ການແຂ່ງຂັນກີລາການທະຫານ (ARMY GAMES 2020) ຮອບຊີງຊະນະເລີດການ ນຳໃຊ້ພາຫະນະຊ່າງແສງຮັບປະກັນສູ້ຮົບໄດ້ຈັດຂຶ້ນໃນວັນທີ 28 ສິງຫາ ທີ່ຜ່ານມານີ້, ຢູ່ທີ່ສະໜາມແຂ່ງຂັນຂອງກອງພົນນ້ອຍຊ່າງແສງກອງທັບ ສ.ຮັດເຊຍ ທີ່ເມືອງ ໂວນກາກຼາດ ໂດຍພາຍໃຕ້ການເປັນປະທານຂອງ ສະຫາຍ ພົນ ຈັດຕະວາ ສະເມຍຊະໂກ ຮອງຫົວໜ້າເຫຼົ່າຮົບຊ່າງແສງກໍາລັງປະກອບອາວຸດ ສະຫະພັນຮັດເຊຍ.

ເຊິ່ງໃນການແຂ່ງຂັນດັ່ງກ່າວ ເຫຼົ່າຮົບຊ່າງແສງກອງທັບປະຊາຊົນລາວ ສາມາດຍາດໄດ້ອັນດັບທີ 2 ມາຄອບຄອງຢ່າງສົມກຽດ. ການແຂ່ງຂັນຮອບຊີງຊະນະເລີດໄດ້ແຂ່ງຂັນ “ການນຳໃຊ້ ພາຫະນະຊ່າງແສງຮັບປະກັນສູ້ຮົບ” ໂດຍມີ 6 ປະເທດເຂົ້າຮ່ວມແຂ່ງຂັນຄື: ຣັດເຊຍເຈົ້າພາບ, ເບຣາຣຸດ, ມົງໂກເລຍ, ອຸດສະ ເບກກິດສະຖານ, ປາກິດສະຖານ ແລະ ລາວ, ສ່ວນເຫຼົ່າຮົບຊ່າງແສງກອງທັບປະຊາຊົນລາວໄດ້ສົ່ງ 6 ປະເພດພາຫະນະເຂົ້າຮ່ວມແຂ່ງຂັນເຊັ່ນ: ລົດຂຸດຂຸມຄອງ, ລົດສ້າງສິ່ງກິດຂວາງແຕກ, ລົດສ້າງສິ່ງກິດຂວາງບໍ່ແຕກ, ລົດດຸດ, ລົດທຳລາຍສິ່ງກີດຂວາງ ແລະ ລົດເຮືອ, ສໍາລັບຜົນຂອງການແຂ່ງຂັນຊະນະເລີດໄດ້ຮັບ ລາງວັນທີ I ມີຄະແນນລວມສະເໝີກັນ ແມ່ນທິມເຫຼົ່າຮົບຊ່າງແສງ ສ.ຣັດເຊຍ ແລະ ປະເທດ ເບຣາຣຸດ ແລະ ລາງວັນຮອງຊະນະເລີດ ແມ່ນທີມເຫຼົ່າຮົບຊ່າງແສງກອງທັບປະຊາຊົນລາວ.

ນອກຈາກນັ້ນ, ນັກກີລາເຫຼົ່າຮົບຊ່າງແສງກອງທັບປະຊາຊົນລາວ ຍັງຖືກຄັດເລືອກໃຫ້ເປັນນັກຂັບຂີ່ດີເດັ່ນ 2 ສະຫາຍ ໃນປະເພດລົດທຳລາຍສີ່ງກີດຂວາງ. ໂອກາດດັ່ງກ່າວ ສະຫາຍ ພົນຈັດຕະວາ ສະເມຍຊະໂກ ກໍໄດ້ເປັນກຽດປະດັບຫຼຽນມິດຕະພາບໃຫ້ແກ່ບັນດານັກກີລາແຕ່ລະ ທີມທີ່ໄດ້ເຮັດສຳເລັດໜ້າທີ່ ໃນການແຂ່ງຂັນຄັ້ງນີ້, ພ້ອມທັງ ມອບລາງໃຫ້ທີມທີ່ຊະນະເລີດ ແລະ ຮອງຊະນະເລີດຢ່າງສົມກຽດ.

Medialaos MMD (ແຫຼ່ງຂໍ້ມູນຈາກ: ໜັງສືພິມ ກອງທັບປະຊາຊົນລາວ)