ໃນຕອນແລງ ວັນທີ 2 ກັນຍາ 2020 ທີ່ກະຊວງຖະແຫລງຂ່າວ ວັດທະນະທຳ ແລະ ທ່ອງທ່ຽວ, ທ່ານ ສາດສະດາຈານ ປອ. ກິແກ້ວ ໄຂຄໍາພິທູນ, ລັດຖະມົນຕີກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ແຫ່ງ ສປປ ລາວໄດ້ຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ ດຣ. ເພຍ ຣີແບນໂລ ບຣິດໂຕ (Dr Pia Rebello Britto), ຜູ້ຕາງໜ້າຂອງອົງການຢູນີເຊັບ (UNICEF)ຄົນໃໝ່ ປະຈຳ ສປປ ລາວ.

ພະນະທ່ານ ສາດສະດາຈານ ປອ. ກິແກ້ວ ໄຂຄໍາພິທູນ ໄດ້ສະແດງຄວາມຍິນດີ ຕ້ອນຮັບອັນອົບອຸ່ນມາຍັງ ທ່ານຜູ້ຕາງໜ້າອົງການຢູນີເຊັບ ຄົນໃໝ່ ປະຈໍາ ສປປ ລາວ. ທ່ານສະແດງຄວາມຂອບໃຈເປັນຢ່າງສູງຕໍ່ການຊ່ວຍເຫຼືອຂອງອົງການຢູນີເຊັບຕໍ່ລັດຖະບານແຫ່ງສປປລາວ. ອົງການຢູນີເຊັບໄດ້ຈັດຕັ້ງປະຕິບັດບັນດາໂຄງການຢ່າງໃກ້ຊິດກັບ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວເປັນເວລາຫຼາຍກວ່າສອງທົດສະວັດເພື່ອສ້າງຄວາມເຂັ້ມແຂງແກ່ສື່ມວນຊົນລາວ ແລະ ດ້ານການສື່ສານດ້ວຍເຕັກໂນໂລຢີ.

ໃນໂອກາດດັ່ງກ່າວ ທ່ານ ສາດສະດາຈານ ປອ. ກິແກ້ວ ໄຂຄໍາພິທູນ ໄດ້ກ່າວເຖິງບົດບາດຄວາມສຳຄັນຂອງສື່ທີ່ເປັນກະບອກສຽງ ນຳເອົາຂໍ້ມູນຂ່າວສານໄປຮອດໄປເຖິງປະຊາຊົນ ເປັນພາຫະນະສື່ຕ່າງໆຢ່າງກ້ວາງຂວາງໂດຍສະເພາະຂໍ້ມູນຂ່າວສານເລື່ອງ ສິດທິເດັກ ແລະ ແມ່ຍິງ ທີ່ພວກເຮົາໄດ້ມີການຮ່ວມມືກັບທາງອົງການ ຢູນີເຊັບ (UNICEF) ຕະຫລອດມາ
“ພວກຂ້າພະເຈົ້າ ມີຄວາມພາກພູມໃຈທີ່ໄດ້ຮັບການສະໜັບສະໜູນຈາກອົງການຢູນີເຊັບ ຕໍ່ໂຄງການການສື່ສານຂອງພວກຂ້າພະເຈົ້າເພື່ອປະກອບສ່ວນເຂົ້າໃນເປົ້າໝາຍການຫລຸດພົ້ນຈາກສະຖານະພາບປະເທດກໍາລັງພັດທະນາ”.

ໄລຍະເວລາຫຼາຍກວ່າ 20 ປີທີອົງການຢູນີເຊັບ ແລະກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວໄດ້ຮ່ວມມືກັນເສີມຂະຫຍາຍທັກສະຄວາມສາມາດຂອງສື່ມວນຊົນລາວ ໂດຍການລິເລີ່ມໂຄງການໂທລະພາບ ສຳລັບເດັກກ່ອນໄວຮຽນ, ລິເລິ້ມໂຄງການ ວິທະຍຸໄວໜຸ່ມ ແລະ ສື່ດີຈີຕອນ. ເມື່ອບໍ່ດົນມານີ້, ອົງການຢູນີເຊັບ ແລະ ລັດຖະບານລາວໄດ້ຮ່ວມມືກັນ ໂຄສະນາເຜີຍແຜ່ຂໍ້ມູນ ຂ່າວສານ ກ່ຽວກັບການປ້ອງກັນແລະຄວບຄຸມພະຍາດໂຄວິດ 19 ໃນສປປລາວ.
ທ່ານ ປອ. ບຣິດໂຕກ່າວວ່າ “ຂ້າພະເຈົ້າຂໍຖືໂອກາດນີ້ເປັນກຽດຊົມເຊີຍກະຊວງຖະແຫລງຂ່າວ, ວັດທະນະທຳ ແລະທ່ອງທ່ຽວ ເນື່ອງໃນໂອກາດວັນຄົບຮອບ 70 ປີ ຂອງ ສື່ມວນຊົນລາວ ແລະ ວັນພິມຈໍາໜ່າຍ”. ຜູ້ຕາງໜ້າ ອົງການຢູນີເຊັບຄົນໃໝ່ໄດ້ເຫນັ້ນຫນັກວ່າ: “ອົງການຢູນີເຊັບມີປະຫວັດ ການຮ່ວມມືອັນຍາວນານ ກັບ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ແລະ ຂ້າພະເຈົ້າຫມັ້ນໃຈວ່າການຮ່ວມມືຂອງອົງການ ແລະ ລັດຖະບານຈະສືບຕໍ່ຢ່າງເຂັ້ມແຂງຂື້ນເລື້ອຍໆ”.

ດ້ວຍການຮ່ວມມືຢ່າງແໜ້ນແຟ້ນກັບລັດຖະບານແຫ່ງ ສປປ ລາວ, ໂດຍສະເພາະແມ່ນ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວພ້ອມກັບບັນດາຄູ່ຮ່ວມງານ, ທ່ານ ປອ ເພຍ ເຣເບໂລ ບຣິດໂຕເຊື່ອໝັ້ນວ່າຈຸດປະສົງຂອງແຜນງານການຮ່ວມມືໃໝ່ປີ 2017-2021 ຈະບັນລຸໝາກຜົນ, ໂດຍສະເພາະການສົ່ງເສີມ ການເປັນຢູ່ ທີ່ດີ ຂອງແມ່ ແລະ ເດັກ ແລະ ການພັດທະນາ ຄົນລາວ ປີ 2030.