ຮອງລັດຖະມົນຕີກະຊວງກະສິກຳ ແລະປ່າໄມ້ ເຄື່ອນໄຫວເຮັດວຽກຢູ່ແຂວງຈຳປາສັກ

0
72

ໃນວັນທີ 7 ກັນຍາ 2020 ທີ່ສໍານັກງານຫ້ອງວ່າການ ແຂວງຈໍາປາສັກ, ທ່ານ ມະໄລທອງ ກົມມະສິດ ຄະນະປະຈຳພັກແຂວງ ຮອງເຈົ້າ ແຂວງຈຳປາສັັກ ພ້ອມຄະນະໄດ້ຕ້ອນຮັບ ທ່ານ  ລິນຄຳ ດວງສະຫວັນ ຮອງລັດຖະມົນຕີ ກະຊວງກະສິກຳ ແລະ ປ່າໄມ້ ພ້ອມດ້ວຍຄະນະ ໃນໂອກາດເດີນທາງ ມາເຄື່ອນໄຫວວຽກງານ ຢູ່ແຂວງຈຳປາສັກ ໃນຄັ້ງນີ້.

ໂອກາດດັ່ງກ່າວ, ທ່ານ ມະໄລທອງ ກົມມະສິດ ໄດ້ສະແດງຄວາມຍິນດີຕ້ອນຮັບ ໃນນາມເປັນຜູ້ຊີ້ນຳ ອະນຸກຳມະການເນື້ອໃນຂັ້ນແຂວງ ຖືໂອກາດນີ້ ລາຍງານ ໃຫ້ທ່ານຮອງລັດຖະມົນຕີ ພ້ອມຄະນະ ຮູ້ເຖິງທິດທາງແຜນ ພັດທະນາເສດຖະກິດ ຂອງແຂວງຈຳປາສັກ, ໄດ້ສຸມໃສ່ໃນການ ກະກຽມດຳເນີນກອງ ປະຊຸມໃຫຍ່ ອົງຄະນະພັກ ແຂວງຈຳປາສັກ ສະໄໝທີ VIII, ຮ່າງແຜນພັດທະນາ ເສດຖະກິດ-ສັງຄົມ 5 ປີ ຂອງແຂວງ, ເຊິ່ງໄດ້ຕິດພັນກັບ ວຽກງານກະສິກຳ ແລະ ປ່າໄມ້, ແຂວງໄດ້ກໍານົດເອົາ ວຽກງານກະສິກຳ ແລະ ປ່າໄມ້ ເປັນ 1 ໃນ 6 ວຽກພື້ນຖານ ໃນການຂັບເຄື່ອນເສດຖະກິດ ຢູ່ແຂວງຈຳປາສັກ.

ທ່ານ ລິນຄຳ ດວງສະຫວັນ ກ່າວວ່າ: ການລົງມາເຮັດວຽກໃນຄັ້ງງນີ້, ແມ່ນ ເພື່ອຮ່ວມປຶກສາຫາລື, ສຸມໃສ່ແຜນງານຄ້ຳປະກັນ ສະບຽງອາຫານ, ໂພຊະນາ ການ, ການເຊື່ອມໂຍງຕະຫລາດ ຢູ່ແຂວງຈຳປາສັກ ແລະ ໃຫ້ຄຳແນະນຳໃນຂົງເຂດ ວຽກງານກະສິກຳ ແລະ ປ່າໄມ້, ການຍາດແຍ່ງການຮ່ວມມືຈາກສາກົນ ສ້າງເງື່ອນໄຂ ການຄ້າກັບ ບັນດາປະເທດເພື່ອນມິດ, ໃກ້ຄຽງ ແລະ ປະເທດຄູ່ຮ່ວມມືຍຸດທະສາດ, ຈັດຕັ້ງປະຕິບັດແຜນ ການຜະລິດລະດູແລ້ງ ແລະ ຄວາມຄືບໜ້າ ການ ຊຸກຍູ້ສົ່ງເສີມການຜະ ລິດລະດູຝົນ ປີ 2020 ລວມທັງການສົ່ງອອກສິນຄ້າກະສິກໍາ, ສະພາບການຈັດຕັ້ງປະຕິບັດ ວຽກງານການປ້ອງກັນ ຮັບມືກັບໄພທຳມະຊາດ ແລະ ທິດທາງການປູກພືດ-ລ້ຽງສັດ ເປັນສິນຄ້າສົ່ງອອກຕ່າງປະເທດ ຕາມທ່າແຮງຂອງແຕ່ລະທ້ອງຖິ່ນ. ພ້ອມນີ້, ທ່ານຮອງລັດຖະມົນຕີ ຍັງໄດ້ ຮັບເອົາບາງຄຳສະເໜີ ຈາກແຂວງຈຳປາສັກ ກັບໄປຄົ້ນຄວ້າປຶກສາ ຫາລືໃນຄະນະນຳ ຂອງກະຊວງກະສິກຳ ແລະ ປ່າໄມ້ ໃນຂັ້ນຕໍ່ໄປ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)