ໃນຕອນເຊົ້າວັນທີ 2 ກັນຍາ 2020 ທີ່ ກະຊວງແຮງງານ ແລະ ສະຫວັດດີການສັງຄົົມ, ທ່ານ ປອ ຄຳແພງ ໄຊສົມແພງ, ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ ໄດ້ຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ ດຣ. ເພຍ ຣີແບນໂລ ບຣິດໂຕ (Dr Pia Rebello Britto), ຜູ້ຕາງໜ້າຂອງອົງການຢູນີເຊັບ (UNICEF) ຄົນໃໝ່ ປະຈຳ ສປປ ລາວ.

ໃນໂອກາດນີ້, ທ່ານ ປອ ຄຳແພງ ໄຊສົມແພງ, ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ, ໄດ້ສະແດງຄວາມຍິນດີຕ້ອນຮັບອັນອົບອຸ່ນມາຍັງ ທ່ານຜູ້ຕາງໜ້າຂອງອົງການ UNICEF ຄົນໃໝ່ ປະຈຳ ສປປ ລາວ, ພ້ອມທັງສະແດງຄວາມຂອບໃຈຕໍ່ການຮ່ວມມື ແລະ ການຊ່ວຍເຫຼືອຂອງອົງການ UNICEF ຕໍ່ ສປປ ລາວ ໃນໄລຍະຜ່ານ ໂດຍສະເພາະ ວຽກງານປົກປ້ອງເດັກ.

ທ່ານ ປອ ຄຳແພງ ໄຊສົມແພງ ໄດ້ກ່າວເຖິງ ຄວາມຄືບຫນ້າ ແລະ ສິ່ງທ້າທາຍໆ ໃນວຽກງານປົກປ້ອງເດັກ. ທ່ານກ່າວວ່າ: “ການແຕ່ງງານກ່ອນໄວອັນຄວນ, ເດັກຊົນເຜົ່າບໍ່ເຂົ້າໃຈພາສາລາວ ແມ່ນສົ່ງຜົນກະທົບ ຕໍ່ການພັດທະນາເດັກ. ບັນຫາໄພພິບັດ ຕົວຢ່າງ ນໍ້າຖ້ວມ ຢູ່ ເມືອງສະຫນາມໄຊ, ແຂວງອັດຕະປື ໃນ ປີ 2018 ແມ່ນເຮັດໃຫ້ ເດັກພັດພາກຈາກຄອບຄົວ ແລະ ຂາດທີ່ຢູ່ອາໃສ. ການຄ້າມະນຸດ ກໍແມ່ນ ສິ່ງທ້າທາຍອັນຫນຶ່ງ ທີ່ຕ້ອງ ຮີບຮ້ອນແກ້ໄຂ. ໃນໄລຍະການລະບາດ ຂອງພະຍາດໂຄວິດ 19 ເດັກນ້ອຍລາວ ແມ່ນໄດ້ຮັບຜົນກະທົບ ຫລາຍສົມຄວນ.” ທ່ານກ່າວຕໍ່ໄປວ່າ “ລັດຖະບານ ສປປ ລາວ, ໂດຍສະເພາະ ກະຊວງ ແຮງງານ, ສະຫວັດດີການ ແລະ ສັງຄົມ ໄດ້ຮ່ວມກັບ ອົງການຈັດຕັ້ງສາກົນ, ລວມທັງອົງການຢູນີເຊັບ ແກ້ໄຂສິ່ງທ້າທາຍດັ່ງການ ສຳເລັດໃນລະດັບຫນ້າພໍໃຈ ແຕ່ກໍ່ຍັງຕ້ອງສືບຕໍ່ຮ່ວມມືກັນຫລາຍຂື້ນໃນຕໍ່ຫນ້າ. ຜ່ານມາ ອົງການຢູນີເຊັບ ໄດ້ຊ່ວຍເຫລືອ ລັດຖະບານ ຢ່າງຫລວງຫລາຍ ແລະ ຫວັງວ່າ ໃນຕໍ່ຫນ້າ ຈະໄດ້ຮັບການຊ່ວຍເຫລືອເພິ້ມຂື້ນ”

ໃນໂອກາດ ເຂົ້າຢ້ຽມຂໍ່ານັບ, ທ່ານ ດຣ ເພຍ ຣີແບນໂລ ບຣິດໂຕ ໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ຂອງ ທ່ານ ປອ ຄຳແພງ ໄຊສົມແພງ, ລັດຖະມົນຕີ ກະວງແຮງງານ ສະຫວັດດີການ ແລະ ສັງຄົມ ແລະ ຢືນຢັນວ່າ: “ອົງການ UNICEF ຈະສືບຕໍ່ໃຫ້ການຮ່ວມມືຢ່າງເຕັມສ່ວນກັບ ລັດຖະບານ ສປປ ລາວ, ໂດຍສະເພາະ ກະຊວງແຮງງານ ແລະ ສະຫວັດດີການສັງຄົມ, ໃນການຈັດຕັ້ງປະຕິບັດແຜນງານການຮ່ວມມື ໃຫ້ໄດ້ຮັບໝາກຜົນສູງສຸດ.” ທ່ານຍັງເຫນັ້ນຫນັກອີກວ່າ: “ວຽກງງານປົກປ້ອງເດັກ ແມ່ນຫນຶ່ງໃນ ບູລິມະສິດ ສໍາລັບການພັດທະນາເດັກ. ອົງການຢູນີເຊັບ ຈະສືບຕໍ່ຮ່ວມມື ກັບກະຊວງ ແຮງງານ ແລະ ສະຫວັດດີການ ສັງຄົມ ໃນການສ້າງຄວາມເຂັ້ມແຂງ ໃຫ້ແກ່ລະບົບປົກປ້ອງເດັກ ໃນ ສປປ ລາວ ໃຫ້ມິ ປະສິດຕິພາບຂື້ນ ເພື່ອປະກອບສ່ວນເຂົ້າໃຫນການພັດທະນາ ເສດຖະກິດ ສັງຄົມຂອງປະເທດ.