ກອງ​ປະຊຸມ​ໃຫຍ່​ສະມັດ ຊາ​ລັດ​ຖະ​ສະພາ​ລະຫວ່າງ​ຊາດ​ອາ​ຊຽນ ໄອ​ປາ (AIPA) ຄັ້ງທີ 41 ແບບ​ທາງໄກ (ຜ່ານ​ວີ​ດີ​ ໂອ) ໄດ້​ເປີດ​ຂຶ້ນ​ຢ່າງ​ເປັນທາງການ​ ໃນ​ວັນ​ທີ 8 ກັນຍານີ້ ທີ່​ນະຄອນຫຼວງ​ຮ່າ​ໂນ້ຍ ສສ ຫວຽດ ນາມ​ໂດຍ​ການ​ເປັນ​ປະທານ​ຂອງ​ທ່ານ ນາງ ຫ​ງວຽນ ທິ ກິມເງິນ ປະທານ​ສະພາ​ແຫ່ງ​ຊາດ​ ສສ ຫວຽດນາມ ປະທານ​ກອງ​ປະຊຸມ AIPA ໂດຍ​ການ​ເຂົ້າ​ຮ່ວມ​ຂອງ​ທ່ານ ຫ​ງວຽນ ຝູ ຈ້ອງ ປະທານ​ປະເທດ​ແຫ່ງ​ສສ ຫວຽດນາມ, ທ່ານ ຫ​ງວຽນ ຊວັນ ຟຸກ ນາຍົກລັດຖະມົນຕີ​ແຫ່ງ ​ສສ ຫວຽດນາມ ພ້ອມ​ດ້ວຍ​ຄະນະ​ຜູ້​ແທນ​ຂອງ​ລັດ​ ຖະສະພາ​ສະມາຊິກ AIPA ເຂົ້າ​ຮ່ວມ.

ກອງ​ປະຊຸມ​ຄັ້ງ​ນີ້​ໄດ້​ລົງ​ເລິກ 6 ກອງ​ປະຊຸມ​ໃຫຍ່​ສຳຄັນ​ຄື: 1. ກອງ​ປະຊຸມ​ສະມາຊິກ​ ລັດ​ຖະ​ສະພາ​ເພດ​ຍິງ AIPA ເພື່ອ​ການ​ສົ່ງເສີມ​ບົດບາດ​ຂອງ​ສະມາຊິກ​ລັດ​ຖະ​ສະພາ​ເພດ​ຍິງ​ໃນ​ການ​ຮັບປະກັນ​ທາງ​ດ້ານ​ວຽກ​ເຮັດ​ງານ​ທຳ ແລະ ລາຍ​ຮັບ​ສຳລັບ​ແຮງ​ງານ​ເພດ​ຍິງ. 2. ກອງ​ປະຊຸມ​ກຳມາ​ທິ​ການ​ການ​ເມືອງ​-​ຄວາມ​ໝັ້ນຄົງ. 3. ກອງ​ປະຊຸມ​ກຳມາ​ທິ​ການ​ເສດ​ຖະ​ກິດ. 4. ກອງ​ປະຊຸມ​ກຳມາ​ທິ​ການ​ສັງ​ຄົມ. 5. ກອງ​ປະຊຸມ​ກຳມາ​ທິ​ການ​ວຽກ​ງານ​ພາຍ​ໃນ. 6. ກອງ​ປະຊຸມ​ແບບ​ບໍ່​ເປັນ​ທາງ​ການ​ຂອງ​ສະມາຊິກ​ລັດ​ຖະ​ສະພາ​ໜຸ່ມ AIPA.

ໃນ​ກອງ​ປະຊຸມ​ໃຫຍ່​ສະ ມັດຊາ​ລັດ​ຖະ​ສະພາ​ ລະຫວ່າງ​ ຊາດ​ອາ​ຊຽນ (AIPA) ຄັ້ງ​ທີ 41 ນີ້ ທ່ານ ນາງ ປານີ ຢາ​ທໍ່​ຕູ້ ປະທານ​ສະພາ​ແຫ່ງ​ຊາດ​ແຫ່ງ​ສປປ​ລາວ ຫົວໜ້າ​ຄະນະຜູ້​ແທນ​ສະພາ​ແຫ່ງ​ຊາດ​ລາວ ກໍ​ໄດ້​ມີ​ຄຳ​ເຫັນ​ຕໍ່​ກອງ​ປະຊຸມ​ໃຫຍ່​ ສະມັດຊາ​ລັດ​ຖະ​ສະພາ​ລະ ຫວ່າງ​ຊາດ​ອາ​ຊຽນ (AIPA) ຄັ້ງ​ທີ 41 ພາຍ​ໃຕ້​ຫົວຂໍ້ “ການ​ທູດ ລັດ​ຖະ​ສະພາ​ເພື່ອ​ອາ​ຊຽນ​ທີ່​ໜຽວ​ແໜ້ນ ແລະ ຕອບ​ສະໜອງ​ຕໍ່​ສະພາບ​ການ Parliamentary Diplomacy for Cohesive and Responsive ASEAN” ໂດຍ​ມີ​ເນື້ອ​ໃນ​ສຳຄັນ​ບາງ​ຕອນ​ທ່ານ​ໄດ້​ກ່າວ​ໃຫ້​ຮູ້​ວ່າ: ສະພາ​ແຫ່ງ​ຊາດ​ລາວ​ຕີ​ລາຄາ​ສູງ ແລະ ສະໜັບສະໜູນ​ຕໍ່​ຄໍາ​ຂວັນ​ຂອງ​ກອງ​ປະຊຸມ​ໄອ​ປາ ຄັ້ງ​ທີ 41 ທີ່​ວ່າ: “ການ​ທູດ​ລັດ​ຖະ​ສະພາ​ເພື່ອ​ອາ​ຊຽນ​ທີ່​ໜຽວ​ແໜ້ນ ແລະ ຕອບ​ສະໜອງ​ຕໍ່​ສະພາບ​ການ” ຊຶ່ງ​ເປັນ​ການ​ຜັນ​ຂະຫຍາຍ​ເນື້ອ​ໃນ​ຈິດໃຈ​ຂອງ​ກອງ​ປະຊຸມ​ສຸດ​ຍອດ​ຜູ້ນຳ​ອາ​ຊຽນ​ຄັ້ງ​ທີ 36 ທີ່​ໃຫ້​ຄວາມ​ສຳຄັນ​ແກ່​ການ​ຮ່ວມ​ມື​ທີ່​ໃກ້ຊິດ​ກວ່າ​ເກົ່າ​ລະຫວ່າງ​ສະມາຊິກ​ອາ​ຊຽນ ແລະ ຄູ່​ຮ່ວມ​ອາ​ຊຽນ​ເພື່ອ​ຮັບ​ມື​ກັບ​ບັນດາ​ສິ່ງ​ທ້າ​ທາຍ​ທີ່​ເກີດ​ຂຶ້ນ​ໃນ​ພາກ​ພື້ນ​ອາ​ຊຽນ. 

ເພື່ອ​ເປັນ​ການ​ຮັບ​ມື​ກັບ​ສິ່ງ​ທ້າ​ທາຍ​ທັງ​ຮູບ​ແບບ​ເກົ່າ ແລະ ໃໝ່​ທີ່​ເກີດ​ຂຶ້ນ​ໃນ​ພາກ​ພື້ນ​ອາ​ຊຽນ ກໍ​ຄື​ໃນ​ໂລກ, ໃນ​ໄລຍະ​ຜ່ານ​ມາ ໄອ​ປາ ໃນ​ນາມ​ທີ່​ເປັນ​ຕົວ​ແທນ​ຂອງ​ປະຊາຊົນ​ອາ​ຊຽນ ກໍ​ໄດ້​ເຮັດ​ບົດບາດ​ການ​ທູດ​ລັດ​ຖະ​ສະພາ​ດ້ວຍ​ຄວາມ​ເປັນ​ເຈົ້າ​ການ​ເຂົ້າ​ໃນ​ການ​ຊຸກຍູ້​ສົ່ງເສີມ​ການ​ຮ່ວມ​ມື​ຢ່າງ​ໃກ້ຊິດ​ລະຫວ່າງ​ສະມາຊິກ​ໄອ​ປາ​ດ້ວຍ​ກັນ, ລວມ​ທັງ​ການ​ພິຈາລະນາ​ຮັບຮອງ​ເອົາ​ມະຕິ​ທີ່​ສຳຄັນ​ຫຼາຍ​ສະບັບ​ໃນ​ກອງ​ປະຊຸມ​ໃຫຍ່​ປະຈຳ​ປີ​ຂອງ​ຕົນ​ກໍໍ​ຄື​ການ​ປະກອບສ່ວນ​ເຂົ້າ​ໃນ​ຂະບວນ​ການ​ສ້າງ​ປະຊາ​ຄົມ​ອາ​ຊຽນ​ທີ່​ໜຽວ​ແໜ້ນ ແລະ ຕອບ​ສະໜອງ​ຕໍ່​ສະພາບ​ການ. ແນໃສ່​ຊຸກຍູ້​ສົ່ງເສີມ​ການ​ຮ່ວມ​ມື​ທາງ​ດ້ານ​ເສດ​ຖະ​ກິດ​-​ສັງຄົມ ແລະ ການ​ເມືອງ​-​ຄວາມ​ໝັ້ນຄົງ​ຂອງ​ພາກ​ພື້ນ​ອາ​ຊຽນ​ບົນ​ຫຼັກ ການ​ຄວາມ​ເປັນ​ເອກະສັນ; ສົ່ງເສີມ​ການ​ມີ​ສ່ວນ​ຮ່ວມ​ຂອງ​ປະຊາຊົນ​ກໍ​ຄື​ທຸກ​ພາກສ່ວນ​ໃນ​ສັງຄົມ​ເຂົ້າ​ໃນ​ຂະບວນ​ການ​ສ້າງ​ປະຊາ​ຄົມ​ອາ​ຊຽນ; ຕອບ​ສະໜອງ​ທາງ​ດ້ານ​ນິຕິ​ກຳ​ທີ່​ມີ​ຄວາມ​ສອດຄ່ອງ​ກົມກຽວ​ກັນ, ຮັບປະກັນ​ໃຫ້​ແກ່​ການ​ຄຸ້ມ​ຄອງ​ລັດ​-​ຄຸ້ມ​ຄອງ​ສັງຄົມ​ດ້ວຍ​ກົດໝາຍ; ແລກປ່ຽນ​ບົດຮຽນ ແລະ ປະສົບ​ການ​ທີ່​ດີ​ນຳ​ກັນ​ໃນ​ການ​ປະຕິບັດ​ໜ້າທີ່​ຂອງ​ລັດ​ຖະ​ສະພາ​ສະມາຊິກ​ໄອ​ປາ;  ເປັນ​ເຈົ້າ​ການ​ໃນ​ການ​ພິຈາລະນາ​ໃຫ້​ສັດຕະຍາບັນ​ແກ່​ສົນທິສັນຍາ ແລະ ສັນຍາ​ຕ່າງໆ​ໃນ​ຂອບ​ການ​ຮ່ວມ​ມື​ອາ​ຊຽນ​ເພື່ອ​ຮັບປະກັນ​ໃຫ້​ແກ່​ການຈັດຕັ້ງ​ປະຕິບັດ​ວິໄສ​ທັດ​ປະຊາ​ຄົມ​ອາ​ຊຽນ 2025 ແລະ ແຜນ​ແມ່​ບົດ​ຂອງ​ສາມ​ເສົາ​ຄໍ້າ​ປະຊາ​ຄົມ​ອາ​ຊຽນ 2025 ໃຫ້​ປະກົດ​ຜົນ​ເປັນ​ຈິງ. 

ໃນ​ປີ 2020 ນີ້, ໂລກ ກໍ​ຄື​ພາກ​ພື້ນ​ອາ​ຊຽນ​ພວກ​ເຮົາ ໄດ້​ປະ​ເຊີນ​ໜ້າ​ກັບ​ສິ່ງ​ທ້າ​ທາຍ​ຫຼາຍ​ຢ່າງ ເປັນຕົ້ນ​ແມ່ນ​ບັນຫາ​ການ​ແຜ່​ລະບາດ​ຂອງ​ພະຍາດ​ໂຄ​ວິດ-19, ໄພພິບັດ​ທາງ​ທຳ​ມະ​ຊາດ ແລະ ອື່ນໆ ຊຶ່ງ​ໄດ້​ສົ່ງ​ຜົນ​ກະທົບ​ຢ່າງ​ໜັກໜ່ວງ ຕໍ່​ການ​ພັດທະນາ​ເສດ​ຖະ​ກິດ​-​ສັງຄົມ, ສະຖຽນ​ລະ​ພາບ ແລະ ຄວາມ​ໝັ້ນຄົງ​ຂອງ​ພາກ​ພື້ນ ແລະ ​ໃນ​ໂລກ. ຕໍ່ໜ້າ​ສະພາບ​ການ​ດັ່ງກ່າວ, ຂ້າພະເຈົ້າ ຕີ​ລາຄາ​ສູງ ຕໍ່​ມາດ​ຕະການ​ຕອບ​ໂຕ້​ຢ່າງ​ທັນ​ການ​ຂອງ​ອາ​ຊຽນ ໂດຍ​ສະເພາະ​ຫວຽດນາມ ໃນ​ ນາມ​ປະທານ​ອາ​ຊຽນ ທີ່​ໄດ້ຈັດ ​ກອງ​ປະຊຸມ​ສຸດ​ຍອດອາຊຽນ ແລະ ອາ​ຊຽນ​ບວກ​ສາມ​ສະ ໄໝ​ພິເສດ ແລະ ກອງ​ປະຊຸມ​ລະຫວ່າງ​ຜູ້ນຳ​ໄອ​ປາ ແລະ​ ຜູ້ນຳ​ອາ​ຊຽນ​ແບບ​ທາງໄກ ຂຶ້ນ ໃນ​ເດືອນເມສາ ທີ່​ຜ່ານມາ ຊຶ່ງ​ບັນດາ​ຜູ້ນຳ​ອາ​ຊຽນ ແລະ ຄູ່​ຮ່ວມ​ມື ແລະ​ ຜູ້​ນໍາອົງການ​ນິຕິ ບັນຍັດໄດ້​ຢືນຢັນ ​ເຖິງ​ຄວາມ​ໝາຍ​ໝັ້ນ ທີ່​ຈະ​ຮ່ວມ​ມື​ກັນ​ໃນ​ການ​ຕອບ​ໂຕ້​ກັບ​ພະຍາດ​ລະບາດ​ດັ່ງ​ກ່າວ. ຈາກ​ຜົນ​ຂອງ​ກອງ​ປະຊຸມ ແລະ ການ​ນຳໃຊ້​ ມາດ​ຕະການ​ຕ່າງໆ​ໄດ້​ຢັ້ງ​ຍືນ​ໃຫ້​ເຫັນ​ວ່າຄວາມ​ສ່ຽງ​ຈາກ​ການ​ແຜ່​ລະບາດ​ຂອງ​ພະຍາດ​ໂຄ​ວິດ-19 ໃນ​ບັນດາ​ປະເທດ​ສະມາຊິກ​ອາ​ຊຽນ​ແມ່ນ​ຢູ່​ໃນ​ເກນ​ທີ່​ສາມາດ​ຄວບ​ຄຸມ​ໄດ້. 

ສປປ ລາວ ພວກ​ຂ້າພະ ເຈົ້າ ໄດ້​ຈັດ​ຕັ້ງ​ປະຕິບັດ​ຖະແຫຼງ ການ​ຮ່ວມ​ຂອງ​ຜູ້ນຳ​ອາ​ຊຽນ​ກ່ຽວ​ກັບ​ການ​ຕ້ານ​ການ​ແຜ່​ລະ ບາດ​ຂອງ​ພະຍາດ​ໂຄ​ວິດ-19 ແລະ ເອົາໃຈໃສ່​ເຝົ້າ​ລະວັງ, ຄວບ​ຄຸມ ແລະ ແກ້​ໄຂ​ການ​ແຜ່​ລະບາດ​ຂອງ​ພະຍາດ​ດັ່ງກ່າວ​ຢ່າງ​ທັນ​ການ​ດ້ວຍ​ການ​ອອກ​ນິຕິ​ກໍາ, ໂຄສະນາ​ເຜີຍແຜ່​ມາດ​ຕະການ​ເພື່ອ​ສະກັດ​ກັ້ນ ແລະ ຕ້ານ​ກັບ​ການ​ແຜ່​ລະບາດ​ຂອງ​ພະຍາດ​ດັ່ງກ່າວ​ໄປ​ຄວບ​ຄູ່​ກັບ​ການ​ປຸກລະດົມ​ໃຫ້​ອົງການ ຈັດ​ຕັ້ງ​ລັດ, ພາກສ່ວນ​ທຸລະ​ກິດ, ຄອບຄົວ ແລະ ຊຸມ​ຊົນ​ໃນ​ທົ່ວ​ສັງຄົມ​ເຂົ້າ​ຮ່ວມ​ຈັດ​ຕັ້ງ​ປະຕິບັດ​ຢ່າງ​ເຂັ້ມ​ງວດ ຊຶ່ງ​ມາ​ຮອດ​ ປັດຈຸ ບັນ​ນີ້, ສປປ ລາວ ມີ​ຜູ້​ຕິດເຊື້ອ​ທັງ​ໝົດ 22 ຄົນ, ປິ່ນປົວ​ຫາຍ​ດີ 21 ຄົນ, ສາມາດ​ຄວບ​ຄຸມ ແລະ ຮັບປະກັນ​ໄດ້​ຊີວິດ​ຂອງ​ປະຊາຊົນ​ຈາກ​ໄພ​ຄຸກ​ຄາມ​ຢ່າງ​ຮ້າຍ​ແຮງ​ຂອງ​ພະຍາດ​ໂຄ​ວິດ​ດັ່ງ​ກ່າວ. ໄປ​ຄຽງ​ຄູ່​ກັນ​ນັ້ນ, ລັດຖະບານ​ກໍ​ໄດ້​ເອົາໃຈໃສ່​ແກ້​ໄຂ​ຜົນ​ກະທົບ​ທາງ​ດ້ານ​ເສດຖະກິດ​ຈາກ​ການ​ແຜ່​ລະບາດ​ຂອງ​ພະຍາດ​ດັ່ງກ່າວ​ດ້ວຍ​ການ​ວາງ​ນະໂຍບາຍ, ມາດ​ຕະການ​ດ້ານ​ເສດ​ຖະ​ກິດ​-​ການ​ຄ້າ​-​ການ​ເງິນ​-​ເງິນຕາ ເພື່ອ​ຟື້ນ​ຟູ ແລະ ສົ່ງເສີມ​ການ​ຜະລິດ​ທຸລະ​ກິດ ແລະ ການ​ບໍລິການ​ໂດຍ​ສະເພາະ​ແມ່ນ​ການ​ເລີ່ມ​ຕົ້ນ​ເຮັດ​ທຸລະ​ກິດ​ແບບ​ໃໝ່​ຂອງ​ໄວ​ໜຸ່ມ​ຜ່ານ​ລະບົບ​ອອນ​ລາຍ​ເພີ່ມ​ຂຶ້ນ. 

Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)