ໃນໂອກາດເຂົ້າຮ່ວມເປັນ ປະທານກອງປະຊຸມ ບັ້ນດໍາເນີນຊີວິດການເມືອງ ທ້າຍສະໄໝທີ 6 ຂອງຄະນະບໍລິຫານງານພັກແຂວງ ບໍລິຄໍາໄຊ ເມື່ອບໍ່ດົນມານີ້, ສະຫາຍ ບຸນທອງ ຈິດມະນີ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ, ປະທານກວດກາສູນກາງພັກ ແລະ ສະຫາຍ ກອງແກ້ວ ໄຊສົງຄາມ ກຳ ມະການສູນກາງພັກ, ເລຂາພັກແຂວງ, ເຈົ້າແຂວງ ບໍລິຄໍາໄຊ ກໍໄດ້ລົງພົບປະຢ້ຽມຢາມ ພະນັກງານແພດໝໍ ແລະ ສໍາຫລວດເບິ່ງ ໂຄງການກໍ່ສ້າງໂຮງໝໍ ແຂວງບໍລິຄໍາໄຊ ຫລັງໃໝ່ ທີ່ລັດຖະບານ ປະເທດລຸກຊໍາບວກ ໃຫ້ທຶນຊ່ວຍເຫລືອ ກໍ່ສ້າງໃນໄລຍະຜ່ານມາ, ພ້ອມທັງຕິດຕາມເບິ່ງ ແຕ່ລະຈຸດພາຍໃນອາຄານ ເປັນຕົ້ນແມ່ນ ຫ້ອງກວດພະຍາດແຕ່ລະເຂດ, ຫ້ອງວິເຄາະ-ຫ້ອງເອກສະເລ, ບັນດາເຄື່ອງມືອຸປະກອນການແພດ ທີ່ນໍາໃຊ້ເຂົ້າໃນການປີ່ນປົວຄົນເຈັບ ຕະຫລອດຮອດ ການບໍລິຫານ-ຈັດການ ບັນດາວຽກງານ ໃນດ້ານຕ່າງໆ ພາຍໃນໂຮງໝໍ.

ຫລັງຈາກນັ້ນ, ທ່ານຮອງນາຍົກລັດຖະມົນຕີ ພ້ອມດ້ວຍຄະນະ ຍັງໄດ້ເດີນທາງໄປທີ່ໂຮງຮຽນ ມສ ສີທ່ານາໄຊ ເພື່ອສໍາຫລວດເບິ່ງ ອາຄານຫ້ອງຮຽນ ຊັ້ນມັດທະຍົມ ແລະ ຫໍສະໝຸດ ທີ່ລັດທະບານ ສສ. ຫວຽດນາມ ໄດ້ໃຫ້ທຶນຊ່ວຍເຫລືອປຸກສ້າງ ມູນຄ່າ 30 ກວ່າຕື້ດົງ ແລະ ໂຮງຮຽນປະຖົມ ແລະ ອະນຸບານ ບ້ານສວນສະຫວັນ ທີ່ກອງທຶນ 1 ດວງໃຈ ບໍລິຄໍາໄຊ ຊ່ວຍເຫລືອສັງຄົມ ໃຫ້ທຶນຊ່ວຍປັບປຸງ ສ້ອມແປງ ໃນໄລຍະຜ່ານມາ.

 ພ້ອມນີ້, ຍັງໄດ້ລົງຕິດຕາມ ການພັດທະນາ ເສດຖະກິດ-ສັງຄົມ ຂອງແຂວງ ເປັນຕົ້ນ ບັນດາເສັ້ນທາງ, ຕຶກອາຄານ, ສໍານັກງານອົງການ ແລະ ສະຖານທີ່ສໍາຄັນຕ່າງໆ ພາຍໃນເທດສະບານ ເມືອງປາກຊັນ ຕື່ມອີກ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)