ຄະນະ​ພົວພັນ​ຕ່າງປະ ເທດ​ສູນ​ກາງ​ພັກ (ຄຕພ) ໄດ້​ຈັດ​ປາຖະກະຖາ​ເລົ່າ​ມູນເຊື້ອ​ວັນ​ຢຶດ​ອໍາ​ນາດ​ທົ່ວ​ປະເທດ 23 ສິງຫາ (23/8/1945 ແລະ 23/8/1975 – 23/8/2020) ຄົບຮອບ 75 ປີ ແລະ 45 ປີ; ວັນ​ສ້າງຕັ້ງ​ແນວ​ລາວ​ສ້າງ​ຊາດ ຄົບຮອບ 70 ປີ (13/8/1950 – 13/8/2020) ຂຶ້ນໃນ​ວັນ​ທີ 3 ກັນຍາ 2020 ທີ່ຫ້ອງ​ປະຊຸມ ຄຕພ. ສະຫາຍ ນາງ ສູນ​ທອນ ໄຊ​ຍະ​ຈັກ ກໍາ​ມະ​ການ​ສູນ​ກາງ​ພັກ ເລຂາ​ຄະນະ​ພັກ  ຫົວໜ້າ ຄຕພ ໄດ້​ໃຫ້​ກຽດ​ປາຖະກະຖາ ໂດຍ​ມີ​ບັນດາ​ສະຫາຍ ໃນ​ຄະນະ​ບໍລິຫານ​ງານ​ພັກ, ຄະນະ​ກົມ, ພະ​ແນກ, ສະມາຊິກ​ພັກ, ພະນັກງານ​ຫຼັກ​ແຫຼ່ງ ທົ່ວ​ຄະນະ​ພົວພັນ​ຕ່າງປະເທດ​ສູນ​ກາງ​ພັກ ເຂົ້າ​ຮ່ວມ​ຢ່າງ​ພ້ອມ​ພຽງ.

ໃນ​ການ​ປາຖະກະຖາ​ຄັ້ງ​ນີ້ ສະຫາຍ ຫົວໜ້າ ຄຕພ ໄດ້​ຫວນ​ຄືນ​ຄວາມ​ເປັນ​ມາ ຂອງ​ການ​ຢຶດ​ອໍາ​ນາດ​ເດືອນ ສິງຫາ ປີ 1945 ແລະ ການ​ຢຶດ​ອໍານາດ 23 ສິງຫາ ປີ 1975 ໂດຍ​ໄດ້ ຊີ້​ໃຫ້​ເຫັນ​ປະຫວັດສາດ​ແຫ່ງ​ ການ​ຕໍ່ສູ້​ທີ່​ຍືດ​ເຍື້ອ​ຍາວ​ນານ, ທໍ ລະ​ຫົດ​ອົດທົນ ຂອງ​ປະຊາຊົນ​ລາວ ພາຍ​ໃຕ້​ການ​ນໍາ​ພາ​ອັນ​ສະຫຼາດ​ສ່ອງ​ໃສ, ຖືກຕ້ອງ  ແລະ ປະດິດ​ສ້າງຂອງ​ພັກ​ເຮົາ​ເຮັດ​ ໃຫ້​ປະຊາຊົນ​ລາວ ໄດ້​ກາຍ ເປັນ​ເຈົ້າ​ຂອງ​ປະເທດ​ຊາດ​ຢ່າງ​ ແທ້​ຈິງ.

ຈາກ​ນັ້ນ, ສະຫາຍ ກໍ​ໄດ້​ ສືບຕໍ່​ຫວນ​ຄືນ​ມູນເຊື້ອການ ​ເຕີບ​ໃຫຍ່​ຂະຫຍາຍຕົວ, ມູນ ເຊື້ອ​ອັນ​ສະຫງ່າ​ງາມ ແລະ ຜົນ ງານ​ທີ່​ພົ້ນ​ເດັ່ນຂອງ​ແນວ​ລາວ​ສ້າງ​ຊາດ ຕະຫຼອດ​ໄລຍະ 70 ປີ ຜ່ານ​ມາ ໃນ​ການ​ປະຕິບັດ​ບົດບາດ​ໜ້າທີ່​ເປັນ​ຄັນ​ທຸງ​ໃນ​ການ​ສຶກສາ​ອົບຮົມ,  ເຕົ້າໂຮມ​ຄວາມ​ສາມັກຄີ​ປະຊາຊົນ​ບັນດາ​ຊັ້ນ​ຄົນ ແລະ ເຜົ່າ​ຕ່າງໆ​ສ້າງ​ເປັນ​ກ້ອນ​ກໍາ​ລັງ​ແຮງ​ສັງ​ລວມ​ປະກອບສ່ວນ​ຢ່າງ​ຕັ້ງໜ້າ ເຂົ້າ​ໃນ​ຂະບວນ​ການ​ຕໍ່ສູ້​ກູ້​ຊາດ ຕ້ານ​ພວກ​ຈັກກະພັດລ່າ ​ເມືອງ​ຂຶ້ນ​ໃນ​ເມື່ອ​ກ່ອນ ແລະ ພາລະກິດ​ປົກ​ປັກ​ຮັກສາສ້າງ ສາ​ພັດທະນາ​ປະເທດ​ຊາດ ໃນ​ປັດ​ຈຸ​ບັນ.

ການ​ປາຖະກະຖາ​ໃນ​ຄັ້ງ​ນີ້ ໄດ້​ເປັນ​ໂອກາດ​ທີ່​ດີ ຊ່ວຍ​ໃຫ້​ພະນັກງານ​ທົ່ວ ຄຕພ ໄດ້​ເຂົ້າໃຈ​ຕື່ມ ກ່ຽວ​ກັບ ມູນເຊື້ອ​ປະຕິວັດ, ການ​ຕໍ່ສູ້​ອັນ​ລະ​ອິດ​ລະ​ອ້ຽວ​ຂອງ ປະຊາຊົນ​ລາວ ເພື່ອ​ຍາດ​ເອົາ​ເອກະລາດ​ແຫ່ງ​ຊາດ; ໄດ້​ເຂົ້າໃຈ​ແຈ້ງ​ຕື່ມ​ເຖິງ​ປະຫວັດ​ຄວາມ​ເປັນ​ມາ ແລະ ການ​ເຕີບ​ໃຫຍ່​ຂະຫຍາຍຕົວ​ຂອງ ແນວ​ລາວ​ສ້າງ​ຊາດ; ຄວາມ​ສຳຄັນ​ຂອງ​ມູນເຊື້ອ​ຄວາມ​ສາມັກຄີ ຂອງ​ປະຊາຊົນ​ບັນດາເຜົ່າ ແລະ ການ​ເຕີບ​ໃຫຍ່​ຂະຫຍາຍຕົວຂອງ​ອົງການ​ດັ່ງກ່າວ​ໃນປັດ​ຈຸ​ບັນ. 

Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)