ລາວ ຍັງບໍ່ພົບຜູ້ຕິດເຊື້ອໂຄວິດ-19 ເພີ່ມ ແຕ່ຍັງສືບຕໍ່ປະຕິບັດບາງມາດຕະການປ້ອງກັນ

0
52

ຄະນະສະເພາະກິດ ເພື່ອປ້ອງກັນຄວບຄຸມ ແລະ ແກ້ໄຂພະຍາດ​ອັກ​ເສບ​ປອດ ​ທີ່​ເກີດ​ຈາກ​ເຊື້ອຈຸລະ​ໂລກ​ສາຍ​ພັນໃໝ່ ໂຄ​ວິດ-19 ຢືນຢັນ​ວ່າ: ມາ​ຮອດ​ວັນ​ທີ 2 ກັນຍາ 2020 ນີ້, ສປປ ລາວ ຍັງ​ບໍ່​ພົບ​ຜູ້​ຕິດ​ເຊື້ອ​ໂຄ​ວິດ-19 ​ເພີ່ມ​ຂຶ້ນ, ຕົວ​ເລກສະ​ສົມ​ຍັງ​ຢູ່ 22 ກໍລະນີ, ສືບ​ຕໍ່​ປິ່ນ​ປົວ​ຢູ່​ໂຮງໝໍ 1 ກໍລະນີ, ເຊິ່ງ​ຢູ່ໃນ​ກຸ່ມ​ປະ​ເທດ​ອາ​ຊຽນ ມາຮອດວັນທີ 2 ກັນຍາ 2020 ມີຜູ້ຕິດເຊື້ອທັງ​ໝົດ 473.861 ຄົນ, ເສຍຊີວິດ 11.358 ຄົນ. ສ່ວນຢູ່ຂົງເຂດອາຊີ ແມ່ນປະເທດອິນເດຍ ມີທ່າອ່ຽງໃນການຕິດເຊື້ອເພີ່ມຂຶ້ນ, ຈຳນວນຜູ້ຕິດເຊື້ອມື້ດຽວສູງເຖິງ 78.169 ຄົນ.

ທ່ານ ນາງ ພອນປະເສີດ ໄຊຍະມຸງຄຸນ ຮອງຫົວໜ້າກົມຄວບຄຸມພະຍາດຕິດຕໍ່ ກະຊວງ​ສາ ທາລະນະ​ສຸກ ​​ລາຍ​ງານ​ໃຫ້​ຮູ້​ວ່າ: ມາ​ຮອດ​ວັນທີ 1 ກັນ​ຍາ ມີຜູ້ເດີນທາງເຂົ້າມາ ໃນປະເທດ ຜ່ານຈຸດຊາຍແດນຕ່າງໆ ທັງໝົດ 1.916 ຄົນ ໃນນັ້ນ ຜ່ານດ່ານລາວ-ໄທ 1.110 ຄົນ, ຜ່ານດ່ານ ລາວ-ຈີນ 86 ຄົນ, ດ່ານລາວ-ຫວຽດນາມ 713 ຄົນ, ດ່ານ​ລາວ-​ມຽນມາ 7 ຄົນ, ທັງໝົດໄດ້ແທກອຸນຫະພູມຮ່າງກາຍ, ບໍ່ມີອາການເປັນໄຂ້ ແລະ ໄດ້ເກັບຕົວຢ່າງທັງໝົດມາກວດ ເພື່ອຊອກຫາເຊື້ອ ໂຄວິດ-19 ຈາກນັ້ນໄດ້ນຳສົ່ງ ໄປສະຖານທີ່ຈຳກັດບໍລິເວນ 14 ວັນ. ​ໃນ​ວັນ​ດຽວກັນ ກໍໄດ້ເກັບຕົວຢ່າງມາກວດວິ ເຄາະທັງໝົດ  236 ຄົນ, ໃນນັ້ນແຮງງານລາວມາແຕ່ໄທ 138 ຕົວຢ່າງ, ແຮງງານຈີນ 2 ຕົວຢ່າງ, ແຮງງານຫວຽດນາມ 86 ຕົວຢ່າງ, ບຸກຄົນທົ່ວໄປບໍ່ມີອາການ 10 ຕົວຢ່າງ, ຜົນກວດວິເຄາະທັງໝົດ ແມ່ນບໍ່ພົບເຊື້ອ,   ສັງລວມການກວດວິເຄາະ ແຕ່ເດືອນມັງກອນ ຮອດ ວັນທີ 1 ກັນຍາ  2020 ໄດ້ເກັບຕົວຢ່າງມາກວດທັງໝົດ  39.696 ຕົວຢ່າງ, ກວດພົບເຊື້ອສະສົມ 22 ຄົນ.

ຢ່າງ​ໃດ​ກໍ​ຕາມ ​ເຖິງ​ແມ່ນ​ວ່າ ສປປ ລາວ ຈະ​ບໍ່​ຜູ້​ຕິດ​ເຊື້ອ​ ໂຄ​ວິດ-19 ​ເພີ່ມ​ຂຶ້ນ​ກໍ່​ຕາມ ​ໃຫ້ປະ ຊາຊົນລາວ​ບັນດາ​ເຜົ່າ ໃນ​ຂອບ​ເຂ​ດທົ່ວ​ປະ​ເທດ ​ສືບຕໍ່ປະຕິບັດບາງ​ມາດ​ຕະການ ​ປ້ອງ​ກັນ​ການ​ຕິດ​ເຊື້ອ ຢ່າງ​ເຄັ່ງ​ຄັດ​​ເປັນ​ຕົ້ນ ປະຕິບັດການດຳລົງຊີວິດ ປົກກະຕິແບບໃໝ່ ໃຫ້ກາຍເປັນຄວາມຊິນເຄີຍ ເປັນຕົ້ນ ອອກຈາກບ້ານ ເມື່ອມີຄວາມຈຳເປັນ, ເວລາອອກຈາກບ້ານ ຫລື ໄປສະຖານທີ່ ທີ່ມີຄວາມສ່ຽງຕໍ່ການຕິດເຊື້ອ ຄວນໃສ່ຜ້າປິດປາກ-ດັງ, ຮັກສາມາລະຍາດໃນການໄອ-ຈາມ, ເວລາໄອ ຫລື ຈາມ ຄວນໃຊ້ຂໍ້ພັບແຂນສອກປິດປາກ, ການລ້າງມືເລື້ອຍໆ ດ້ວຍນໍ້າສະອາດໃສ່ສະບູ ຫລື ເຈວລ້າງມື, ການປະຕິ ບັດຮັກສາໄລຍະຫ່າງ 1-2 ແມັດຂຶ້ນໄປ, ການກິນອາຫານທີ່ປຸງແຕ່ງສຸກໃໝ່ໆ, ຄວນແຍກຂອງໃຊ້ສ່ວນຕົວ ບໍ່ໃຊ້ຮ່ວມກັບຜູ້ອື່ນ, ເມື່ອກັບຮອດບ້ານຄວນອາບນ້ຳ ແລະ ປ່ຽນເສື້ອຜ້າທັນທີ ທັງໝົດນີ້ ເພື່ອສະກັດກັ້ນ ການລະບາດຂອງພະຍາດ ​ໂຄ​ວິດ-19 ບໍ່ໃຫ້ກັບຄືນມາຮອບໃໝ່.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)