ເມື່ອບໍ່​ດົນຜ່ານ​ມາ​ນີ້, ກະ ຊວງ​ພະລັງງານ ແລະ ບໍ່​ແຮ່ ນໍາ​ໂດຍ ທ່ານ ຄໍາ​ມະນີ ອິນ​ທິ​ລາດ ລັດຖະມົນຕີ ກະຊວງ​ພະລັງງານ ແລະ ບໍ່​ແຮ່, ທ່ານ ຈະເລີນ ເຢຍ​ປາວ​ເຮີ ລັດຖະ ມົນຕີ​ປະ​ຈໍາສໍາ​ນັກ​ງານ​ນາຍົກ ລັດຖະມົນຕີ ພ້ອມ​ດ້ວຍ​ການ​ນໍາ​ຈາກ​ກະຊວງ​ກ່ຽວຂ້ອງ ແລະ ການ​ນໍາ​ແຂວງ​ຫົວພັນ ໄດ້​ລົງ​ຢ້ຽມຢາມຕິດຕາມ​ຊຸກຍູ້​ໂຄງການ​ກໍ່ສ້າງ​ເຂື່ອນ​ໄຟ​ຟ້າ​ນໍ້າ​ຮາວ, ຕັ້ງ​ຢູ່​ເມືອງ​ສົບເບົາ ແຂວງ​ຫົວພັນ ໂດຍ​ໃຫ້​ກຽດ​ຕ້ອນຮັບ​ຂອງ​ທ່ານ ຄໍາ​ຜາຍ ສີ​ລາຊາ ປະທານບໍລິສັດກຸ່ມ​ດວງ​ຈະເລີນ​ພັດທະນາ​ກໍ່​ສ້າງ​ຈໍາ​ກັດ​ຜູ້​ດຽວ, ທັງ​ເປັນ​ປະທານ ບໍ​ລິ​ສັັດ ນໍ້າ​ຮາວ​ຈະເລີນ​ພາວ​ເວີ້ ຈໍາ​ກັດ.

ໃນ​ການ​ລົງ​ຢ້ຽມຢາມ​ຄັ້ງ ນີ້, ທ່ານ ຄໍາ​ຜາຍ ສີ​ລາຊາ ໄດ້​ລາຍ​ງານ​ຄວາມ​ຄືບ​ໜ້າ ແລະ ຜົນສໍາ​ເລັດ​ຂອງ​ໂຄງການ​ວ່າ: ໂຄງການ​ເຂື່ອນ​ໄຟ​ຟ້າ​ນໍ້າ​ຮາວ ມີ​ກໍາ​ລັງ​ການ​ຜະລິດສູງ​ສຸດ​ແມ່ນ​ໄດ້ 22 ເມ​ກາ​ວັດ​ ໃນ​ລະດູຝົນ ແລະ ຕໍ່າ​ສຸດ​ແມ່ນ 9 ເມ​ກາ​ວັດ ໃນ​ລະດູແລ້ງ, ມີ​ມູນ​ຄ່າ​ການ​ກໍ່ສ້າງ​ທັງ​ໜົດ 40 ກວ່າ​ລ້ານໂດ​ລາ​ ໂດຍ​ການ​ລົງທຶນ​ຂອງ​ບໍ​ລິ​ສັັດ ນໍ້າ​ຮາວ​ຈະເລີນ​ພາວ​ເວີ້ ຈໍາ​ກັດ​ຜູ້​ດຽວ 100%. ດ້ານ​ການ​ອອກ​ແບບ​ເຂື່ອນ​ແມ່ນ ບໍລິສັດ ເອນ​ທູ​ລ່າ. ການ​ກໍ່ສ້າງ​ໂຄງການ ແມ່ນ​ມີ​ຂໍ້​ສະດວກ​ຫຼາຍ​ດ້ານ​ເປັນຕົ້ນ​ແມ່ນ: ໄດ້​ຮັບ​ການ​ຮ່ວມ​ມື​​ຈາກ ບ້ານ, ເມືອງ, ແຂວງ​ຫົວພັນ ແລະ ກະຊວງ​ທີ່​ກ່ຽວຂ້ອງ, ຈຶ່ງ​ເຮັດ​ໃຫ້​ໂຄງ​ການ​ສໍາ​ເລັດ​ເປັນ​ກ້າວໆ​ມາ ແລະ ຄາດ​ວ່າ​ຈະໃຫ້​ ສໍາເລັດ​ສົມບູນ ຕາມ​ສັນຍາ ຊື້​-ຂາຍ​ໄຟ ກັບໄຟ​ຟ້າ​ລາວ (COD) ໃນ​ເດືອນ ສິງຫາ 2021 ທີ່​ຈະ​ມາ​ເຖິງ​ນີ້.

ພາຍຫຼັງ​ໄດ້​ຮັບ​ຟັງ​ການ​ລາຍ​ງານ ຂອງ​ບໍລິສັດ​ແລ້ວ, ທ່ານ ຄໍາ​ມະນີ ອິນ​ທິ​ລາດ ລັດ ຖະມົນຕີ ກະຊວງ​ພະລັງງານ ແລະ ບໍ່​ແຮ່ ກໍ​ໄດ້​ສະແດງ​ຄວາມ​ຍ້ອງຍໍ​ຊົມເຊີຍ ຕໍ່​ຜົນ​ສໍາ​ເລັດ​ຂອງ​ບໍ​ລິ​ສັັດ ທີ່​ໄດ້​ເອົາໃຈໃສ່​ກໍ່ສ້າງ ແລະ ທຸ້ມເທ​ທຶນຮອນ ເຂົ້າ​ໃສ່​ໂຄງການ ໃຫ້​ມີ​ຜົນ​ສໍາ​ເລັດ ແລະ ໃຫ້​ໄດ້​ຈໍາ​ໜ່າຍ​ກະ ແສໄຟຟ້າ ສະໜອງໃຫ້ແກ່​ ການ​ຊົມໃຊ້​ໃນ​ຄົວ​ເຮືອນ, ການ​ຜະລິດ​ກະ​ສິ​ກໍາ, ອຸດ​ສາ​ຫະ ກໍາ ພາຍ​ໃນ​ບັນດາ​ເມືອງຂອງ​ແຂວງ​ຫົວພັນ ແລະ ເປັນ​ການ​ປະກອບສ່ວນ​ເຂົ້າ​ໃນການ​ ພັດທະນາ ແລະ ສ້າງສາ​ປະ ເທດ​ຊາດຂອງ​ບໍລິສັດ.

Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)