ທ່ານ ນາງ ແສງ​ເດືອນ ຫຼ້າ​ຈັນທະ​ບູນ ລັດຖະມົນຕີ​ກະຊວງ​ສຶກສາ​ທິ​ການ ແລະ ກິລາ ​ໄດ້​ຖະແຫຼງ​ເນື່ອງ​ໃນ​ໂອກາດ​ວັນ​ສາກົນ​ແຫ່ງ​ການ​ຮຽນ​ຮູ້​ໜັງສື​ຄົບຮອບ 55 ປີ (8/9/1965 – 8/9/2020) ໃນ​ວັນ​ທີ 7 ກັນຍາ​ນີ້ ທີ່​ກະຊວງ​ສຶກສາ​ທິ​ການ ແລະ ກິລາ ໂດຍ​ທ່ານ​ໄດ້​ຖະແຫຼງ​ວ່າ: ວັນ​ທີ 8 ກັນຍາ ແມ່ນ​ວັນ​ສາກົນ​ແຫ່ງ​ການ​ຮຽນ​ຮູ້​ໜັງສື ຊຶ່ງ​ປີ​ນີ້​ໝູນວຽນ​ມາ​ຄົບຮອບ 55 ປີ ​ແມ່ນ​ວັນທີ່​ມີ​ຄວາມ​ໝາຍ​ສຳຄັນ​ຢ່າງ​ຍິ່ງຕໍ່ກັບ​ປະຊາຊາດ​ໃນ​ທົ່ວ​ໂລກ ໂດຍ​ສະເພາະ​ແມ່ນ​ຜູ້​ດ້ອຍ​ໂອກາດ, ພາດ​ໂອ ກາດ​ທາງ​ການ​ສຶກສາ ຊຶ່ງ​ຕົ້ນຕໍ​ແມ່ນ​ຄວາມ​ບໍ່​ຮູ້​ໜັງສື ແລະ ການຮຽນບໍ່​ຈົບ​ການ​ສຶກ ສາ​ຂັ້ນ​ພື້ນຖານທີ່ກາຍເປັນ​ອຸປະສັກ​ຢ່າງ​ໃຫຍ່​ຫຼວງ​ຕໍ່​ກັບ​ການ​ພັດທະນາ​ຄົນ ກໍຄື​ການ​ພັດທະນາ​ຊັບພະຍາກອນ​ມະນຸດ, ພັດທະນາ​ເສດ​ຖະ​ກິດ​-​ສັງ ຄົມ​ຂອງ​ຊາດ ຂອງ​ສັງຄົມ ຂອງ​ຕົນ​ເອງ ແລະ ຄອບ​ຄົວ. ດ້ວຍ​ເຫດຜົນ​ດັ່ງກ່າວ ປະ ຊາຊົນ​ຜູ້​ຮັກຫອມ​ສັນຕິພາບ ປະຊາທິປະໄຕ ແລະ ຮັກ​ຄວາມ​ເປັນ​ທຳ​ຢູ່​ໃນ​ທົ່ວ​ໂລກ​ຈຶ່ງ​ໄດ້​ພ້ອມກັນ​ສະເໜີ​ເພື່ອ​ທວງ​ເອົາ​ສິດ​ໃນ​ການ​ສຶກສາ​ຮ່ຳຮຽນ ແນ​ໃສ່​ເຮັດ​ໃຫ້​ປະຊາຊົນ​ເຫຼົ່ານັ້ນ​ຫຼຸດ​ພົ້ນ​ອອກ​ຈາກ​ຄວາມ​ບໍ່​ຮູ້​ໜັງສື ແລະ ຮຽນ​ຈົບ​ຊັ້ນ​ປະຖົມ ຫຼື ຮຽນ​ສູງ​ກວ່າ​ນັ້ນ ເພື່ອ​ໃຫ້​ຄົນ​ເຮົາ​ມີ​ລະດັບ​ຄວາມ​ຮູ້​ຄວາມ​ສາມາດ​ສູງ​ຂຶ້ນ​ໄປ​ເລື້ອຍໆ.

ກອງ​ປະຊຸມ​ສາກົນ​ລະ ດັບ​ລັດຖະມົນຕີ​ກະຊວງ​ສຶກ ສາ​ທິ​ການ​ໃນ​ປີ 1965 ທີ່​ນະຄອນຫຼວງ​ເຕ​ເຮ​ລານ ປະ ເທດອີ​ຣານ; ໄດ້​ຄົ້ນ​ຄວ້າ​ນໍາ​ສະເໜີ​ໃຫ້​ມີ​ວັນ​ສາກົນ​ແຫ່ງ​ການ​ຮຽນ​ຮູ້​ໜັງສື ຊຶ່ງ​ໃນ​ຊຸມ​ປີ​ຕໍ່​ມາ​ຄື​ປີ 1986 ກອງ​ປະຊຸມ​ໃຫຍ່​ອົງການ​ອຸຍ​ແນັ​ສ​ໂກ ຄັ້ງ​ທີ 14 ໄດ້​ມີ​ມະຕິ​ຮັບຮອງ​ເອົາ ວັນ​ທີ 8 ກັນຍາ ຂອງ​ທຸກໆປີ​ໃຫ້​ເປັນ​ວັນສາກົນ​ແຫ່ງ​ການ​ຮຽນ​ຮູ້​ໜັງສື ແລະ ພ້ອມ​ກັນ​ນັ້ນ​ກໍໄດ້​ຮຽກຮ້ອງ​ໃຫ້​ທຸກໆ​ປະເທດ​ທີ່​ເປັນ​ສະມາຊິກ​ຂອງ ອົງການ​ສະຫະ​ປະຊາຊາດ​ຈັດ​ຕັ້ງ​ສະເຫຼີມສະຫຼອງ​ວັນ​ດັ່ງ ກ່າວ​ໃນ​ທຸກໆ​ປີ ເພື່ອ​ສະຫຼຸບ​ຕີ​ລາຄາ​ຜົນ​ຂອງ​ການຈັດຕັ້ງ​ປະຕິບັດ​ແຜນການ​ຮຽນ ຮູ້​ໜັງສື​ໃນ​ປະເທດ​ຂອງ​ຕົນ; ພ້ອມ​ກັນ​ນັ້ນ​ ກໍ​ໄດ້​ກຳນົດ​ທິດ​ທາງ, ແຜນການ, ຄາດໝາຍ​ສູ້​ຊົນ ແລະ ວິທີ​ການ​ຈັດ​ລະ​ບົບການ​ສຶກສາ​ແນ່​ໃສ່​ການ​ລຶບ​ລ້າງ​ຄວາມ​ບໍ່​ຮູ້​ໜັງສື​ໃນ​ປີ​ຕໍ່ໆໄປ.

ໃນ​ແຕ່​ລະ​ປີ, ຜູ້​ອໍາ​ນວຍ​ການ​ໃຫຍ່​ອົງການ​ອຸຍ​ແນັສໂກ ໄດ້​ມີ​ສານ​ໃຫ້​ລັດ​ພາຄີ​ໃຫ້​ເອົາໃຈໃສ່​ສົ່ງເສີມ​ການ​ຮູ້​ໜັງສື ແລະ ການ​ພັດທະນາ​ແບບ​ຍືນ​ຍົງ ພ້ອມ​ທັງ​ມີ​ຄໍາ​ຂວັນ​ອອກ​ໃນ​ແຕ່​ລະ​ປີ, ສໍາ​ລັບ​ປີ 2020 ນີ້ ແມ່ນ “ ການ​ສິດສອນ ແລະ ການ​ຮຽນ​ຮູ້​ໜັງສື ໃນ​ວິ​ກິດ​ການ COVID-19 ແລະ ທິດ​ທາງ​ໃນຕໍ່ໜ້າ. ໃນ​ຫຼາຍ​ປີຜ່ານມາ​ການ​ຮຽນ​ຮູ້​ໜັງສື​ຂອງ​ປະຊາ​ຄົມ​ໂລກ​ກໍໄດ້​ຮັບ​ການ​ຂະຫຍາຍ​ຕົວ ແລະ ເພີ່ມ​ຂຶ້ນ​ຢ່າງ​ວ່ອງ​ໄວ ແຕ່​ກໍ​ຍັງ​ມີ​ປະຊາກອນ​ໂລກ​ປະມານ 773 ລ້ານ​ຄົນ​ ສ່ວນ​ຫຼາຍ​ເປັນ​ຜູ້​ໃຫຍ່ ແລະ ຊາວ​ໜຸ່ມ​ຍັງ​ບໍ່​ຮູ້​ໜັງສື ແລະ ຫຼາຍ​ກ່​ວາ 617 ລ້ານ​ຄົນ, ແມ່ນ​ເດັກນ້ອຍ ແລະ ຊາວ​ໜຸ່ມ​ໃນ​ການ​ອ່ານ ແລະ ຄິດໄລ່​ເລກ​ໂດຍ​ພື້ນຖານ​ຍັງ​ຕໍ່າກ່​ວາ​ມາດ​ຖານ.

ສຳລັບ ສປປ ລາວ ລັດຖະ ບານ​ໃຫ້​ຄວາມ​ສຳຄັນ​ໃນ​ການ​ພັດທະນາ​ຊັບພະຍາກອນມະ ນຸດ ຊຶ່ງ​ໄດ້​ເອົາໃຈໃສ່​ຂະ ຫຍາຍ​ຕາໜ່າງ​ການ​ສຶກສາ ສ້າງ​ເງື່ອນໄຂ​ໃຫ້​ພົນລະເມືອງ​ລາວ​ສາມາດ​ເຂົ້າ​ເຖິງ​ການ​ສຶກສາ​ທີ່​ມີ​ຄຸນ​ນະ​ພາບ​ຢ່າງ​ສະເໝີພາບ ແລະ ເທົ່າ​ທຽມ​ກັນ ລະຫວ່າງ​ຕົວ​ເມືອງ ແລະ ຊົນນະບົດ ແຕ່​ເຖິງ​ຢ່າງໃດ​ກໍຕາມ ສປປ ລາວ ກໍຍັງ​ມີ​ປະຊາກອນ​ທີ່​ບໍ່​ຮູ້​ໜັງສື ແລະ ຍັງ​ມີ​ເດັກນ້ອຍ​ທີ່​ບໍ່​ໄດ້​ເຂົ້າ​ເຖິງ​ການ​ສຶກສາ ແລະ ປະລະ​ຈາກ​ໂຮງຮຽນ​ຊັ້ນ​ປະຖົມ ປະມານ 4% ໃນ​ສົກ​ 2019-2020 ນີ້, ຊຶ່ງ​ເປັນ​ສິ່ງ​ທ້າ​ທາຍ​ອັນ​ໃຫຍ່​ຫຼວງ​ຂອງປະເທດ​​ພວກ​ເຮົາ​ທີ່​ຈະ​ຕ້ອງ​ເອົາໃຈໃສ່ ໃນ​ສະພາບ​ການ​ລະບາດຂອງພະຍາດ​ໂຄ​ວິດ-19 ທົ່ວ​ໂລກ ແລະ ບໍ່​ຮູ້​ວ່າ​ຈະ​ສິ້​ນ​ສຸດ​ເວລາ​ໃດ ຊຶ່ງ​ມັນ​ເປັນ​ຜົນ​ກະທົບ​ອັນ​ໜັກໜ່ວງ ແລະ ຮ້າຍ​ແຮງ​ຕໍ່​ການ​ພັດທະນາ​ການ​ສຶກສາ-​ກິລາ ຕໍ່​ກັບ​ສະພາບ​ການ​ດັ່ງ ກ່າວ​ນັ້ນ ລັດຖະບານ​ແຫ່ງ ສປປ ລາວ ກໍ​ຄື​ກະຊວງ​ສຶກສາ​ທິ​ການ ແລະ​ ກິລາ ໄດ້​ມີ​ການ​ຮັບ​ມື​ໂດຍ​ອີງໃສ່​ກົດໝາຍ,ນິຕິ​ກຳ​ຕ່າງໆ​ທີ່​ມີ ໂດຍ​ສະເພາະ​ແມ່ນ​ດຳລັດ​ວ່າ​ດ້ວຍ​ການ​ຮຽນ​ຮູ້​ຕະຫຼອດ​ຊີວິດ ເພື່ອ​ສົ່ງເສີມ​ການ​ສຶກສາ​ໄປ​ສູ່​ເຂດ​ຫ່າງ​ໄກ​ສອກຫຼີກ, ສ້າງ​ເງື່ອນໄຂ​ໃຫ້​ແກ່​ກຸ່ມ​ເປົ້າ​ໝາຍ​ຜູ້​ທີ່​ດ້ອຍ​ໂອກາດ, ຜູ້​ທຸກ​ຍາກ, ເພດ​ຍິງ, ຊົນເຜົ່າ, ຜູ້​ພິການ​ໄດ້​ຮັບ​ການ​ສຶກສາ​ທີ່​ມີ​ຄວາມ​ສະເໝີພາບ ແລະ ເທົ່າ​ທຽມ ໂດຍ​ຜ່ານ​ການ​ຈັດການ​ຮຽນ​-​ການ​ສອນ​ໃນ​ຫຼາຍ​ຮູບ​ແບບ, ຫຼາຍ​ຮູບ​ການ​ເຊັ່ນ: ການ​ຮຽນ​ທາງໄກ, ການ​ຮຽນ​ຜ່ານ​ໂທລະພາບ, ວິທະຍຸ, ສື່​ສັງຄົມ​ອອນ​ລາຍ ແລະ ອື່ນໆ ກ້າວ​ໄປ​ເຖິງ​ການ​ຮຽນ​ຮູ້​ຕາມ​ອັດ​ຕະ​ຍາ​ໄສ.

ຕາງໜ້າ​ໃຫ້​ລັດຖະບານ ແຫ່ງ ສ ປປ ລາວ ກໍ​ຄື ກະຊວງ​ສຶກສາ​ທິ​ການ ແລະ ກິລາ ແລະ ໃນ​ນາມ​ສ່ວນ​ຕົວ, ຂ້າພະເຈົ້າ ຂໍ​ສະແດງ​ຄວາມ​ຍ້ອງຍໍສັນ ລະເສີນ ມາ​ຍັງ​ຄະນະ​ນຳ, ອໍາ​ ນາດ​ການ​ປົກຄອງ​ແຕ່​ລະຂັ້ນ ແຕ່​ຂັ້ນ​ສູນ​ກາງ​ລົງ​ຮອດ​ທ້ອງ ຖິ່ນ, ບັນດາ​ຂະແໜງການ, ອົງການ​ຈັດ​ຕັ້ງ​ມະຫາຊົນ, ການຈັດຕັ້ງ​ພາກ​ເອກະ​ຊົນ, ຊຸມ​ຊົນ, ຜູ້​ບໍລິຫານ​ການ​ສຶກສາ ແລະ ກິລາ, ຄູ​-ອາຈານ ແລະ ນັກຮຽນ ຕະຫຼອດ​ຮອດ ພີ່ນ້ອງ​ລາວ​ບັນດາເຜົ່າ ທີ່​ໄດ້​ປະກອບສ່ວນ​ຢ່າງ​ຕັ້ງໜ້າ​ເຂົ້າ​ໃນ​ວຽກ​ງານ​ການ​ສຶກສານອກ​ໂຮງຮຽນ ກໍ​ຄື​ວຽກ​ງານ​ລຶບ​ລ້າງ​ຄວາມ​ບໍ່​ຮູ້​ໜັງສື, ຂໍ​ຂອບໃຈ​ມາ​ຍັງ ບັນດາ​ປະເທດ​ເພື່ອນ​ມິດ, ທີ່​ໄດ້​ໃຫ້ການ​ສະໜັບສະໜູນ​ຕໍ່​ຜົນສຳເລັດ​ໃນ​ໄລຍະ​ຜ່ານ​ມາ.

ໃນ​ໂອກາດ​ສະເຫຼີມສະ ຫຼອງ​ວັນ​ສາກົນ​ແຫ່ງ​ການຮຽນ ​ຮູ້​ໜັງສື ຄົບຮອບ 55 ປີ​ນີ້ ຂ້າພະ ເຈົ້າຂໍ​ສົ່ງ​ພອນ​ໄຊອັນປະເສີດ​ມາ​ຍັງ​ຄະນະ​ນຳ, ອຳນາດ​ການ​ປົກຄອງ, ຜູ້​ບໍລິຫານ​ການ​ສຶກ ສາ, ຄູ-​ອາຈານ, ນັກຮຽນ, ນັກ​ສຶກສາ ແລະ ປະຊາຊົນ​ລາວ​ບັນດາເຜົ່າ​ໃນ​ທົ່ວ​ປະເທດ ຈົ່ງ​ມີ​ສຸຂະພາບ​ເຂັ້ມແຂງ, ມີ​ຄວາມ ສຸກ ແລະ ປະສົບ​ຜົນສຳເລັດ​ໃນ​ໜ້າທີ່​ວຽກ​ງານ ພ້ອມ​ກັນ​ກ້າວ​ຂຶ້ນ​ຍາດ​ເອົາ​ໄຊຊະນະ​ໃໝ່​ໃຫຍ່​ຫຼວງກ່​ວາ​ເກົ່າ​ໃນ​ທຸກ​ວຽກ​ງານ ໂດຍ​ສະເພາະ​ແມ່ນ​ວຽກ​ງານ​ລຶບ​ລ້າງ​ຄວາມ​ບໍ່​ຮູ້​ໜັງສື ແລະ​ບຳລຸງ​ຍົກ​ລະດັບ​ການ​ສຶກສາ​ໃຫ້​ສູງ​ຂຶ້ນ​ເລື້ອຍໆ.

Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)