8 ເດືອນຜ່ານມາ ອັດຕະປື ມີອຸບັດເຫດເກີດຂຶ້ນ 116 ລາຍ ມູນຄ່າເສຍຫາຍ 2 ຕື້ກວ່າກີບ

0
61

ໄລຍະ 8 ເດືອນ​ທີ່​ຜ່ານ​ມາ​ຂອງ​ປີ 2020 ນີ້, ທົ່ວ​ແຂວງ​ອັດ​ຕະ​ປື ມີ​ອຸ​ບັດເຫດ​ເກີດ​ຂຶ້ນ​ທັງ​ໝົດ 116 ລາຍ, ລວມ​ມູນ​ຄ່າ​ເສຍ​ຫາຍ​ສູງ​ເຖິງ 2 ຕື້​ກວ່າ​ກີບ.​ ​ຕາມ​ການ​ໃຫ້​ສໍາ​ພາດ​ ຂອງ​ທ່ານ ຮ້ອຍ​ເອກ ບົວ​ໄລ ປານ​ຄຳ ຫົວໜ້າ​ກອງ​ຄະດີ​ອຸ​ບັດເຫດ  ກອງ​ບັນຊາ​ການ​ປ້ອງ​ກັນ​ຄວາມ​ສະຫງົບ ແຂວງ​ອັດ​ຕະ​ປື ໃຫ້​ຮູ້​ເມື່ອບໍ່​ດົນ​ມານີ້ວ່າ: ໃນ​ໄລຍະ 8 ເດືອນ​ປີ 2020  ທົ່ວ​ແຂວງ​ອັດ​ຕະ​ປື ມີ​ອຸ​ບັດເຫດ​ເກີດ​ຂຶ້ນ​ທັງ​ໝົດ 116 ລາຍ, ທຽບໃສ່​ໃນ​ໄລຍະ​ດຽວ​ກັນ​ຂອງ​ປີຜ່ານມາຫຼຸດ​ລົງ 22 ລາຍ ແຕ່​ເມື່ອ​ທຽບໃສ່​ຜູ້​ເສຍ​ຊີວິດ​ເພີ່ມ​ຂຶ້ນ 6 ລາຍ, ອຸບັດ​ເຫດ​ທີ່​ເກີດ​ຂຶ້ນ​ນັ້ນ​ໄດ້​ມີ​ພາຫະນະ​ເປ່ເພ 204 ຄັນ ເປ່ເພ​ເລັກ​ໜ້ອຍ 96 ຄັນ ເປ່​ເພສົມຄວນ 100 ຄັນ ແລະ ໃຊ້​ການ​ບໍ່​ໄດ້​ມີ 8 ຄັນ, ອຸບັດ​ເຫດ​ທີ່​ເກີດ​ຂຶ້ນ​ມີ​ລົດຈັກ​ຕຳ​ລົດຈັກ 45 ລາຍ, ລົດຈັກ​ຕຳ​ລົດ​ໃຫຍ່ 37 ລາຍ, ລົດ​ໃຫຍ່​ຕຳ​ລົດ​ໃຫຍ່ 8 ລາຍ, ລົດ​ໃຫຍ່​ປີ້ນ​ເອງ 9 ລາຍ, ລົດຈັກ​ຕຳ​ສັດລ້ຽງ 5 ລາຍ, ລົດ​ໃຫຍ່​ຕຳ​ສັດລ້ຽງ 2 ລາຍ, ລົດຈັກ​ຕຳ​ຄົນ​ຍ່າງ 2 ລາຍ, ມີ​ຄົນ​ໄດ້​ຮັບ​ບາດເຈັບ​ທັງ​ໝົດ 216 ຄົນ, ບາດເຈັບ​ເລັກໜ້ອຍ 91 ຄົນ, ບາດເຈັບ​ສົມຄວນ 86 ຄົນ, ບາດເຈັບ​ສາຫັດ 10 ຄົນ ແລະ ເສຍ​ຊີວິດ 29 ຄົນ, ຍິງ 2 ຄົນ, ລວມ​ມູນ​ຄ່າ​ເສຍ​ຫາຍ​ທັງ​ໝົດ 2 ຕື້​ກວ່າ​ກີບ. ສຳລັບ​ສາເຫດ​ຂອງ​ການ​ເກີດ​ອຸບັດ​ເຫດ​ສ່ວນ​ໃຫຍ່ ຍ້ອນ​ນັກ​ຂັບ​ຂີ່​ບໍ່​ປະຕິບັດ​ກົດ​ລະບຽບ​ຈະ​ລາ​ຈອນ​ເປັນຕົ້ນແມ່ນ​ເກີດ​ຈາກ​ການ​ດື່ມ​ສິ່ງ​ມຶນ​ເມົາ ແລ້ວ​ຂັບ​ຂີ່ ລວມ​ທັງ​ສະພາບ​ເ​ຕັກ​ນິກ​ຂອງ​ລົດ​ບໍ່​ຄົບ​ຖ້ວນ.

ທ່ານຮ້ອຍ​ເອກ ບົວໄລ ປານ​ຄຳ ໃຫ້​ຮູ້​ຕື່ມ​ວ່າ: ໃນໄລ ຍະ​ຜ່ານ​ມາ​ພະ​ແນ​ກ​ຈະ​ລາ​ຈອນ​ແຂວງ ໄດ້​ສຸມ​ໃສ່ເຄື່ອນ​ໄຫວ​ສະ​ກັດກັ້ນ​ສະພາບອຸບັດເຫດ​ບົນ​ທ້ອງ​ຖະໜົນດ້ວຍ​ຫຼາຍ​ວິທີ​ເປັນຕົ້ນໄດ້​ລົງ​ເຮັດ​ວຽກ​ໂຄສະນາ​ຕາມ​ສຳນັກງານ​ອົງ ການ, ໂຮງຮຽນ ແລະ ສະຖານ  ທີ່​ຊຸມ​ຊົນ, ທັງ​ຈັດ​ສັນ​ລະບຽບ​ການ​ສັນຈອນ​ຕາມ​ທ້ອງ​ຖະ ໜົນຫຼວງ ແລະ ກວດກາ​ຕາມ​ປ້ອມ​ດ່ານ ພ້ອມ​ທັງ​ເຮັດ​ວຽກ​ສຶກສາ​ອົບຮົມ​ກ່າວ​ເຕືອນຜູ້​ຂັບ​ຂີ່​ລົດ​ໄວ, ໃຊ້​ສຽງ​ດັງ, ການ​ຂີ່​ລົດ​ເປັນ​ພຶງ​ເປັນ​ແພ​ທີ່​ສ່ຽງ​ຕໍ່​ການ​ເກີດອຸ​ບັດເຫດ ແລະ ບຸກຄົນ​ທີ່​ດື່ມ​ສິ່ງ​ມຶນເມົາ ພ້ອມ​ທັງ​ໃຊ້​ມາດ​ຕະການ​ກັກ – ຢຶດ​ຍານພາຫະນະ ເພື່ອ​ປັບ​ໃໝ​ຕາມ​ສະຖານ​ໜັກ, ເບົາ​ແຕ່​ກໍ​ຍັງ​ເຫັນ​ວ່າ​ສະພາບ​ການ​ເກີດ​ອຸ​ບັດ​ເຫດ​ຍັງ​ປະກົດ​ມີ​ໃຫ້​ເຫັນ​ຢູ່.

ໂອກາດ​ດັ່ງກ່າວ, ທ່ານ​ຮ້ອຍ​ເອກ ບົວ​ໄລ ປານ​ຄໍາ ຍັງ​ໄດ້​ຮຽກຮ້ອງ​ເຖິງ​ບັນດາ​ຜູ້​ຂັບ​ຂີ່ ແລະ ນຳ​ໃຊ້​ຍານພາຫະນະ​ທຸກ​ປະເພດ ໃນ​ທ້ອງ​ຖະໜົນ ຕ້ອງ​ເອົາໃຈໃສ່​ປະຕິບັດ​ກົດ​ລະບຽບ​ຈະ​ລາ​ຈອນ ວາງ​ອອກ​ຢ່າງ​ເຂັ້ມ​ງວດ ເພື່ອ​ຫຼີກ​ລ່ຽງ​ການ​ເກີດ​ອຸ​ບັດ​ຕິ​ເຫດ.

Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)