ໃນວັນທີ 10 ກັນຍາ 2020 ທີ່ ຫ້ອງປະຊຸມ ສຳນັກງານໜັງພິມພາສາຕ່າງປະເທດ, ສະມາຄົມນັກຂ່າວ ແຫ່ງ ສປປ ລາວ ໄດ້ກອງປະຊຸມ ຄົ້ນຄວ້າທິດຊີ້ນໍາຂອງທ່ານນາຍົກລັດຖະມົນຕີ ທີ່ກ່າວໃນງານສະຫຼອງວັນສື່ມວນຊົນ ແລະ ພິມຈໍາໜ່າຍຄົບຮອບ 70 ປີ ທີ່ວ່າ: ສື່ມວນຊົນຕ້ອງເປັນ “ຜູ້ກ້າປາກອອກແສງ, ຜູ້ຮູ້ແທງຈິດໃຈ, ຜູ້ສະດຸ້ງໄວເມື່ອອ່ານ, ຜູ້ຮູ້ຜ່ານອຸປະສັກ, ຜູ້ທີ່ຮັກຄວາມຈິງ, ຜູ້ທີ່ຍິງຖືກເປົ້າ”, ໂດຍການເປັນປະທານຂອງ ທ່ານສະຫວັນຄອນ ຣາຊມຸນຕຣີ,  ຮອງລັດຖະມົນຕີກະຊວງ ຖວທ, ປະທານສະມາຄົມນັກຂ່າວ ແຫ່ງ ສປປ ລາວ ພ້ອມດ້ວຍ ຫົວໜ້າກົມ, ຫົວໜ້າບັນນາທິການ, ສະມາຄົມນັກຂ່າວ ແຫ່ງ ສປປ ລາວ, ສະພາການຄ້າ ແລະ ອຸດສາຫະກໍາແຫ່ງຊາດລາວ, ນັກວິທະຍາກອນ ແລະ ແຂກຮັບເຊີນ.

ກອງປະຊຸມດັ່ງກ່າວ, ແມ່ນເພື່ອປຶກສາຫາລື ແລະ ແລກປ່ຽນຄໍາຄິດຄໍາເຫັນໃນການຜັນຂະຫຍາຍ ແລະ ຈັດຕັ້ງປະຕິບັດທິດທາງແຜນພັດທະນາຄຸນນະພາບວຽກງານສື່ມວນຊົນທີ່ໄດ້ສະເໜີຢູ່ໃນງານໂຮມຊຸມນຸມສະເຫຼີມສະຫຼອງວັນສື່ມວນຊົນ ແລະ ພິມຈໍາໜ່າຍ ຄົບຮອບ 70 ປີ (13/08/1950-2020) ທີ່ໄດ້ຈັດຂຶ້ນໃນວັນທີ 14 ສິງຫາ 2020 ແລະ ຄົ້ນຄວ້າຄໍາໂອ້ລົມຂອງທ່ານນາຍົກໃນເວທີດັ່ງກ່າວ ໃຫ້ມີຄວາມເຂົ້າໃຈເປັນເອກະພາບ ແລະ ນໍາໄປປະຕິບັດຕົວຈິງ ບົນພື້ນຖານແນວທາງທັດສະນະຂອງພັກ ໃນການໂຄສະນານໍາພາຫາງສຽງສັງຄົມໃນທຸກບັນຫາ ແລະ ເຫດການ ທີ່ກ່າວໄວ້ໃນມະຕິ 36 ກົມການເມືອງສູນກາງພັກ, ເຊິ່ງໄດ້ຜັນຂະຫຍາຍອອກເປັນກົດໝາຍສື່ມວນຊົນ ແລະ ນິຕິກຳລຸ່ມກົດໝາຍຕ່າງໆ.

ຕໍ່ເວົ້າຂອງທ່ານນາຍົກ ທີ່ວ່າ: ສື່ມວນຊົນຕ້ອງເປັນ “ຜູ້ກ້າປາກອອກແສງ, ຜູ້ຮູ້ແທງຈິດໃຈ, ຜູ້ສະດຸ້ງໄວເມື່ອອ່ານ, ຜູ້ຮູ້ຜ່ານອຸປະສັກ, ຜູ້ທີ່ຮັກຄວາມຈິງ, ຜູ້ທີ່ຍິງຖືກເປົ້າ” ພວກເຮົາຈະໄດ້ເອົາແນວທາງ, ມະຕິ, ກົດໝາຍ ມາເຍືອງເບິ່ງຄວາມເປັນຈິງໃນການເຮັດໜ້າທີ່ຂອງສື່ພວກເຮົາ ເພື່ອໃຫ້ເຫັນໄດ້ຈຸດແຂງທີ່ຕ້ອງເສີມຂະຫຍາຍ ແລະ ຈຸດອ່ອນທີ່ຕ້ອງແກ້ໄຂໃຫ້ສາມາດຕອບສະໜອງຄວາມຮຽກຮ້ອງຕ້ອງການຂອງສັງຄົມໃນໄລຍະໃໝ່.

ໂດຍສະເພາະໃນໄລຍະພະຍາດໂຄວິດ -19 ທີ່ລະບາດຢູ່ໃນໂລກ ຮອດປະຈຸບັນກໍ່ຕ້ອງຮີບຮ້ອນປ່ຽນແປງ ແລະ ແກ້ໄຂແບບແຜນວິທີເຮັດວຽກໃຫ້ສອດຄ່ອງທ່ວງທັນຕາມສະພາບການ Newnormal. ພວກເຮົາຕ້ອງປັບປຸງປ່ຽນແປງໂດຍລຸກໃໝ່ນັ່ງໃໝ່ໃນການສະໜອງຂໍ້ມູນຂ່າວຜ່ານຜະລິດຕະພັນສື່ຂອງຕົນສູ່ສັງຄົມ ໂດຍພະຍາຍາມອອກຈາກແບບແຜນເຮັດຂ່າວ ກໍ່ຄືການໂຄສະນາແບບເກົ່າ ດັ່ງທີ່ນາຍົກ ວ່າ: “ເນື້ອໃນແຂງກະດ້າງຮູບແບບແຫ້ງກະແດ້ງ” ຂ່າວຊໍ້າຊາກແຕ່ອັນເກົ່າບໍ່ມີໃຜຢາກເບິ່ງ, ຢາກອ່ານ, ໄດ້ຟັງເທື່ອໜຶ່ງເບິ່ງເທື່ອໜຶ່ງກໍ່ເຊົາ ຫຼື ວ່າການຈັດລຳດັບການອອກຂ່າວຖືກແລ້ວບໍ? ປະດິດສ້າງແລ້ວບໍ? ການຈັດໜ້າໜັງສືພິມ, ຜັງລາຍການວິທະຍຸ, ໂທລະພາບຖືກຕາມຫຼັກວິຊາການທີ່ດຶງດູດຄົນແລ້ວບໍ? ຫຼືໜ້າໜັງສືພິມ, ລາຍການຂ່າວຢູ່ວິທະຍຸ ແລະ ໂທລະພາບສ່ວນຫຼາຍມີແຕ່ຂ່າວການຈັດກອງປະຊຸມຂອງພັກ-ລັດ, ເຊິ່ງເຮັດໃຫ້ສັງຄົມເຂົ້າໃຈວ່າລັດຖະບານລາວບໍ່ເຮັດຫຍັງມີແຕ່ປະຊຸມເປັນຕົ້ນແລະອື່ນໆ.

ນອກນັ້ນ, ຕ້ອງໄດ້ສໍາຫຼວດເບິ່ງຄວາມນິຍົມຂອງແຕ່ລະສື່, ແຕ່ລະຄໍລໍາ, ແຕ່ລະລາຍການເປັນແຕ່ລະໄລຍະເພື່ອສະໜອງຂໍ້ມູນຂ່າວສານໃຫ້ສັງຄົມຖືກຕ້ອງຊັດເຈນໄປເຖິງກຸ່ມເປົ້າໝາຍໄດ້ຢ່າງວ່ອງໄວ ແລະ ທັນການ. ພ້ອມດຽວກັນ, ກໍ່ເພີ່ມຄວາມເປັນເຈົ້າການ ແລະ ສະດຸ້ງໄວໃນການຕອບໂຕ້ກັບບັນຫາສິ່ງຫຍໍ້ທໍ້ ແລະ ອັດຕັນການພັດທະນາຕ່າງໆ ແລະ ກົນອຸບາຍຫັນປ່ຽນໂດຍສັນຕິຂອງອິດທິກຳລັງປໍລະປັກ ແລະ ການໃສ່ຮ້າຍປ້າຍສີຂອງກຸ່ມຄົນບໍ່ຫວັງດີເພື່ອທໍາລາຍຄວາມເຊື່ອຖືຕໍ່ການນໍາພັກ-ລັດຂອງພວກເຮົາ.

ເພື່ອໃຫ້ບັນລຸຈຸດປະສົງຂອງກອງປະຊຸມຄັ້ງນີ້,​ ທ່ານຮອງລັດຖະມົນຕີ ໄດ້ສະເໜີຕໍ່ກອງປະຊຸມວ່າ: ຈະເຮັດວຽກງານໃດກໍ່ຕາມໃຫ້ມີຄຸນນະພາບ ແລະ ໄດ້ມາດຕະຖານ ໃຜກໍຕ້ອງໄດ້ຮຽນຢູ່ຕະຫຼອດ ແລະ ເຮັດຖຶກຕາມຫຼັກຕາມສູດວິຊາການ, ຫັນເປັນວິຊາສະເພາະເປັນມືອາຊີບ. ຕົວຢ່າງ: ຜະລິດຕະພັນສື່ກໍ່ຕ້ອງມີຄວາມຫຼາກຫຼາຍທັງເນື້ອໃນ, ຮູບການ ແລະ ປະເພດທີ່ຖຶກຕ້ອງຕາມມາດຕະຖານ ບໍ່ສັບສົນ ປົນເປກັນ, ບໍ່ຕ່າງຫຍັງກັບການປຸງແຕ່ງອາຫານ ແຕ່ລະເຍື່ອງທີ່ມີສູດປະສົມ ແລະ ລັກສະນະສະເພາະຂອງແຕ່ລະຢ່າງ ເຊັ່ນ: ປົ່ນກໍ່ເປັນປົ່ນແທ້, ລາບກໍ່ແມ່ນລາບແທ້ ຈິ່ງຖຶກປາກຜູ້ກິນ.

ໃນນັ້ນ ທ່ານຮອງລັດຖະມົນຕີ ຍັງຮຽກຮ້ອງໃຫ້ບັນດາທ່ານໃນກອງປະຊຸມຈົ່ງໄດ້ຄົ້ນຄິດເວົ້າອອກ ແລກປ່ຽນກັນໃຫ້ແຕກໃຫ້ແຈ້ງໂດຍຍົກເອົາຕົວຢ່າງອອກມາເປັນກໍລະນີສຶກສາ ເພື່ອເຮັດໃຫ້ຜະລິດຕະພັນການໂຄສະນາຂອງພວກເຮົາທັນສະໄໝ ມີຄຸນນະພາບ, ໄດ້ມາດຕະຖານ ແລະ ຫຼາກຫຼາຍ, ມີຜູ້ບໍລິໂພກ, ມີຕະຫຼາດນັບມື້ນັບກວ້າງຂວາງທັງພາຍໃນ ແລະ ຕ່າງປະເທດ.

Medialaos MMD