ໃນລະຫວ່າງວັນທີ 27-28 ສິງຫາ 2020 ທີ່ ຜ່ານມາ, ສະຫາຍ ແສງເພັດ ຮຸ່ງບຸນຍວງ ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ສສ ຫວຽດນາມ ໄດ້ນຳພາຄະນະ ແລະ ພະນັກງານສະຖານທູດລາວ ເຂົ້າອວຍພອນສະຫາຍ ຫງວຽນ ຮຸຍຕັ້ງ ຮອງຫົວໜ້າຜູ້ປະ ຈຳການ ຄະນະພົວພັນຕ່າງປະເທດ ສູນກາງພັກກອມມູນິດຫວຽດນາມ ແລະ ສະຫາຍ ຫງວຽນ ກວັກ ຊຸງ ຮອງລັດຖະມົນຕີ ກະຊວງການຕ່າງປະເທດ ຫວຽດນາມ ເນື່ອງໃນໂອກາດວັນຊາດຂອງ ສສ ຫວຽດ ນາມ ຄົບຮອບ 75 ປີ (2/9/1945-2/9/2020) ແລະ ວັນສ້າງສາຍພົວພັນການທູດ ລະຫວ່າງ ສອງປະ ເທດ ຄົບຮອບ 58 ປີ (5/9/1962-5/9/2020).

ໂອກາດນີ້, ສະຫາຍ ແສງເພັດ ຮຸ່ງບຸນຍວງ ໄດ້ສະແດງຄວາມດີໃຈ ແລະ ຄວາມຊົມເຊີຍຕໍ່ບັນດາໝາກຜົນ ທີ່ປະຊາຊົນຫວຽດນາມ ພາຍໃຕ້ການ ຊີ້ນນຳ-ນຳພາ ຂອງພັກກອມມູນິດຫວຽດນາມ ໄດ້ຮັບຜົນສຳເລັດ ແລະ ໄດ້ຮັບໄຊຊະນະອັນໃຫຍ່ຫລວງ ໃນພາລະກິດຕໍ່ສູ້ປົກປັກຮັກສາ ຄວາມເປັນເອກະ ລາດ, ທ້ອນໂຮມປະເທດຊາດ ເປັນເອກະພາບ, ສາມາດບືນຕົວຈາກປະເທດສົງຄາມ ກາຍເປັນປະເທດມີຄວາມເຂັ້ມແຂງ, ໜັກແໜ້ນທາງດ້ານການເມືອງ, ເສດຖະກິດຂະຫຍາຍຕົວ, ໃນຖານະບົດບາດປະເທດດ້ອຍພັດທະນາ ກາຍເປັນປະເທດ ທີ່ມີລາຍຮັບປານກາງ. ໃນປີ 2020 ນີ້, ສສ ຫວຽດນາມ ໄດ້ກາຍເປັນປະເທດ ສະມາຊິກບໍ່ຖາວອນ ສະພາຄວາມໝັ້ນຄົງຂອງ ສປຊ ເຊິ່ງເປັນສະມາຊິກໜຶ່ງດຽວໃນໂລກ ຜ່ານການເລືອກຕັ້ງດ້ວຍ ຄະແນນສູງສຸດ ໃນປະຫວັດສາດ ແລະ ເປັນປະທານອາຊຽນ ແລະ ເປັນປະທານໄອປາ  ດ້ວຍຜົນສຳເລັດອັນຈົບງາມ ເຊິ່ງເຊື່ອວ່າຈະເປັນບົດຮຽນ ອັນລໍ້າຄ່າ ໃຫ້ແກ່ບັນດາ ປະເທດໃນໂລກ ຖອດຖອນເອົາປະສົບການຈາກ ສສ ຫວຽດນາມ. ການຮ່ວມມືສອງປະເທດລະຫວ່າງ ສອງພັກ, ສອງລັດ ແລະ ປະຊາຊົນ ສອງຊາດ ລາວ-ຫວຽດນາມ ນັບມື້ນັບແໜ້ນແຟ້ນຂຶ້ນ ແລະ ປະກອບສ່ວນເສີມຂະຫຍາຍ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີ ພິເສດ ແລະ ການຮ່ວມມືຮອບດ້ານລະຫວ່າງສອງປະ ເທດໃຫ້ຈະເລີນງອກງາມ.

ໃນໂອກາດດຽວກັນ, ທ່ານ ຫງວຽນ ຮຸຍຕັ້ງ ກໍໄດ້ສະແດງຄວາມ ຂອບໃຈຢ່າງຈິງໃຈ ແລະ ໄດ້ຕີລາຄາສູງຕໍ່ຜົນສຳເລັດຂອງລາວ ທີ່ຍາດມາໄດ້ ໃນວຽກງານຕ້ານການ ແຜ່ລະບາດໂຄວິດ-19, ການຜະລິດພາຍໃນປະເທດ, ການພົວພັນມິດຕະພາບ ອັນຍິ່ງໃຫຍ່ສອງພັກ ສອງລັດ ທີ່ມີຄວາມ ໜັກແໜ້ນຍິ່ງໆຂຶ້ນ, ທັງມີການແລກປ່ຽນບົດຮຽນ ໃນສະພາບການແຜ່ ລະບາດພະຍາດ ໂຄວິດ-19, ພ້ອມກັນດຳເນີນພັດທະນາ ເສດຖະກິດສັງຄົມ, ຮັບປະກັນການພັດທະນາ ເສດຖະກິດ ແລະ ຄວາມປອດໄພໃນສັງຄົມ. ພ້ອມກັນນີ້ ທັງສອງຝ່າຍຈະສືບຕໍ່ ຍົກສູງການພົວພັນຮ່ວມມື ສອງປະເທດ ບໍ່ວ່າທຸກສະຖານະການ ແລະ ການຊ່ວຍ ເຫລືອລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ, ຈະສືບຕໍ່ຊຸກຍູ້ເສີມຂະ ຫຍາຍສາຍພົວພັນ ມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງປະເທດ ໃຫ້ຈະເລີນງອກງາມ ແລະ ໝັ້ນຄົງທະນົງ ແກ່ນຊົ່ວກາລະນານ. ພິເສດລະຫວ່າງຄະນະພົວ ພັນຕ່າງປະເທດສູນກາງພັກ ກອມມູນິດຫວຽດນາມ ກັບ ຄະນະພົວພັນຕ່າງ ປະເທດສູນກາງພັກລາວ, ສະ ຖານທູດລາວ ຈົ່ງສືບຕໍ່ໄດ້ຮັບການເພີ່ມທະວີ ຂະຫຍາຍຕົວຢ່າງບໍ່ຢຸດຢັ້ງ.

ສະຫາຍ ຫງວຽນ ກວັກຊຸງ ກໍໄດ້ສະແດງຂອບໃຈ ຢ່າງຈິງໃຈມາຍັງ ທ່ານ ແສງເພັດ ຮຸ່ງບຸນຍວງ ແລະ ພະນັກງານສະຖານທູດລາວ ທີ່ໄດ້ມາ ອວຍພອນວັນຊາດ ຫວຽດນາມ ຄົບ 75 ປີ, ວັນສ້າງຕັ້ງສາຍພົວພັນການທູດລະຫວ່າງລາວ ແລະ ຫວຽດນາມ ຄົບຮອບ 58 ປີ ແລະ ວັນຂະແໜງ ການຕ່າງປະເທດ ຄົບຮອບ 75 ປີ ໃນຄັ້ງນີ້. ພ້ອມທັງ ຢືນຢັນວ່າຈະເຮັດສຸດ ຄວາມສາມາດ ເພື່ອຊ່ວຍເຫລືອລາວ ຜ່ານຜ່າຄວາມຫຍຸ້ງຍາກ ດ້ວຍການ ຊ່ວຍເຫລືອເຊິ່ງກັນ ແລະ ກັນ, ທັງຮ່ວມມືກັນຢ່າງໜິດແໜ້ນ ເພື່ອພັດທະນາ ປະເທດຊາດໃຫ້ຈະເລີນຮຸ່ງເຮືອງ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)