ໜ້າອອນລາຍພວກເຮົາຂຽນເລື່ອງໃນສື່ອອນລາຍຫຼາຍເທື່ອ.. ຖ້າຈື່ບໍ່ຜິດແມ່ນໃນວັນທີ 1 ພຶດສະພາ ຜ່ານມາພວກເຮົາໄດ້ລົງພິມບົດໃນຫົວຂໍ້: “ເບີ່ງຂ່າວຕ້ອງລະວັງບໍ່ເຕັ້ນຕາມຂ່າວ..”; ເພື່ອເຕືອນສະຕິໃນເວລາທີ່ພະຍາດໂຄວິດ-19 ລະບາດນໍ?
ໃນຊຸມມື້ໃກ້ໆ ນີ້ກໍ່ມີຂ່າວອອນລາຍເກີດຂື້ນຫຼາຍແທ້ໆ ແຕ່ໃນນັ້ນເດັ່ນກ່ວາເພີ່ນແມ່ນກໍລະນີຂໍ້ຂັດແຍ່ງຢູ່ວັດໜອງພະຍາ ເມືອງໄຊທານີ; ນະຄອນຫຼວງວຽງຈັນເຮົານີ້ເອງ;
ມີການຕັ້ງຂໍ້ກ່າວຫາເຊີ່ງກັນ ແລະ ກັນ ລະຫວ່າງສອງຝ່າຍຂໍ້ຂັດແຍ່ງກັນ; ບາງຂ່າວກໍ່ເອົາກົດໝາຍມາທຽບຄຽງແລ້ວເວົ້າວ່າໃຜຜິດ; ໃຜຖືກ.. ຮ້າຍແຮງແມ່ນປອມແປງຄຳສັ່ງຂອງຂັ້ນເທີງ.
ອັນວຸ້ນວາຍສາຍສະໝອນແມ່ນການ Comment; ກົດ like; ກົດ share ຕໍ່ກັນໄປ.
ຕໍ່ເຫດການນີ້ຜູ້ຂຽນຢາກໃຫ້ຜູ້ບໍລິໂພກຂ່າວທັງຫຼາຍມີສະຕິ ແລະ ບໍ່ຍອມໃຫ້ສື່ອອນລາຍ ມັນປັ່ນຫົວແລ້ວໄປຫຼົງ share ຫຼື Comment ຕາມເພາະມັນຫຼໍ່ແຫຼມ ແລະ ມີຄວາມສ່ຽງຕໍ່ການລະເມີດກົດໝາຍທີ່ກ່ຽວຂ້ອງ ເປັນຕົ້ນແມ່ນໃນປະມວນກົດໝາຍອາຍາ ມາດຕາ 168 ໄດ້ກຳນົດໄວ້ກ່ຽວກັບການສ້າງຄວາມເສຍຫາຍຜ່ານສື່ສັງຄົມອອນລາຍ ເຊີ່ງມີທັງປັບໄໝ ແລະ ຕັດອິດສະຫຼະພາບ.
ຢາກແນະນຳໃຫ້ເພື່ອນຜູ້ອ່ານສຶກສາລະບຽບການ ແລະ ກົດໝາຍຕ່າງໆ ເປັນຕົ້ນແມ່ນຄຳແນະນຳກ່ຽວກັບການນຳໃຊ້ສື່ສັງຄົມອອນລາຍໃຫ້ມີຄວາມປອດໄພ ສະບັບເລກທີ 1561/ປທສ ລົງວັນທີ 26 ສິງຫາ 2020 ຂອງທ່ານ ລັດຖະມົນຕີກະຊວງໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ໂດຍສະເພາະແມ່ນໝວດທີ V ວ່າດ້ວຍຂ່າວປອມ ແລະ ການຫຼີ້ນການພະນັນຜ່ານສື່ສັງຄົມອອນລາຍ.
ສຳລັບຂ່າວປອມເພີ່ນແນະນຳດັ່ງນີ້:
ການສັງເກດຂ່າວປອມ
ການສັງເກດຂ່າວປອມ ຄວນປະຕິບັດດັ່ງນີ້:

  • ຄວນມີສະຕິຢ່າຫຼົງເຊື່ອຫົວຂໍ້ຂ່າວ ເພາະຂ່າວປອມມັກຈະມີຂໍ້ຄວາມພາດຫົວຂໍ້ຂ່າວທີ່ເຮັດໃຫ້ຄົນ ທີ່ພົບເຫັນສະດຸດຕາຢາກກົດເຂົ້າໄປອ່ານ ຖ້າອ່ານຫົວຂໍ້ຂ່າວບໍ່ມີຄວາມເປັນໄປໄດ້ໃຫ້ສັນນິຖານໄວ້ວ່າເປັນຂ່າວປອມ;
  • ຄວນພິຈາລະນາລີ້ງຢ່າງຖີ່ຖ້ວນລີ້ງປອມ ຫຼື ລີ້ງທີ່ຄ້າຍຄືລີ້ງແທ້ອາດເປັນສັນຍານເຕືອນວ່າ ເປັນຂ່າວປອມມັກຈະປອມແປງຊື່ລີ້ງໃຫ້ມີຊື່ຄືກັບເວັບໄຊທີ່ໜ້າເຊື່ອຖື;
  • ຄວນກວດສອບແຫຼ່ງທີ່ມາຂອງຂ່າວ ກວດສອບໃຫ້ແນ່ໃຈວ່າລີ້ງດັ່ງກ່າວຂຽນຂື້ນຈາກແຫຼ່ງຂ່າວທີ່ໜ້າເຊື່ອຖື ແລະ ມີຊື່ສຽງໃນການນຳສະເໜີຂໍ້ມູນ;
  • ຄວນສັງເກດຮູບພາບຂ່າວປອມມັັກເອົາຮູບພາບທີ່ບໍ່ກ່ຽວຂ້ອງ ຫຼື ບິດເບືອນຂື້ນ ເພື່ອດຶງດູດຜູ້ອ່ານໃຫ້ກົດເຂົ້າເວັບໄຊ ຊື່ງເຮົາສາມາດກວດສອບຮູບພາບໄດ້ໃນອິນເຕີເນັດ;
  • ຄວນສັງເກດສີ່ງທີ່ຜິດປົກກະຕິຂອງເວັບໄຊ ຂ່າວປອມມັກສະກົດຄຳຜິດ ຫຼື ມີການຈັດວາງຮູບແບບ ທີ່ເບີ່ງບໍ່ເປັນມືອາຊີບ ຫາກເຫັນລັກສະນະເຫຼົ່ານີ້ຄວນອ່ານຂ່າວຢ່າງລະມັດລະວັງ;
  • ຄວນກວດສອບວັນທີຂ່າວປອມ ອາດມີລຳດັບເຫດການທີ່ບໍ່ສົມເຫດສົມຜົນ ຫຼື ມີການປ່ຽນແປງວັນທີຂອງເຫດການ;
  • ຄວນກວດສອບຫຼັກຖານແຫຼ່ງຂໍ້ມູນຂອງຜູ້ຂຽນ ເພື່ອຢືນຢັນວ່າແຫຼ່ງຂໍ້ມູນນັ້ນຖືກຕ້ອງ ຂ່າວທີ່ບໍ່ມີຫຼັກຖານ ຫຼື ອ້າງອີງຜູ້ຊ່ຽວຊານທີ່ບໍ່ລະບຸຊື່ ອາດຊີ້ໃຫ້ເຫັນວ່າຂ່າວດັ່ງກ່າວເປັນຂ່າວປອມ;
  • ຄວນປຽບທຽບຂ່າວຈາກແຫຼ່ງຂ່າວອື່ນ ຖ້າບໍ່ມີແຫຼ່ງຂ່າວອື່ນທີ່ຂຽນເລື່ອງດຽວກັນ ອາດເປັນຂ່າວປອມໄດ້ຖ້າຫຼາຍແຫຼ່ງຂ່າວໃຫ້ຂໍ້ມູນທີ່ກົງກັນກໍ່ມີຄວາມໜ້າເຊື່ອຖືໄດ້;
  • ຄວນສັງເກດເບີ່ງບາງຂ່າວກໍ່ຈົງໃຈສ້າງຂື້ນໃຫ້ເປັນຂ່າວປອມ ໃຊ້ວິຈາລະນະຍານໃນການອ່ານ ແລະ ສົ່ງຕໍ່ສະເພາະຂ່າວທີ່ເຊື່ອຖືໄດ້ເທົ່ານັ້ນ.
    ສະເໜີຂໍ້ມູນຂ້າງເທີງເພື່ອໃຫ້ຜູ້ອ່ານມີຂໍ້ມູນເວລາບໍລິໂພກຂ່າວອອນລາຍເນີ!.

ບ.ກ ມີເດຍລາວ