ບໍລິສັດ ສະຕຣາໂທລະຄົມ (ຢູນີເທວ) ສາຂາອັດຕະປື ໄດ້ຊ່ວຍເຫລືອວຽກງານ ປ້ອງກັນ, ຄວບຄຸມ ແລະ ແກ້ໄຂການລະບາດ ຂອງພະຍາດໂຄວິດ-19 ຢູ່ແຂວງອັດຕະປື, ໂດຍການອຸປະຖໍາໂທລະສັບມືຖື ຈໍານວນ 38 ໜ່ວຍ, ພ້ອມມູນຄ່າໂທ ເປັນລາຍເດືອນ, ເດືອນລະ 200.000 ກີບ,ເປັນເວລາ 1 ປີ ນັບແຕ່ເດືອນ ກັນຍາ 2020 ເຖິງ ເດືອນ ກັນຍາ 2021, ລວມມູນຄ່າທັງໝົດ ຈໍານວນ 45.600.000 ກີບ, ໂດຍມີຈຸດປະສົງ ເພື່ອໃຫ້ຄະນະ ສະເພາະກິດປ້ອງກັນ, ຄວບຄຸມ ແລະ ແກ້ໄຂການລະບາດ ຂອງພະຍາດ ໂຄວິດ-19 ຂອງແຂວງອັດຕະປື ແລະ ເມືອງໃນທົ່ວແຂວງ, ໄດ້ນໍາໃຊ້ໂທ ລະສັບມືຖື ແລະ ມູນຄ່າໂທດັ່ງກ່າວ, ເຂົ້າໃນວຽກງານການປະສານງານ ລະຫວ່າງແຂວງ ແລະ ເມືອງໃນການເຝົ່າລະວັງ ການແຜ່ລະບາດ ຂອງພະຍາດ ໂຄວິດ-19, ຢູ່ແຂວງອັດຕະປື.

ພິທີມອບ-ຮັບເຄື່ອງ ຊ່ວຍເຫລືອດັ່ງກ່າວ, ໄດ້ຈັດຂື້ນຢ່າງເປັນທາງການ ໃນວັນທີ 4 ສິງຫາ 2020 ທີ່ພະແນກສາທາລະນະສຸກ ແຂວງອັດຕະປື, ໂດຍການກ່າວມອບຂອງ ທ່ານ ຈັນທະວີໄຊ ທໍາມະວົງ ອໍານວຍການບໍລິສັດ ສະຕຣາໂທລະຄົມ ສາຂາອັດຕະປື ແລະ ກ່າວຮັບໂດຍທ່ານ ອິນປັນ ອິນ ທິລາດ ຮອງຫົວຫນ້າພະແນກ ສາທາລະນະສຸກ ແຂວງອັດຕະປື ຫົວໜ້າກອງເລຂາ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ ໂຄວິດ-19 ຂັ້ນແຂວງ, ໂດຍຊ້ອງໜ້າພາກສ່ວນທີ່ກ່ຽວ ຂ້ອງທັງສອງຝ່າຍເຂົ້າຮ່ວມ.

ທ່ານ ອິນປັນ ອິນທິລາດ ໄດ້ກ່າວສະແດງຄວາມຂອບໃຈ ມາຍັງບໍລິສັດສະຕຣາໂທລະຄົມ ສາຂາອັດຕະປື ທີ່ເຫັນໄດ້ຄວາມສໍາຄັນ ໃນວຽກງານ ປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ ໂຄວິດ-19, ພາຍໃນແຂວງອັດຕະປື, ພ້ອມສັນຍາວ່າຈະນໍາໃຊ້ເຄື່ອງ ຊ່ວຍເຫລືອດັ່ງກ່າວນີ້ ໃຫ້ເກີດປະໂຫຍດສູງສຸດ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)