ວິທະຍາ​ໄລ​ເຕັກນິກ​ປາກ​ປ່າ​ສັກ ຈະ​ຮັບນັກສຶກສາ ເຂົ້າຮຽນສົກສຶກສາ 2020-2021 ທັງ​ໝົດ 4.161 ​​ຄົນ, ​ໃນ​ນັ້ນນັກ​ສຶກສາລະບົບ​ຕໍ່​ເນື່ອງ ຈະ​ຮັບ​ເອົາ 1.177 ຄົນ, ນັກຮຽນສາມັນຈົບຊັ້ນມັດທະຍົມຕອນຕົ້ນ ແລະ ຕອນປາຍ ຈະ​ຮັບ​ເອົາທັງໝົດ 2.984 ຄົນ, ​ປັດຈຸບັນ ມີ​ນັກ​ສຶກສາ​ມາ​ລົງທະບຽນ​ເຂົ້າສຳພາດ ​ແລະ ສອບ​ເສັງ ​ທັງ​ໝົດ 4.700 ກວ່າ​ຄົນf ເຊິ່ງການ​ສອບເສັງຄັດເລືອກ ຈະ​ຈັດ​ຂຶ້ນ ໃນ​ວັນ​ທີ 5  ກັນຍາ 2020 ນີ້.

ທ່ານ ກາລະຄອນ ພູມີນິດ ຮອງອຳນວຍການ ວິທະຍາໄລເຕັກນິກປາກປ່າສັກ ​ລາຍ​ງານ​ໃຫ້​ຮູ້​ໃນ​ວັນ​ທີ 1 ກັນຍາ 2020 ນີ້​ວ່າ: ວິທະຍາໄລເຕັກນິກປາກປ່າສັກ ໄດ້ຈັດຮູບແບບການຄັດເລືອກ ນັກ ຮຽນເຂົ້າຮຽນດ້ວຍ 2 ຮູບແບບ ຄື:ຮູບແບບການສໍາພາດ (ໂດຍບໍ່ໄດ້ສອບເສັງ) ​ແລະ ຮູບແບບການສອບເສັງ ​ໃນ​ນັ້ນຮູບແບບການສໍາພາດ ຈະຮັບນັກຮຽນທັງຫມົດ 665 ຄົນ, ປັດຈຸບັນມີຜູ້ມາລົງ ທະບຽນ ແລະ ສໍາພາດເຂົ້າຮຽນແລ້ວຈໍານວນ 628 ຄົນ, ປັດຈຸບັນ ສຳ​ພາດ​ແລ້ວຈຳນວນ​ໜຶ່ງ ​ແລະ ຈະສືບຕໍ່ສໍາພາດໄປຮອດວັນທີ 15 ກັນຍາ 2020, ສ່ວນຮູບແບບການສອບເສັງ ຈະຮັບທັງໝົດ 2.319 ຄົນ, ປັດຈຸບັນ ມີຜູ້ມາລົງທະບຽນເຂົ້າສອບ​ເສັງແລ້ວ 4 ພັນ​ກວ່າຄົນ. ພ້ອມ​ດຽວ​ກັນ​ນັ້ນ, ວິ ທະຍາໄລເຕັກນິກປາກປ່າສັກ ຍັງ​ມີ​ນະ​ໂຍບາຍສຳລັບ ນັກຮຽນ​ຜູ້​ທີ່​ເສັງ​ໄດ້​ຄະ​ແນນ​ດີ (ອັນ​ດັບ 1-10 ​ແມ່ນ​ ຈະ​ໄດ້​ຮຽນ​​​ຟີຈົນ​ຈົບຫລັກສູດ) ​ແລະ ສຳລັບນັກສຶກສາ ​ຍິງ ທີ່​​ເຂົ້າ​ມາ​ຮຽນ​ໃນ​ຫລັກສູດ ​ການ​ຊ່າງ ​ແມ່ນ​ຈະ​ໄດ້​ຮຽນ​ຟີຈົນ​ຈົບ​ຫລັກສູດ ​ເຊິ່ງວິທະຍາໄລເຕັກນິກປາກປ່າສັກ ໄດ້ຈັດຕັ້ງການຮຽນ-ການສອນ ໃນຫລັກສູດ 3 ລະດັບປະກາສະນິຍະບັດ ຄື: ລະດັບປະກາສະນິຍະບັດ ວິຊາຊີບຊໍານານງານ ຊັ້ນກາງ 9+3 ລວມມີ 10 ສາຂາວິຊາ, ລະດັບປະກາສະນິຍະບັດ ວິຊາຊີບເຕັກນິກ ຊັ້ນກາງ 12+2 ລວມມີ 14 ສາຂາວິຊາ, ລະດັບປະກາສະນິຍະບັດວິຊາຊີບ ຊັ້ນສູງ 12+3 ລວມມີ 6 ສາຂາວິຊາ ​ແລະ ລະ ດັບປະກາສະນິຍະບັດ ວິຊາຊີບຊັ້ນສູງຕໍ່ເນື່ອງ 12+2+1 ລວມມີ 6 ສາຂາວິຊາ.

ທ່ານ ກາລະຄອນ ພູມີນິດ ​ໃຫ້​ຮູ້​ອີກ​ວ່າ: ເພື່ອຮັບປະກັນບໍ່ໃຫ້ມີຄວາມແອອັດ ແລະ ຄວາມໂປ່ງໃສໃນການສອບເສັງ ວິທະຍາ​ໄລ ໄດ້ຂະຫຍາຍສູນສອບເສັງອອກເປັນ 3 ສູນ ຄື: ສູນສອບເສັງວິທະຍາໄລເຕັກນິກປາກປ່າສັກ, ສູນສອບເສັງໂຮງຮຽນ ມັດທະຍົມຕອນປາຍ ວຽງຈັນ-ໂຮ່ຈີມິນ ແລະ ສູນສອບເສັງໂຮງຮຽນ ມັດທະຍົມສົມບູນວຽງຈັນ ລວມຫ້ອງສອບເສັງທັງໝົດ 120 ຫ້ອງ. ພ້ອມ​ນັ້ນ, ຍັງໄດ້ຈັດຫ້ອງສອບເສັງໄວ້ພິເສດ ຢູ່ທີ່ວິທະຍາໄລ ເພື່ອແກ້ບັນຫານັກຮຽນມາຊ້າ, ຫລົງ ຫລື ບໍ່ຮູ້ສູນສອບເສັງ. ນອກ​ນັ້ນ, ວິທະຍາໄລເຕັກນິກປາກປ່າສັກ ຍັງ​ໄດ້ກຽມ​ຄວາມ​ພ້ອມ ປະຕິບັດມາດຕະການປ້ອງ​ກັນ​ ການ​ຕິດ​​ເຊື້ອໂຄວິດ-19 ໂດຍສະເພາະແມ່ນ ການຮັກສາໄລຍະຫ່າງ, ການໃຊ້ຜ້າອັດປາກ, ອັດດັງ ແລະ ການລ້າງມືດ້ວຍເຈວລ້າງມື ກ່ອນເຂົ້າຫ້ອງສໍາພາດ ແລະ ຫ້ອງສອບເສັງ.

ພ້ອມ​ນັ້ນ, ເພື່ອເຮັດໃຫ້ຜົນການສໍາພາດ ແລະ ການສອບເສັງຄັດເລືອກໄດ້ຮັບຜົນດີ ແລະ ຮັກສາໄດ້ຄວາມໂປ່ງໃສ ທາງວິທະຍາໄລ ໄດ້ມີນິຕິກໍາແຕ່ລະຂັ້ນຕອນ ໃນການກະກຽມ ແລະ ຈັດຕັ້ງປະຕິບັດໃນການສອບເສັງ ລວມເຖິງການກວດບົດສອບເສັງ ແລະ ການຊັບຊ້ອນ ປະກາດຜົນການສໍາພາດ ແລະ ສອບເສັງ ກໍໄດ້ນໍາໃຊ້ລະບົບດີ​ຈິ​ຕອນ ຫລື ລະບົບຄອມພິວເຕີ ເຂົ້າຊ່ວຍ. ສໍາລັບການປະກາດຜົນການສໍາພາດ ແລະ ສອບເສັງ ຄາດວ່າຈະປະກາດຜົນ ບໍ່ໃຫ້ກາຍວັນທີ 15 ກັນຍາ 2020 ​ແລະ ຄາດວ່າຈະ​ເລີ່​ມ​ເປີດ ​ການ​ຮຽນ-ການ​ສອນ ປີທີ 1 ທຸກລະດັບປະກາສະຍິຍະບັດ ແລະ ນັກສຶກສາທີ່ຈະຮຽນຊັ້ນສູງຕໍ່ເນື່ອງ ໃນກາງເດືອນຕຸລາ 2020 ເປັນຕົ້ນໄປ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)