ສູດທີ່ນຳສະເໜີຕໍ່ໄປນີ້ແມ່ນສູດທີ່ຫຼາຍໆ ຄົນໃຊ້ ແລະ ຣີວິວໃຊ້ແລ້ວດີ ເຫັນຜົນຈິງ ຊື່ງຊ່ວຍໃຫ້ຜິວທີ່ເຄີຍໝອງຄໍ້າມີຈຸດດ່າງດຳຄ່ອຍໆ ຈາງລົງ ແລະ ໃນທີ່ສຸດກໍ່ຈະຫາຍໄປ ຜິວໜ້າ ແລະ ຜິວກາຍກໍ່ຈະຄ່ອຍໆ ຂາວຂື້ນເປັນທຳມະຊາດປອດໄພໂດຍບໍ່ມີສານອັນຕະລາຍໃດໆ.

ຄຸນປະໂຫຍດຂອງໝາກຂາມປຽກມີວິຕາມິນ C ແລະ ກົດອາຊິດ AHA ເຊິ່ງເປັນກົດທຳມະຊາດຊ່ວຍຂັດເຊລຜິວ ໃຫ້ຫຼຸດອອກແບບອ່ອນໂຍນ ແລະ ເຮັດໃຫ້ມີຜິວໃໝ່ທີ່ອ່ອນນຸ້ມ ສົດໃສ.

ສູດທີ 1 ຂັດດ້ວຍໝາກຂາມປຽກ ແລະ ຂີ້ໝີ້ນ.

ສູດນີ້ເໝາະສຳລັບຜູ້ທີ່ເປັນສິວ, ຜິວມັນ ສາມາດຊ່ວຍຂ້າເຊື້ອແບັດທີເຣຍທີ່ກໍ່ໃຫ້ເກີດສິວ ຫຼຸດຮອຍແປ້ວທີ່ເກີດຈາກສິວດ້ວຍສານສະກັດຈາກ curcumin ທີ່ຢູ່ໃນຂີ້ໝິ້ນ.

ສ່ວນປະສົມ: ໝາກຂາມປຽກ 50 ກຼາມ, ຜົງຂີ້ໝີ້ນ 1-2 ບ່ວງກາເຟ, ນໍ້າ 1 ຈອກ.

ວິທີເຮັດ: ຕົ້ມນໍ້າໃຫ້ຟົດໃສ່ໝາກຂາມປຽກລົງໄປ ຕົ້ມຈົນກວ່ານໍ້າໝາກຂາມປຽກຈະເຂັ້ມຂຸ້ນ ປະໄວ້ໃຫ້ເຢັນແລ້ວກັ່ນຕອງເອົາຕ່ອນອອກໃຫ້ເຫຼືອແຕ່ນໍ້າ ແລ້ວເອົາມາປະສົມກັບຜົງຂີ້ໝີ້ນຄົນໃຫ້ເຂົ້າກັນ ຈາກນັ້ນນຳມາຂັດໜ້າ ຂັດຕົນໂຕ ແລະ ປະໄວ້ປະມານ 2-3 ນາທີ ຈາກນັ້ນລ້າງອອກໃຫ້ສະອາດ.

ສູດທີ 2 ຂັດຜິວດ້ວຍໜາກຂາມປຽກ ແລະ ເບກກີ້ງໂຊດາ ຫຼື ຊື່ທາງເຄມີເອີ້ນວ່າ (Sodium bicarbonate)

ເບກກີ້ງໂຊດາຊ່ວຍກຳຈັດຈຸດດ່າງດຳໃຫ້ຜິວສະໝໍ່າສະເໝີ ແລະ ສາມາດຊ່ວຍກຳຈັດກິ່ນຂອງຮ່າງກາຍໄດ້ເຊັ່ນກັນຢາກໃຫ້ຜິວຂາວໃສໂດຍບໍ່ມີກິ່ນໂຕຕ້ອງລອງໃຊ້ສູດນີ້.

ສ່ວນປະສົມ: ໝາກຂາມປຽກ 50 ກຼາມ, ນໍ້າ 1 ຈອກ, ເບກກີ້ງໂຊດາ 1 ບ່ວງແກງ, ນໍ້າມັນຫອມລະເຫີຍ 1-2 ຢອດ (ໃສ່ ຫຼື ບໍ່ໃສ່ກໍ່ໄດ້).

ວິທີເຮັດ: ຕົ້ມນໍ້າໃຫ້ຟົດ ແລະ ເອົາຊີ້ນໝາກຂາມປຽກລົງໄປ ຕົ້ມຈົນກວ່ານໍ້າໝາກຂາມປຽກຈະເຂັ້ມຂຸ້ນ ນຳມາກັ່ນຕອງເອົາແຕ່ນໍ້າ ປະໄວ້ໃຫ້ອຸ່ນໆ ແລ້ວໃສ່ນໍ້າມັນຫອມລະເຫີຍຫຼັງຈາກນັ້ນໃຊ້ເພື່ອຂັດຜິວທົ່ວຮ່າງກາຍ.

ສູດທີ 3 ຂັດດ້ວຍໝາກຂາມປຽກກັບນໍ້າເຜິ້ງ.

ສູດນີ້ເໝາະສຳລັບຜິວທີ່ມີຮ່ອຍຫ່ຽວຍານ ຜິວແຫ້ງ ຊື່ງມີວິຕາມິນ ແລະ ສານຕ້ານອະນຸມູນອິດສະລະໃນນໍ້າເຜິ້ງ ຈະຊ່ວຍຟື້ນຟູຜິວທີ່ແຫ້ງໃຫ້ກັບມາຊຸ່ມຊື່ນ ເຕັງຕືງ ແລະ ຫຼຸດການເກີດລິ້ວຮອຍນ້ອຍໆ ໄດ້ເປັນຢ່າງດີ.

ສ່ວນປະສົມ: ໝາກຂາມປຽກ 50 ກຼາມ, ແປ້ງສາລີ 2 ບ່ວງແກງ, ນໍ້າເຜິ້ງ 1 ບ່ວງແກງ, ນໍ້າ 1 ຈອກ.

ວິທີເຮັດ: ຕົ້ມນໍ້າໃຫ້ຟົດແລ້ວໃສ່ໝາກຂາມປຽກ ຕົ້ມຈົນນໍ້າໝາກຂາມປຽກເຂັ້ມຂຸ້ນ ແຍກຕ່ອນອອກເອົານໍ້າມາ ປະສົມກັບນໍ້າເຜິ້ງ ແລະ ແປ້ງສາລີ ຄົນໃຫ້ເຂົ້າກັນດີແລ້ວນຳມາຂັດໃຫ້ທົ່ວຮ່າງກາຍ ປະໄວ້ໜ້ອຍໜຶ່ງແລ້ວລ້າງອອກໃຫ້ສະອາດ.

ຂໍ້ແນະນຳ

ບໍ່ຄວນໃຊ້ຄຣີມຂັດຜິວໝາກຂາມປຽກ ກັບຜິວໜັງທີ່ເຄີຍສັກ ຫຼື ແຖຂົນ ເພາະມັນອາດຈະເຮັດໃຫ້ເກີດການຄັນ, ແສບ, ແດງໄດ້ ເພາະໝາກຂາມປຽກເປັນກົດ ຜູ້ທີ່ມີຜິວບອບບາງ ແພ້ງ່າຍຄວນລະມັດລະວັງ ແລະ ຄວນມີການທົດລອງອາການແພ້ກ່ອນໃຊ້ ໂດຍການທາຂັດຜິວໝາກຂາມປຽກປະໄວ້ປະມານ 3 ຊົ່ວໂມງ ຖ້າບໍ່ມີອາການຜື່ນແພ້ ຈີ່ງສາມາດນຳໄປຂັດຜິວໄດ້.