ໃນວັນທີ 1 ກັນຍາ 2020 ນີ້, ຖືວ່າແມ່ນປາງບຸນໃຫຍ່ຂອງຊາດ ກໍຄືສໍາລັບຄູ-ອາຈານແລະ ບັນດານ້ອງນັກຮຽນ-ນັກສຶກສາ ໃນຂອບເຂດ ທົ່ວປະເທດ,​ ເນື່ອງຈາກເປັນມື້ໄຂສົກຮຽນໃໝ່ ສົກປີ 2020-2021 ຢ່າງເປັນທາງການ ແລະ ໃນຕອນເຊົ້າຂອງມື້ດັ່ງກ່າວນີ້ ຢູ່ໂຮງຮຽນ ແຫ່ງຕ່າງໆ ນັບທັງພາກລັດ ແລະ ເອກະຊົນ ໃນທົ່ວປະເທດ ໄດ້ເຕັມໄປດ້ວຍຄວາມເບີກບານແຈ່ມໃສ ແລະ ຮອຍຍິ້ມແຫ່ງຄວາມດີໃຈ ຂອງບັນດາ ຄູ-ອາຈານ, ຜູ້ປົກຄອງແລະນ້ອງນັກຮຽນ ທີ່ໄດ້ມາພົບໜ້າພໍ້ຕາ ກັນອີກເທື່ອໃໝ່ດ້ວຍບັນ ຍາກາດອັນຟົດຟື້ນ, ໄປຄຽງຄູ່ກັບການສືບຕໍ່ປະຕິບັດ ມາດຕະການປ້ອງກັນ ພະຍາດCOVID-19.

ສໍາລັບຢູ່ນະຄອນຫລວງວຽງຈັນ ກໍໄດ້ຈັດພິທີໄຂສົກຮຽນໃໝ່ ຂຶ້ນຢ່າງເປັນທາງການ ຢູ່ໂຮງຮຽນມັດ ທະຍົມສົມບູນວຽງຈັນ (ມສວຽງຈັນ) ໂດຍມີ ທ່ານ ບັນຈົງ ລັດຖະວັນ ຮອງຫົວໜ້າກົມສາມັນ ກະຊວງສຶກສາ ທິການ ແລະ ກິລາ, ມີບັນດາຄູ-ອາຈານ, ພ້ອມດ້ວຍນ້ອງນັກຮຽນ ເຂົ້າຮ່ວມເປັນ ຈໍານວນຫລາຍ. ໃນໂອກາດນີ້, ທ່ານນາງ ປະທຸມພອນ ພິມປະໄພ ຮັກສາການອໍານວຍໂຮງຮຽນ ມສ ວຽງຈັນ ໄດ້ມີຄໍາເຫັນວ່າ: ໂຮງຮຽນມັດທະຍົມ ສົມບູນວຽງຈັນ ເປັນໂຮງຮຽນທີ່ມີອາຍຸເກົ່າແກ່ ແລະ ມີຜົນງານໃນການກໍ່ສ້າງຊັບພະ ຍາກອນມະນຸດໃນລະດັບປະເທດ, ຖືວ່າເປັນສະຖາບັນການສຶກສາ ທີ່ປະສົບຜົນສໍາເລັດ ໃນການສ້າງບຸກຄະລາກອນໃຫ້ສັງຄົມ ເຊິ່ງສະແດງອອກຄື ມີສິດເກົ່າຫລາຍຄົນ ໄດ້ກາຍເປັນຜູ້ນໍາຂັ້ນສູງ, ເປັນນັກທຸລະ ກິດ ແລະ ຜູ້ປະກອບການທີ່ມີຊື່ສຽງໃນສັງຄົມລາວ. ພ້ອມນີ້, ຍັງໄດ້ຮັບນາມມະຍົດຕ່າງໆ ເປັນຕົ້ນ: ໂຮງຮຽນຕົວແບບຄຸນນະພາບ, ໂຮງຮຽນປອດສິ່ງເສບຕິດ, ໂຮງຮຽນປອດຄວັນຢາສູບ ແລະ ຕົວແບບດ້ານ ອື່ນໆຕື່ມອີກ.

ປັດຈຸບັນ, ໂຮງຮຽນນີ້ມີຄູ-ອາຈານ ທັງໝົດ 154 ຄົນ(ຍິງ 84 ຄົນ) ແລະ ສົກປີນີ້, ມີນ້ອງນັກຮຽນຫລາຍກວ່າ 3.100 ກວ່າຄົນ; ນອກນີ້, ຍັງມີການຮຽນ-ການສອນ ພາສາຕ່າງປະເທດອີກ 5 ພາສາຄື: ພາສາຝຣັ່ງ, ອັງກິດ, ຍີປຸ່ນ, ຈີນ ແລະ ສ ເກົາຫລີ. ໃນສົກຮຽນ 2020-2021 ນີ້, ຄະນະອໍານວຍການ, ພ້ອມດ້ວຍຄູ-ອາຈານ ຈະເອົາໃຈໃສ່ສືບຕໍ່ ປະຕິບັດບັນດາມະຕິ, ຄໍາສັ່ງຕ່າງໆ ຂອງຂັ້ນເທິງ, ກໍຄືແຜນພັດທະນາ ຂອງໂຮງຮຽນວາງອອກ ໃຫ້ປາກົດຜົນເປັນຈິງ ເພື່ອສ້າງນັກຮຽນ ໃຫ້ເປັນຜູ້ ທີ່ມີຄຸນສົມບັດດີ, ຮຽນເກັ່ງ ແລະ ກາຍເປັນບຸກຄະລາກອນ ທີ່ດີຂອງຊາດໃນອານາຄົດ.

ແນວໃດກໍຕາມ, ໃນສານຂອງທ່ານນາຍົກ ລັດຖະມົນຕີແຫ່ງ ສປປ ລາວ ເນື່ອງໃນໂອກາດ ວັນໄຂສົກຮຽນໃໝ່ສົກຮຽນ 2020-2021 ນີ້, ໄດ້ຮຽກຮ້ອງໃຫ້ ຜູ້ບໍລິຫານການສຶກສາທຸກຂັ້ນ ທຸກພາກສ່ວນໃນສັງຄົມ ລວມທັງພາກເອກະຊົນ ຈົ່ງເປັນເຈົ້າການຮ່ວມກັນ ເພື່ອອໍານວຍຄວາມສະດວກ ຕາມເງື່ອນໄຂ ແລະ ຄວາມສາມາດຕົວຈິງ ຂອງຂະແໜງການ ແລະ ທ້ອງຖິ່ນ ໂດຍສະເພາະແມ່ນ ການຊັບຊ້ອນບັນຈຸຄູສອນ ອາຄານສະຖານ ທີ່ຫ້ອງຮຽນ, ອຸປະກອນການສອນ-ການຮຽນ ທີ່ພັກອາໄສຂອງຄູຢູ່ ເຂດຊົນນະບົດຫ່າງໄກສອກຫລີກ ແລະ ສິ່ງຈໍາເປັນອື່ນໆ ເພື່ອຮັບໃຊ້ໃຫ້ແກ່ ການສອນການຮຽນຕະ ຫລອດ ສົກຮຽນໃໝ່ ໃຫ້ໄດ້ຮັບຜົນດີ  ພ້ອມທັງມີມາດຕະການປ້ອງກັນເຊື້ອພະຍາດ COVID-19 ຢ່າງເຂັ້ມງວດ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)