ໃນວັນທີ 4 ກັນຍາ 2020 ທີ່ຫ້ອງວ່າການປະທານປະເທດ, ໄດ້ຈັດຕັ້ງເຜີຍແຜ່ 2 ເອ ກະສານສໍາຄັນຂອງຊາດ ຄື: ວັນສ້າງຕັ້ງແນວລາວສ້າງຊາດ ຄົບຮອບ 70 ປີ ແລະ ວັນຍຶດອຳນາດ 23 ສິງຫາ 1945 ຄົບຮອບ 75 ປີ ແລະ 23 ສິງຫາ 1975 ຄົບຮອບ 45 ປີ, ໂດຍການເຂົ້າຮ່ວມຂອງທ່ານ ຄໍາເມິງ ພົງທະດີ ລັດຖະມົນຕີ, ຫົວໜ້າຫ້ອງວ່າການ ປະທານປະເທດ, ມີຄະນະພັກ-ຄະນະນໍາ ແລະ ພະນັກງານ-ລັດຖະກອນ ພາຍໃນຫ້ອງວ່າການ ປະທານປະເທດເຂົ້າຮ່ວມ.

ໃນໂອກາດນີ້, ທ່ານ ຄໍາໃບ ດໍາລັດ ຮອງປະທານສູນກາງແນວລາວສ້າງຊາດ ໄດ້ຂຶ້ນເຜີຍແຜ່ວັນສ້າງຕັ້ງແນວລາວສ້າງຊາດ, ເຊິ່ງໄດ້ຍົກໃຫ້ເຫັນເງື່ອນໄຂ, ສະພາບການກຳເນີດ ແລະ ການເຕີບໃຫຍ່ຂະຫຍາຍຕົວ ຂອງອົງການແນວລາວສ້າງຊາດ, ໂດຍໃນໄລຍະຕົ້ນສະຕະວັດທີ 20 ປະເທດລາວເຮົາໄດ້ຖືກພວກ ຈັກກະພັດເຂົ້າມາຮຸກຮານ, ຢຶດຄອງເອົາເປັນຫົວເມືອງຂຶ້ນ, ໂດຍບໍ່ຍອມເປັນຂ້ອຍຂ້າ ມ້າໃຊ້ໃຫ້ແກ່ຕ່າງຊາດ ປະຊາຊົນບັນດາເຜົ່າໄດ້ລຸກຮື້ຂຶ້ນ ຕໍ່ສູ້ດ້ວຍອາວຸດທີ່ຫລ້າສະໄໝ, ຂາດຄວາມເປັນປຶກແຜ່ນ ຈຶ່ງເຮັດໃຫ້ການຕໍ່ສູ້ຖືກ ປາບປາມຢ່າງໂຫດຮ້າຍປ່າເຖື່ອນ, ຈົນມາຮອດປີ 1930 ພັກກອມມູນິດອິນດູຈີນ ໄດ້ຮັບການສ້າງຕັ້ງຂຶ້ນ ເພື່ອປຸກລະດົມມະຫາຊົນຢູ່ຊົນນະບົດ, ຕົວເມືອງໃຫຍ່ເຂົ້າຮ່ວມ ຂະບວນການຕໍ່ຕ້ານ ພວກລ່າເມືອງຂຶ້ນ ຢູ່ທົ່ວທຸກພາກຂອງປະເທດ ຈົນກ້າວໄປສູ່ການຢຶດອຳນາດ 23 ສິງຫາ 1945 ແລະ ປະກາດເອກະລາດ 12 ຕຸລາ 1945 ມາຮອດວັນທີ 13 ສິງຫາ 1950 ກອງປະຊຸມໃຫຍ່ ຜູ້ແທນແນວລາວຕໍ່ຕ້ານ ທົ່ວປະເທດໄດ້ໄຂຂຶ້ນ ທີ່ຕວຽນກວາງ ສສ.ຫວຽດນາມ, ກອງປະຊຸມໄດ້ປະກາດສ້າງຕັ້ງ“ແນວລາວອິດສະຫລະ” ໂດຍແມ່ນສະເດັດເຈົ້າ ສຸພານຸວົງ ເປັນປະທານສູນກາງ ແນວລາວອິດສະຫລະ. ກອງປະຊຸມໄດ້ຕົກລົງເປັນເອກະພາບ ກ່ຽວກັບຊື່ຂອງປະເທດແມ່ນປະເທດລາວ, ຕົກລົງເອົາທຸງວົງເດືອນ ເຊິ່ງເປັນທຸງລາວອິດ ສະຫລະເປັນທຸງຊາດ ແລະ ຮັບຮອງເອົາທຳນອງ ເພງຊາດແຕ່ງໂດຍ ທ່ານ ທອງດີ ແລະ ເນື້ອຮ້ອງແຕ່ງໂດຍ ທ່ານ ສີຊະນະ ສີສານ ແລະຮັບຮອງເອົາກາໝາຍຊາດ. ມາຮອດປີ 1956 ໄດ້ປ່ຽນຊື່ຈາກແນວລາວອິດສະຫລະ ມາເປັນ“ແນວລາວຮັກຊາດ” ໂດຍແມ່ນສະເດັດເຈົ້າສຸພານຸວົງ ເປັນປະທານຈົນມາເຖິງ ເດືອນກຸມພາ 1979 ກອງປະ ຊຸມໄດ້ມີມະຕິປ່ຽນຊື່ ແນວລາວຮັກຊາດ ມາເປັນ“ແນວລາວສ້າງຊາດ” ຈົນມາຮອດປັດຈຸບັນ.

ຈາກນັ້ນ, ທ່ານພົນຈັດຕະວາ ຄໍາຫອມ ແສງບົວລົມ ວິລະຊົນແຫ່ງຊາດ, ຮອງປະທານສະ ຫະພັນນັກຮົບເກົ່າແຫ່ງຊາດ ໄດ້ຂຶ້ນເລົ່າຄືນປະຫວັດຄວາມເປັນມາ ຂອງວັນຍຶດອຳນາດ ເດືອນສິງຫາ 1945 ເພື່ອຫລຸດພົ້ນອອກຈາກ ແອກປົກຄອງຂອງພວກ ລ່າເມືອງຂຶ້ນແບບເກົ່າ ຂອງປະຊາຊົນລາວທົ່ວປະເທດ ຢູ່ຕາມຕົວເມືອງໃຫຍ່ ເຊັ່ນ: ວຽງຈັນ, ສະຫວັນນະເຂດ ເພື່ອສ້າງຕັ້ງອຳນາດການປົກຄອງ ຂອງຕົນຂຶ້ນຢູ່ຫລາຍທ້ອງຖິ່ນ ຈົນໄດ້ປະກາດຄວາມເປັນ ເອກະລາດຂອງຊາດ ໃນຕໍ່ໜ້າມວນຊົນໃນວັນທີ 12 ຕຸລາ 1945. ພາຍຫລັງຈັກກະພັດລ່າ ເມືອງຂຶ້ນແບບເກົ່າຖືກປະລາໄຊ ຈັກກະລ່າເມືອງຂຶ້ນແບບໃໝ່ ກໍໄດ້ກະໂດດເຂົ້າມາແທນທີ່ ດຳເນີນການແຊກແຊງ ແລະ ຮຸກຮານປະເທດລາວໂດຍທັນທີດ້ວຍກົນອຸບາຍ ຫວັງເຮັດໃຫ້ປະເທດເຮົາ ກາຍເປັນຫົວເມືອງຂຶ້ນແບບໃໝ່. ຮອດວັນທີ 22 ມີນາ 1955 ພັກປະຊາຊົນປະຕິວັດລາວ ໄດ້ຮັບການສ້າງຕັ້ງຂຶ້ນ ແລະ ນໍາພາການຕໍ່ສູ້ຢ່າງອົງອາດກ້າຫານ, ມີໄຫວພິບ, ສະຫລາດສ່ອງໃສ ປຸກລະດົມມວນຊົນເຂົ້າຮ່ວມ ຂະບວນການຕໍ່ສູ້ ຢູ່ຕາມໂຮງຈັກໂຮງງານແລະ ຕົວເມືອງ ໂດຍປະສານສົມທົບກໍາລັງ ປະກອບອາວຸດຢຶດເອົາ ທີ່ຕັ້ງສໍາຄັນ ຈົນຮອດວັນທີ 23 ສິງຫາ 1975 ຊາວນະຄອນຫລວງວຽງຈັນ ສອງໝື່ນຄົນ ໄດ້ໂຮມຊຸມນຸມເພື່ອປະກາດສ້າງຕັ້ງອໍານາດ ການປົກຄອງປະຕິວັດຢູ່ຂັ້ນແຂວງ, ນະຄອນຫລວງລົງຮອດ ຮາກຖານໄດ້ຮັບການສ້າງຕັ້ງຂຶ້ນ.

ວັນທີ 2 ທັນວາ 1975 ກອງປະຊຸມໃຫຍ່ ຜູ້ແທນທົ່ວປະເທດໄດ້ໄຂຂຶ້ນ ຢ່າງສະຫງ່າຜ່າເຜີຍຢູ່ ນະຄອນຫລວງວຽງຈັນ ຕົກລົງລົບລ້າງລະບອບ ລາຊາທິປະໄຕທີ່ຫລ້າສະໄໝ ແລະ ສະຖາປະນາລະ ບອບສາທາລະນະລັດ ປະຊາທິປະໄຕ ປະຊາຊົນລາວ, ສ້າງຕັ້ງສະພາສູງສຸດ, ແຕ່ງຕັ້ງປະທານປະ ເທດ ແລະ ສ້າງຕັ້ງລັດຖະບານແຫ່ງ ສປປ ລາວ, ກໍານົດທຸງຊາດ, ເພງຊາດ ແລະ ພາສາທາງການມາເຖິງປັດຈຸບັນ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)