ໃນວັນທີ 2 ກັນຍາ 2020 ທີ່ກະຊວງແຮງງານ ແລະ ສະຫວັດດີການສັງຄົມ (ຮສສ), ທ່ານ ຄຳແພງ ໄຊສົມແພງ ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ ໄດ້ຕ້ອນ ຮັບການເຂົ້າຢ້ຽມຂໍ່ານັບ ຂອງ ທ່ານ ດຣ. ເພຍ ຣີແບນໂລ ບຣິດໂຕ (Dr Pia Rebello Britto) ຜູ້ຕາງໜ້າຂອງອົງການຢູນີເຊັບ (UNICEF) ຄົນໃໝ່ ປະຈຳ ສປປ ລາວ.

ໃນໂອກາດນີ້, ທ່ານ ຄຳແພງ ໄຊສົມແພງ ໄດ້ສະແດງຄວາມຍິນດີຕ້ອນຮັບ ອັນອົບອຸ່ນມາຍັງ ທ່ານຜູ້ຕາງໜ້າ ຂອງອົງການອຸຍນີເຊັບ ຄົນໃໝ່ປະຈຳ ສປປ ລາວ, ພ້ອມທັງສະແດງ ຄວາມຂອບໃຈຕໍ່ການຮ່ວມມື ແລະ ການຊ່ວຍເຫລືອຂອງອົງການອຸຍນີເຊັບຕໍ່ ສປປ ລາວ ໃນໄລຍະຜ່ານ ໂດຍສະເພາະວຽກງານປົກປ້ອງເດັກ. ທ່ານກ່າວວ່າ: “ການແຕ່ງງານ ກ່ອນໄວອັນຄວນ, ເດັກຊົນເຜົ່າບໍ່ເຂົ້າ ໃຈພາສາລາວ ແມ່ນສົ່ງຜົນກະທົບຕໍ່ ການພັດທະນາເດັກ. ບັນຫາໄພພິບັດ ຕົວຢ່າງນໍ້າຖ້ວມຢູ່ ເມືອງສະໜາມໄຊ ແຂວງອັດຕະປື ໃນປີ 2018 ແມ່ນເຮັດໃຫ້ເດັກ ພັດພາກ ຈາກຄອບຄົວ ແລະ ຂາດທີ່ຢູ່ອາໃສ.

ການຄ້າມະນຸດ ກໍແມ່ນສິ່ງທ້າທາຍອັນໜຶ່ງ ທີ່ຕ້ອງຮີບຮ້ອນແກ້ໄຂ. ໃນໄລຍະການລະບາດຂອງພະ ຍາດໂຄວິດ-19 ເດັກນ້ອຍລາວ ແມ່ນໄດ້ຮັບຜົນກະທົບ ຫລາຍສົມຄວນ. ລັດຖະບານ ສປປ ລາວ, ໂດຍສະເພາະ ກະຊວງແຮງງານ, ສະຫວັດດີການ ແລະ ສັງຄົມ ໄດ້ຮ່ວມກັບອົງການ ຈັດຕັ້ງສາກົນ, ລວມທັງອົງການຢູນີເຊັບ ແກ້ໄຂສິ່ງທ້າທາຍ ດັ່ງກ່າວ ສຳເລັດໃນລະດັບໜ້າພໍໃຈ ແຕ່ກໍ່ຍັງຕ້ອງສືບຕໍ່ຮ່ວມມື ກັນຫລາຍຂຶ້ນໃນຕໍ່ໜ້າ. ຜ່ານມາອົງການຢູນີເຊັບ ໄດ້ຊ່ວຍເຫລືອລັດຖະບານ ຢ່າງຫລວງຫລາຍ ແລະ ຫວັງວ່າໃນຕໍ່ໜ້າ ຈະໄດ້ຮັບ ການຊ່ວຍເຫລືອເພີ່ມຕື່ມ.

ໃນໂອກາດດຽວກັນນີ້, ທ່ານ ດຣ.ເພຍ ຣີແບນໂລ ບຣິດໂຕ ໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ຂອງທ່ານລັດຖະມົນຕີ ກະຊວງແຮງງານສະຫວັດດີການ ແລະ ສັງຄົມ ແລະ ຢືນຢັນວ່າ “ອົງການອຸຍນີເຊັບ ຈະສືບຕໍ່ໃຫ້ການຮ່ວມມື ຢ່າງເຕັມສ່ວນກັບລັດຖະບານ ສປປ ລາວ, ໂດຍສະເພາະ ກະຊວງແຮງງານ ແລະ ສະຫວັດດີການສັງຄົມ, ໃນການຈັດ ຕັ້ງປະຕິບັດ ແຜນງານການຮ່ວມມື ໃຫ້ໄດ້ຮັບໝາກຜົນສູງສຸດ.” ພ້ອມນີ້, ທ່ານຍັງເນັ້ນໜັກຕື່ມວ່າ: “ວຽກງງານປົກປ້ອງເດັກ ແມ່ນໜຶ່ງໃນບູລິມະສິດ ສໍາລັບການພັດທະນາເດັກ, ເຊິ່ງອົງການ ຢູນີເຊັບ ຈະສືບຕໍ່ຮ່ວມມືກັບ ກະຊວງແຮງງານ ແລະ ສະຫວັດດີການສັງຄົມ ໃນການສ້າງຄວາມເຂັ້ມແຂງ ໃຫ້ແກ່ລະບົບປົກປ້ອງເດັກ ໃນ ສປປ ລາວ ໃຫ້ມີປະສິດຕິພາບຂຶ້ນ ເພື່ອປະກອບ ສ່ວນເຂົ້າໃນ ການພັດທະນາ ເສດຖະກິດສັງຄົມ ຂອງປະເທດ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)