ອາດສະພອນໄດ້ຮັບຜົນກະທົບຈາກນ້ຳຖ້ວມ 42 ບ້ານ

0
204

ຜົນກະທົບກະພາຍຸໂພດູນ ແລະພາຍຸດີເບເຊິນ ເລີ່ມຕັ້ງແຕ່ 29 ສິງຫາ ເປັນຕົ້ນມາ ສົ່ງຜົນໃຫ້ຫຼາຍພື້ນທີ່ໃນເມືອງອາດສະພອນ ແຂວງສະຫວັນນະເຂດ ເກີດມີນ້ຳຖ້ວມກວມຫຼາຍພື້ນທີ່ພາຍໃນເມືອງ ສົ່ງຜົນໃຫ້ສາຍນ້ຳເຊນ້ອຍ, ເຊຈຳພອນ ແລະສາຍຫ້ວຍຕ່າງໆມີລະດັບນ້ຳເພີ່ມຂື້ນສູງ ແລະໄຫຼຖ້ວມເຮືອນຊານຂອງພໍ່ແມ່ປະຊາຊົນ ແລະເນື້ອທີ່ທຳການຜະລິດຕ່າງໆເສຍຫາຍຍ່າງໜັກ, ການສັນຈອນໄປມາຕາມເສັ້ນທາງຫຼັກ ແລະເສັ້ນທາງເຊື່ອມຕໍ່ລະຫວ່າງບ້ານຕໍ່ບ້ານ ແລະບ້ານຫາເມືອງຖືກຕັດຂາດບາງຊ້ວງ, ພ້ອມນີ້ເສັ້ນທາງກໍ່ໄດ້ເປ້ເພເສຍຫາຍຈົນເຮັດໃຫ້ລົດນ້ອຍໃຫຍ່ບໍ່ສາມາດສັນຈອນໄປມາໄດ້.ມາລະຫວ່າງວັນທີ 4-5 ກັນຍາ 2019 ນີ້ການນໍາເມືອງອາດສະພອນ ກໍ່ຄືຄະນະກໍາມະການຕ້ານແລ້ງ-ຕ້ານຖ້ວມຂອງເມືອງ ນຳໂດຍ ທ່ານ ບົວລີ ຈັນສີ ຮອງເລຂາພັກເມືອງ ປະທານແນວລາວສ້າງຊາດເມືອງອາດສະພອນ ພ້ອມດ້ວຍຄະນະກໍ່ໄດ້ລົງຕິດຕາມສະພາບນ້ຳຖ້ວມທີ່ບ້ານນາເຂົ້າໝີ້ນ, ບ້ານຫີນສີ່ວ, ບ້ານຜັກຂະຫຍ່າ ແລະ ບ້ານດົງທະດາ.

ທ່ານ ສີວິໄລ ສີທຳມະວັນ ຫົວໜ້າຫ້ອງການກະສີກຳ-ປ່າໄມ້ເມືອງອາດສະພອນ ໄດ້ລາຍງານສະພາບຜົນກະທົບຈາກໄພນ້ຳຖ້ວມ, ເຊິ່ງທົ່ວເມືອງມີ 42 ບ້ານ, ມີ 8,569 ຄອບຄົວ ໄດ້ຮັບຜົນກະທົບ, ມີເນື້ອທີ່ປັກດຳເຂົ້ານາປີ 600 ກວ່າເຮັກຕາໄດ້ຮັບຜົນກະທົບ ແລະເສຍຫາຍ, ໜອງປາກວ່າ 100 ໜອງເສຍຫາຍ, ລະບົບຊົນລະປະທານໄດ້ຮັບຜົນກະທົບ 5 ແຫ່ງ, ເຄື່ອນຍ້າຍສັດລ້ຽງປະເພດງົວ-ຄວາຍ ຈຳນວນ 10 ພັນກວ່າໂຕ, ສັດປີກອີກກວ່າ 150,000 ໂຕ. ພ້ອມນີ້ ການນຳເມືອງອາດສະພອນທີ່ໄດ້ລົງຕິດຕາມຊຸກຢູ້ ໂດຍສະເພາະ ທ່ານ ບົວລີ ຈັນສີ ກໍ່ໄດ້ຮຽກຮ້ອງໃຫ້ພໍ່ແມ່ປະຊາຊົນ ຜູ້ທີ່ມີເງື່ອນໄຂ ເອົາໃຈໃສ່ຊ່ວຍເຫຼືອເຊິ້ງກັນ ແລະກັນ ແລະແນະນຳໃຫ້ອຳນາດການປົກຄອງບ້ານເອົາໃສ່ເກັບກຳຂໍ້ມູນ ຜົນເສຍຫາຍໃຫ້ລະອຽດ ແລ້ວລາຍງານຕໍ່ພາກສ່ວນກ່ຽວຂ້ອງຂອງເມືອງ ເພື່ອເກັບກຳສະພາບຜົນເສຍຫາຍລະອຽດໃນທົ່ວເມືອງ ເພື່ອທີ່ຈະນຳໄປຊອກທາງແກ້ໄຂ ແລະຊ່ວຍເຫຼືອ. ພ້ອມນີ້ ທາງຄະນະກຳມະການຂອງເມືອງກໍ່ໄດ້ນຳເຕັ້ນບໍລິຈາກນ້ຳດື່ມ ພ້ອມທັງບໍລິການເຮືອເພື່ອຂົນສົ່ງພໍ່ແມ່ປະຊາຊົນທີ່ເດີນທາງຈາກເທດສະບານເມືອງຫາບ້ານຜັກຂະຫຍ່າ ເຊິ່ງຈຸດດັ່ງກ່າວຖືກນ້ຳຖ້ວມສູງ ແລະໄຫຼຕັດເສັ້ນທາງ ການສັນຈອນໄປມາແມ່ນໃຊ້ເຮືອ.