ທຸກພາກສ່ວນ ຕ້ອງມີສ່ວນຮ່ວມ ພ້ອມໃຈກັນສະກັດກັ້ນ ແລະ ຕ້ານພະຍາດໄຂ້ຍຸງລາຍ ໂດຍການນຳໃຊ້ມາດຕະການ ທີ່ສຳຄັນ ໃນການຄວບຄຸມພະຍາດ ກໍຄືການຫັນເອົາຊຸມຊົນ ເປັນກຸນແຈສຳຄັນ ໃນການປ້ອງກັນ ແລະ ຄວບຄຸມພະຍາດດັ່ງກ່າວ ເປັນຕົ້ນ ການມີສ່ວນຮ່ວມ ຂອງບຸກຄົນ, ຄອບຄົວ ໃນການປະຕິບັດມາດຕະການ 5ປ ດ້ວຍຕົນເອງ, ທັງແມ່ນພາລະໜ້າທີ່ ຂອງທຸກຄອບຄົວ ຕ້ອງເປັນເຈົ້າການໃນການປະຕິບັດ ເພາະຍຸງລາຍເກີດ ແລະ ແຜ່ພັນຢູ່ນຳເຮືອນປະຊາຊົນ.

ຕາມການລາຍງານ ຂອງກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ໄດ້ລາຍງານວ່າ: ປັດຈຸບັນ ທົ່ວປະເທດມີຜູ້ຕິດເຊື້ອພະຍາດ ໄຂ້ຍຸງລາຍນັບມື້ເພີ່ມຂຶ້ນ ແລະ ເຫັນວ່າການລະບາດ ຂອງພະຍາດໄຂ້ຍຸງລາຍ ຍັງບໍ່ມີທ່າທີວ່າຈະຫລຸດລົງ, ຍິ່ງໄປກວ່ານັ້ນຍັງເຮັດໃຫ້ ມີກໍລະນີ ເສຍຊີວິດນຳອີກ. ສະ ເພາະໃນວັນທີ 31 ສິງຫາ 2020 ນີ້ ມີຜູ້ຕິດເຊື້ອພະຍາດໄຂ້ຍຸງລາຍເພີ່ມອີກ 56 ກໍລະນີ ແລະ ເສຍຊີວິດອີກ 1 ຄົນ ຢູ່ແຂວງຄໍາມ່ວນ. ຂະນະທີ່ການເຝົ້າລະວັງ ພະຍາດໄຂ້ຍຸງລາຍ ກໍລະນີສະສົມທັງໝົດແຕ່ວັນທີ 28 ທັນວາ 2019-30 ສິງຫາ 2020 ມີທັງໝົດ 5.677 ກໍລະນີ ແລະ ເສຍຊີວິດ 10 ກໍລະນີ. ມາຮອດ 31 ສິງຫາ 2020 ນີ້ ຈຳນວນຜູ້ຕິດເຊື້ອໄຂ້ຍຸງລາຍ ລວມທັງໝົດ 5.732 ກໍລະນີ ແລະ ເສຍຊີວິດລວມເປັນ 11 ຄົນ. 

ສຳລັບ ນະຄອນຫລວງວຽງຈັນ ພົບຜູ້ຕິດເຊື້ອໄຂ້ຍຸງລາຍ ຫລາຍກວ່າໝູ່ ຢູ່ທີ່ 1.326 ກໍລະນີ ແລະ ເສຍຊີວິດແລ້ວ 4 ຄົນ, ຮອງລົງມາ ແມ່ນແຂວງ ບໍລິຄຳໄຊ 676 ກໍລະນີ ແລະ ເສຍຊີວິດແລ້ວ 2 ກໍລະນີ, ແຂວງວຽງຈັນ 603 ກໍລະນີ, ສະຫວັນນະເຂດ 539 ກໍລະນີ ແລະ ເສຍຊີວິດ 1 ກໍລະນີ, ແຂວງບໍ່ແກ້ວ 564 ກໍລະນີ, ຫລວງນໍ້າທາ 377 ກໍລະນີ, ຄຳມ່ວນ 313 ກໍລະນີ ແລະ ເສຍຊີວິດແລ້ວ 2 ຄົນ, ຫລວງພະບາງ 321 ກໍລະນີ, ອັດຕະປື 295 ກໍລະນີ, ສາລະວັນ 295 ກໍລະນີ, ໄຊຍະບູລີ 175 ກໍລະນີ ແລະ ເສຍຊີວິດແລ້ວ 1 ຄົນ, ອຸດົມໄຊ 81 ກໍລະນີ, ເຊກອງ 74 ກໍລະນີ, ໄຊສົມບູນ 53 ກໍລະນີ, ຈຳປາສັກ 27 ກໍລະນີ, ຜົ້ງສາລີ 9 ກໍລະນີ, ຫົວພັນ 2 ກໍລະນີ, ຊຽງຂວາງ 2 ກໍລະນີ ແລະ ເສຍຊີວິດ 1 ກໍລະນີ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)