ທ່ານນາຍົກລັດຖະມົນຕີ ຢ້ຽມຢາມໂຮງງານຊີມັງຄອນຈ໌ ທີ່ຫຼວງພະບາງ

0
95

ໃນວັນທີ 6 ກັນຍາ 2020 ຜ່ານມານີ້, ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ລົງຢ້ຽມຢາມໂຮງງານຊີມັງຄອນຈ໌ ທີ່ຫຼວງພະບາງ ເຊິ່ງເປັນບໍລິສັດ ຜະລິດຊີມັງຍີ່ຫໍ້ດຽວໃຫຍ່ທີ່ສຸດໃນໂລກ, ໂດຍມີຫຼາຍກວ່າ 100 ບໍລິສັດຍ່ອຍແຈກຢາຍຢູ່ 21 ແຂວງ, ເທດສະບານ ແລະ ເຂດປົກຄອງຕົນເອງໃນປະເທດຈີນ, ອິນໂດເນເຊຍ, ມຽນມາ, ລາວ, ກຳປູເຈຍ, ຣັດເຊຍ ແລະ ອື່ນໆ.

ສຳລັບບໍລິສັດ ໂຮງງານຊີມັງຄອນຈ໌ ຫຼວງພະບາງຈຳກັດ ເປັນບໍລິສັດຂະໜາດໃຫຍ່ແຫ່ງໜຶ່ງ ທີ່ຕອບສະໜອງຄວາມຕ້ອງການນະໂຍບາຍ ໜຶ່ງແລວທາງ ໜຶ່ງເສັ້ນທາງ ແລະ ປະຕິບັດຍຸດທະສາດ ການພັດທະນາສາກົນຂອງລັດຖະບານຈີນ ເຊິ່ງເປັນບໍລິສັດໃໝ່ຂອງປະເທດລາວທີ່ລົງທຶນໂດຍ ບໍລິສັດຄອນຈ໌ ກຣຸບຈຳກັດ ຮ່ວມກັບ ບໍລິສັດ ກຣິດຕະພົງກຣຸບ ຈຳກັດ ຕັ້ງຢູ່ບ້ານຜາແດງ ນະຄອນຫຼວງພະບາງ ແຂວງຫຼວງພະບາງ.

ບໍລິສັດ ມີແຜນຈະສ້າງສາຍຜະລິດ ຊີມັງກະລິງເກີ້ ສອງສາຍລະບົບໂມ້ຫີນປູນໂດຍວິທີແຫ້ງແບບໃໝ່ ກຳລັງຜະລິດ 2.500 ໂຕ່ນຕໍ່ເດືອນ ໃນອານະຄົດ. ເຊິ່ງຈະໃຊ້ເຕັກໂນໂລຢີ ລວມທັງອຸປະກອນທີ່ທັນສະໄໝ ແລະ ກ້າວໜ້າທີ່ສຸດຕາມມາດຕະຖານສາກົນ, ຖືສຳຄັນແນວຄວາມຄິດອະນຸລັກສິ່ງແວດລ້ອມ ເພື່ອສະໜອງຜະລິດຕະພັນທີ່ດີທີ່ສຸດ ສ້າງຄວາມສວຍສົດງົດງາມຂອງ ສປປ ລາວ.

ໂອກາດຢ້ຽມຢາມຄັ້ງນີ້, ທ່ານນາຍົກລັດຖະມົນຕີ ໄດ້ສົນທະນາ ແລກປ່ຽນຄຳເຫັນຮ່ວມກັບຜູ້ບໍລິຫານໂຮງງານ ແລະ ທ່ຽວຊົມສະຖານທີ່ຜະລິດຊີມັງບາງຈຸດຕື່ມອີກ.

Medialaos MMD (ແຫຼ່ງຂໍ້ມູນຈາກ: ໜັງສືພິມ ເສດຖະກິດ-ການຄ້າ)