, ຄວາມ​ຮັກ​ແພງ ລະຫວ່າງ ສະມາຄົມ​ນັກ​ຂ່າວ ​ແຫ່ງ ສປປ ລາວ ກໍ​ຄື ບັນດາສື່​ມ​ວນຊົນ ຈາກ​ທຸກຂະ​ແໜງ​ການ ອ້ອມ​ຂ້າງ​ສູນ​ກາງ ​ແລະ ​ສະພາ​ອຸດສາຫະກຳ ​ແລະ ການ​ຄ້າ​ແຫ່ງ​ຊາດ​ລາວ​ ​ໃຫ້​ແໜ້ນ​ແຟ້ນຂຶ້ນ​ກວ່າ​ເກົ່າ, ທັງ​ເປັນ​ການ​ສ້າງ​ຂະ​ບວນການສະ​ເຫລີ​ມສະຫລອງ​ ວັນ​ສື່​ມວນ​ຊົນ ​ແລະ ການ​ພິມ​ຈຳໜ່າຍ ຄົບຮອບ 70 ປີ ​ໃຫ້​​ເປັນ​ຂະ​ບວນການຟົດ​ຟື້ນ.

ການແຂ່ງຂັນ​ກິລາ​​ເຕະບານ ​ໃນ​ຄັ້ງ​ນີ້, ກຳ​ເນີນ​ໄປ​ດ້ວຍ​ບັນ​ຍາ​ກາດ ​ອັນ​ຟົດ​ຟື້ນ​ມ່ວນ​ຊື່ນ, ຮັກສາ​ໄດ້​ຄວາມ​ສະຫງົບ, ປອດ​ໄພ, ຄວາມເປັນ​ລະບຽບ​ຮຽບຮ້ອຍ ​ເຊິ່ງນັກ​ກິລາ ທີ່​ເຂົ້າ​ຮ່ວມ ມີ​ບັນດາ ​ການ​ນຳ​ຈາກ​ສະມາ ຄົມ​ນັກ​ຂ່າວ​ແຫ່ງ ສປປ ລາວ, ຈາກ​ສະມາຄົມ​ການ​ພິມ​ຈຳໜ່າຍ, ຈາກສະພາ​ອຸດສາຫະກຳ ​ແລະ ການ​ຄ້າ​ແຫ່ງ​ຊາດ​ລາວ, ຈາກ​ກົມ​ສື່​ມວນ​ຊົນ, ກົມ​ພິມ​ຈຳ​ໜ່າຍ, ​ໂຮງພິມ​​ແຫ່ງ​ລັດ ​ແລະ ບັນດາສື່​ມ​ວນຊົນ ຈາກ​ທຸກຂະ​ແໜງ​ການ ອ້ອມ​ຂ້າງ​ສູນ​ກາງ ​ເຂົ້າຮ່ວມ ຢ່າງ​ຄຶກຄື້ນມ່ວນ​ຊື່ນ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)