ກອງປະຊຸມໃຫຍ່ ຄັ້ງທີ VIII ຂອງອົງການພຸດທະສາສະໜາສຳພັນລາວ ແຂວງຫລວງພະບາງ ໄດ້ໄຂຂຶ້ນ ໃນວັນທີ 8 ກັນຍາ 2020 ທີ່ສະໂມສອນ ຂອງຫ້ອງວ່າການ ນະຄອນຫລວງພະບາງ ມີ ພະຫລັກແກ້ວ ມະຫາສຸເມນທາທິບໍດີ, ພະອາຈານ ມະຫາບຸນມາ ສີມມາພົມ ຮັກສາການປະ ທານ ອົງການພຸດທະສາສະໜາສຳພັນລາວ (ອພສ), ພ້ອມດ້ວຍພະເຖລານຸເຖລະ ແລະ ຜູ້ແທນຟ່າຍສົງ ແລະ ຝ່າຍຄາລະວາດ ເຂົ້າຮ່ວມ.

ວາລະກອງປະຊຸມ ພະຣັກຄຳຣັດຕະນະບໍດີເຖຣະສາທຸ ອ່ອນແກ້ວ ກິດຕິພັດໂທ ກຳມະການສູນກາງແນວລາວສ້າງຊາດ, ກຳມະການ ສູນກາງອົງການ ພຸດທະສາສະໜາສຳພັນລາວ, ເຈົ້າຄະນະສົງ ອົງການພຸດທະສາສະໜາສຳພັນລາວ ແຂວງຫລວງພະບາງ ໄດ້ກ່າວໄຂ ກອງປະຊຸມວ່າ: ກອງປະຊຸມຄັ້ງນີ້, ເພື່ອປະເມີນຜົນງານ ການເຄື່ອນໄຫວວຽກງານຂອງ ອົງການພຸດທະສາສະໜາ ສໍາພັນລາວ ແຂວງຫລວງ ພະບາງ ໃນ 5 ປີຜ່ານມາ, ພ້ອມທັງຈະໄດ້ຮັບຟັງ ການປະກອບຄຳເຫັນ ຈາກພາກສ່ວນກ່ຽວຂ້ອງ ຂອງເມືອງ-ນະຄອນ ຕໍ່ວຽກງານອົງ ການພຸດ ທະສາສະໜາສຳພັນລາວ ແຂວງຫລວງພະບາງ ແລະ ຈະມີການຮັບຮອງເອົາການ ປະກອບບຸກຄະລາກອນພະສົງ ອົງທີ່ມີຄວາມຮູ້ ຄວາມສາມາດ ແລະ ມີມາດຖານເງື່ອນໄຂຄົບຖ້ວນ ເຂົ້າເປັນຄະນະບໍລິຫານງານ ອົງການພຸດທະສາສະໜາສຳພັນລາວແຂວງ ຫລວງພະບາງຕື່ມອີກ.

ຈາກນັ້ນ, ຮອງເຈົ້າຄະນະສົງອົງການ ພຸດທະສາສະໜາສໍາພັນລາວ ແຂວງຫລວງພະບາງ ໄດ້ຂຶ້ນຜ່ານ ບົດສະຫລຸບວຽກງານໃນ 5 ປີຜ່ານມາ ແລະ ທິດທາງແຜນການໃນ 5 ປີຕໍ່ໜ້າ, ເພື່ອໃຫ້ພາກສ່ວນກ່ຽວຂ້ອງທີ່ເຂົ້າຮ່ວມ ໄດ້ພ້ອມກັນປະກອບ ຄຳເຫັນຕໍ່ບົດສະຫລຸບ ແລະ ທິດທາງແຜນການໃຫ້ມີເນື້ອໃນຄົບຖ້ວນ-ສົມບູນ. ກອງປະຊຸມຄັ້ງນີ້, ຈະດໍາເນີນເປັນເວລາ 2 ວັນ ຈຶ່ງຈະສຳເລັດ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)