ກະຊວງໄປສະນີ, ໂທລະຄົມມະນາຄົມ ແລະ ການສື່ສານ ໄດ້ອອກຄຳແນະນຳ ສະບັບເລກທີ 1561/ປທສ ລົງວັນທີ 26 ສິງຫາ 2020 ເຖິງບຸກຄົນ, ນິຕິບຸກຄົນ, ການຈັດຕັ້ງ ໂດຍສະເພາະຜູ້ປົກຄອງເດັກ ໃຫ້ມີຄວາມຮັບຮູ້, ເຂົ້າໃຈກ່ຽວກັບກົດໝາຍ ແລະ ລະບຽບການໃນການນຳໃຊ້ ສື່ສັງຄົມອອນລາຍ ໃຫ້ມີຄວາມປອດໄພ ແນໃສ່ປົກປ້ອງກຽດສັກສີ ແລະ ຜົນປະໂຫຍດອັນຊອບທຳ ຂອງຜູ້ນຳໃຊ້ສື່ສັງ ຄົມອອນລາຍ ທັງນີ້ ກໍເພື່ອຮັບປະກັນ ຄວາມສະຫງົບ ແລະ ຄວາມເປັນລະບຽບຮຽບຮ້ອຍ ຂອງສັງຄົມ. ທັງປະກອບສ່ວນເຂົ້າໃນ ພາລະກິດປົກປັກຮັກສາ ແລະ ສ້າງສາພັດທະນາ ປະເທດຊາດ.

ປັດຈຸບັນ ການນຳໃຊ້ສື່ສັງຄົມອອນລາຍ ເປັນພາຫະສື່ສານຍຸກໃໝ່ ເພື່ອເຜີຍແຜ່ຂໍ້ມູນຂ່າວສານ ຄວາມຄິດເຫັນຂອງຕົນເອງ ໃຫ້ຜູ້ອື່ນ ເຊິ່ງເປັນວິທີທີ່ໄວ ແລະ ໄປເຖິງຫລາຍຄົນພ້ອມກັນ, ແຕ່ເຖິງຢ່າງໃດກໍຕາມ ສື່ສັງຄົມອອນລາຍ ກໍປຽບເໝືອນດັ່ງມີດສອງຄົມ ມີທັງຜົນປະໂຫຍດ ແລະ ຜົນເສຍ. ເພື່ອເຮັດໃຫ້ການ ນຳໃຊ້ສື່ສັງຄົມອອນລາຍ ໃຫ້ມີຄວາມປອດໄພ ເປັນຕົ້ນແມ່ນ: ການເຜີຍແຜ່ຮູບພາບ, ພາບເຄື່ອນໄຫວ, ເອກະສານເອ ເລັກໂຕຣນິກ, ສຽງ, ວີດີໂອ ແລະ ຂໍ້ຄວາມຜ່ານເວັບໄຊ ແລະ ແອັບພີເຄຊັ່ນ ເຊັ່ນ: ເຟສບຸກ, ທະວິດເຕີ, ຢູທູບ ແລະ ອື່ນໆ, ຄຳແນະນຳດັ່ງກ່າວ ຈຶ່ງໄດ້ເນັ້ນໃຫ້ຜູ້ທີ່ນຳໃຊ້ ສື່ສັງຄົມອອນລາຍ ໃຫ້ຕັ້ງລະຫັດທີ່ມີຄວາມຊັບຊ້ອນ ແລະ ຄາດເດົາໄດ້ຍາກ,​ ຄວນປ່ຽນລະຫັດຜ່ານ ຢ່າງໜ້ອຍ 3 ເດືອນ/ຄັ້ງ, ຄວນກຳນົດການລັອກອິນ ໃນຮູບແບບສອງຂັ້ນ, ຄວນຕັ້ງຄ່າຄວາມເປັນສ່ວນຕົວ ແລະ ອື່ນໆ ເພື່ອປ້ອງກັນການຕິດຕາມ ແລະ ການເກັບກຳຂໍ້ມູນ ຈາກຜູ້ບໍ່ຫວັງດີ.

ພ້ອມກັນນັ້ນ ກໍໄດ້ເນັ້ນໃຫ້ຜູ້ນຳໃຊ້ ສື່ສັງຄົມອອນລາຍ ຄວນສຶກສານິຕິກຳ ແລະ ລະບຽບການຂອງສື່ສັງຄົມອອນລາຍ ໃຫ້ເຂົ້າໃຈເລິກເຊິ່ງ, ຄວນຄິດໃຫ້ລອບຄອບ ກ່ອນທີ່ຈະໂພສລົງ, ຄວນວິເຄາະ, ກັ່ນຕອງ ແລະ ໃຊ້ວິຈາລະນະຍານ ໃນການຮັບຂໍ້ມູນຂ່າວສານ ແລະ ແບ່ງປັນ, ຄວນພິຈາລະນາ ໃນການຮັບ ບຸກຄົນແປກໜ້າເປັນເພື່ອນ, ຄວນລະມັດລະວັງ ໃນການໂຄສະນາຊວນເຊື່ອຕ່າງໆ, ຄວນລະມັດລະວັງ ໃນການສະແດງ ຄວາມຄິດເຫັນທຸກຄັ້ງ ແລະ ຄວນມີສະຕິໃນການບໍລິໂພກ ຂໍ້ມູນຂ່າວສານຜ່ານສື່ ສັງຄົມອອນລາຍທຸກຄັ້ງ.

ປັດຈຸບັນ, ສູນສະກັດກັ້ນ ແລະ ແກ້ໄຂເຫດສຸກເສີນທາງຄອມພິວເຕີ ເຊິ່ງເປັນສູນກາງປະສານງານ ພາຍໃນ ແລະ ຕ່າງປະເທດ ຍິນດີຮັບແຈ້ງເຫດ ແລະ ໃຫ້ຄຳປຶກສາທາງ ດ້ານເຕັກນິກວິຊາການ ໃນການແກ້ໄຂບັນຫາ ຄວາມເສຍຫາຍ ທີ່ເກີດຂຶ້ນກັບລະບົບຄອມພິວເຕີ ແລະ ສື່ສັງຄົມອອນລາຍ. ຕິດຕໍ່ໄດ້ທີ່ (+856-21)254508,(+856-30576422) ອີເມວ: report@laocert.gov.la ແລະ www.laocert.gov.la

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)