ເມື່ອທ້າຍອາທິດຜ່ານມາ, ທ່ານ ຄໍາຮຸ່ງ ເຮືອງວົງສີ ປະທານອົງການກາແດງລາວ, ທ່ານ ບຸນເນົາ ພະຈອມພົນ ຫົວໜ້າອົງການ ກາແດງແຂວງວຽງຈັນ ແລະ ພາກສ່ວນກ່ຽວຂ້ອງ ໄດ້ນຳເອົາອຸປະກອນ ການປ້ອງກັນໄພພິບັດ ໄປຊ່ວຍເຫລືອປະຊາຊົນ 8 ບ້ານ ທີ່ນອນ ຢູ່ໃນໂຄງການຫລຸດ ຜ່ອນຄວາມສ່ຽງໄພພິບັດຊຸມຊົນ ຢູ່ເມືອງທຸລະຄົມ ໃນນັ້ນປະກອບມີ ຈັກເຮືອ 13 ແຮງມ້າ 4 ເຄື່ອງ, ເຮືອເຫລັກ 4 ລໍາ, ເສື້ອຊູຊີບ 28 ຜືນ, ກົງເບັງ 8 ອັນ, ເຊືອກ 4 ກໍ້, ປາກເລີ 16 ອັນ, ແອັມ 250W 4 ໜ່ວຍ. ພ້ອມນີ້, ຍັງມີສາຍປາກເລີ, ໄມໂຄໂຟນ, ວິທະຍຸ, ຫີບຢາປະຖົມພະຍາບານ ປະຈຳບ້ານຈຳນວນໜຶ່ງ ແລະ ເງິນເພື່ອເປັນກອງທຶນໃຫ້ບ້ານລະ 1.000.000 ກີບ, ລວມມູນຄ່າທັງໝົດ 86.780.000 ກີບ, ໂດຍການສະໜັບສະໜູນ ຈາກສະພາກາແດງຈີນ.

ໂຄງການດັ່ງກ່າວ, ເພື່ອແນ່ໃສ່ສ້າງຄວາມເຂັ້ມແຂງໃຫ້ແກ່ຊົນຊົນ ກຸ່ມບ້ານເປົ້າໝາຍ ທີ່ໄດ້ຮັບຜົນກະທົບຈາກນໍ້າຖ້ວມ ແລະ ມີຄວາມ ສ່ຽງໄພພິບັດ, ເພື່ອເປັນການຂະຫຍາຍ ຕາໜ່າງອາສາສະໝັກກາແດງ, ໜ່ວຍປ້ອງກັນ ແລະ ຄວບຄຸມໄພພິບັດຂັ້ນບ້ານ ລົງສູ່ບັນດາບ້ານ ທີ່ມີຄວາມສ່ຽງສູງຕໍ່ໄພພິບັດ, ຮັບປະກັນໃຫ້ປະຊາຊົນ ໄດ້ຮັບການຊ່ວຍເຫລືອ ໃນພາວະສຸກເສີນ ແລະ ສາມາດບໍລິຫານຈັດ ການເພື່ອຮັບ ມືກັບໄພພິບັດ, ຫລຸດຜ່ອນການເສຍຫາຍທາງດ້ານຊີວິດ ແລະ ຊັບສິນ, ສາມາດຂະຫຍາຍອາສາສະໝັກໄດ້ 56 ຄົນ, ຝຶກອົບຮົມ ອາສາສະໝັກໄດ້ 8 ບ້ານ ປະກອບມີ ບ້ານເປົ້າໝາຍ ຄື: ບ້ານຕານປ່ຽວ, ໂພນແພງ, ສຸກສາລາ, ຫາດສວນ, ບ້ານຈຸ້ມ, ບ້ານແຈ້ງ, ລິ່ງຊັນ ແລະ ບ້ານຫາດສ້ຽວ ເມືອງທຸລະຄົມ ແຂວງວຽງຈັນ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)