ກອງປະຊຸມໃຫຍ່ ຄັ້ງທີ IV ສະມາຊິກສະຫະພັນແມ່ຍິງ ສານປະຊາຊົນສູງສຸດ

0
83

ກອງປະຊຸມໃຫຍ່  ຄັ້ງທີ IV ສະມາຊິກສະຫະພັນແມ່ຍິງ ສານປະຊາຊົນສູງສຸດ ໄດ້ເປີດຂຶ້ນເມື່ອວັນທີ 10 ກັນຍາ ຜ່ານມາ,ພາຍໃຕ້ການເປັນປະທານຂອງສະຫາຍ ນາງ ສຸກສະຫວາດ ບຸນມາແສງ ປະທານຄະນະບໍລິຫານງານສະຫະພັນແມ່ຍິງ ສານປະຊາຊົນສູງສຸດ (ສປສສ) ໃຫ້ກຽດເຂົ້າຮ່ວມ ຂອງສະຫາຍ ຄຳພາ ແສງດາລາ ປະທານສານປະຊາຊົນສູງສຸດ ,ສະຫາຍ ນາງ ບົວຈັນ ສີຫານາດ ຮອງປະທານຄະນະບໍລິຫານງານສູນກາງສະຫະພັນແມ່ຍິງລາວ ພ້ອມດ້ວຍແຂກຖືກເຊີນ ແລະ ສະມາຊິກແມ່ຍິງເຂົ້າຮ່ວມ.

ສະຫາຍ ນາງ ທັນສະໄໝ ຊາມົນຕີ ຮອງປະທານຄະນະບໍລິຫານງານສະຫະພັນແມ່ຍິງ ສປສສ ໄດ້ຜ່ານບົດສຳຫຼວດການຊີ້ນຳ-ນຳພາ ໄລຍະຜ່ານມາໂດຍຫຍໍ້ວ່າ:ໃນຕະຫຼອດໄລຍະ 5ປີ ຜ່ານມາ (2016-2020) ຄະນະບໍລິຫານງານສະຫະພັນແມ່ຍິງ ສປສສ ໄດ້ຖືເອົາວຽກງານສຶກສາອົບຮົມການເມືອງ-ນຳພາແນວຄິດຂອງສະມາຊິກກໍຄືເອື້ອຍນ້ອງແມ່ຍິງ ທີ່ຢູ່ໃນຄວາມຮັບຜິດຊອບຂອງຕົນເປັນວຽກງານແຖວໜ້າ ແນໃສ່ເຮັດໃຫ້ສະມາຊິກສະຫະພັນແມ່ຍິງເຊື່ອມຊຶມ, ກຳແໜ້ນແນວທາງນະໂຍບາຍຂອງພັກ ແລະ ລະບຽບກົດໝາຍຂອງລັດ, ສ້າງໃຫ້ເອື້ອຍນ້ອງແມ່ຍິງມີຄຸນທາດການເມືອງໜັກແໜ້ນ, ມີຄຸນສົມບັດສິນທຳປະຕິວັດ, ຍົກສູງນໍ້າໃຈຮັກຊາດ ຮັກລະບອບໃໝ່ ມີຄວາມຊື່ສັດບໍລິສຸດ ຈົ່ງຮັກພັກດີຕໍ່ພັກ-ລັດ ເຄົາລົບ ແລະ ປະຕິບັດລະບຽບວິໄນ ເປັນເຈົ້າການໃນການປະຕິບັດຂໍ້ແຂ່ງຂັນ 3 ດີ ທີ່ກອງປະຊຸມໃຫຍ່ຜູ້ແທນແມ່ຍິງລາວທົ່ວປະເທດໄດ້ຮັບຮອງເອົາ ໂດຍຕິດພັນກັບຂະບວນການຮັກຊາດ ແລະ ພັດທະນາ ຕິດພັນກັບຄຳຂວັນຂອງ ສປສສ ວາງອອກ ແລະ ຕິດພັນກັບແຜນການສ້າງໜ່ວຍພັກເຂັ້ມແຂງ-ຮູ້ນຳພາຮອບດ້ານ
ປັດຈຸບັນສະຫະພັນແມ່ຍິງ ສປສສ ມີທັງໝົດ 84 ສະຫາຍ,ທຽບໃສ່ກອງປະຊຸມຜ່ານມາແມ່ນເພີ່ມຂຶ້ນ ມີຄະນະບໍລິຫານງານສະຫະພັນແມ່ຍິງ 4 ສະຫາຍ ປະກອບມີ 8 ໜ່ວຍ.ສານປະຊາຊົນທົ່ວປະເທດ ມີລັດຖະກອນທັງໝົດ 1.932 ສະຫາຍ ໃນນີ້ ເປັນເພດຍິງມີທັງໝົດ 713 ສະຫາຍ ກວມ 37,16% ສະເພາະຢູ່ສານປະຊາຊົນສູງສຸດ ມີລັດຖະກອນທັງໝົດ 212 ສະຫາຍ ເພດຍິງ 48 ສະຫາຍ ກວມ 37,73%.

ຜົນງານອັນພົ້ນເດັ່ນໃນການປະກອບສ່ວນເຄື່ອນໄຫວວຽກງານດ້ານຕ່າງໆໄລຍະຜ່ານມາໄດ້ສະແດງອອກດັ່ງນີ້: ໄດ້ຮັບຫຼຽນໄຊແຮງງານ ຊັ້ນ I ຈຳນວນ 5 ສະຫາຍ ,ຫຼຽນໄຊແຮງງານຊັ້ນ II ຈຳນວນ 6 ສະຫາຍ ,ຫຼຽນໄຊແຮງງານຊັ້ນ III 13 ສະຫາຍ ,ຫຼຽນກາແຮງງານ 4 ສະຫາຍ ,ໃບຍ້ອງຍໍລັດຖະບານ 7 ສະຫາຍ,ໃບຍ້ອງຍໍປະທານສານປະຊາຊົນສູງສຸດ 177 ສະຫາຍ ແລະ ໃບຊົມເຊີຍຂອງປະທານສານປະຊາຊົນສູງສຸດ 47 ສະຫາຍ ນອກນັ້ນວຽກງານຈັດຕັ້ງປະຕິບັດຂໍ້ແຂ່ງຂັນ 3 ດີ ໄລຍະທ້າຍສະໄໝ (ສົກປີ 2019-2020) ຄະນະບໍລິຫານງານສະຫະພັນແມ່ຍິງ ໄດ້ມີການປະສານສົມທົບກັບບັນດາໜ່ວຍສະຫະພັນແມ່ຍິງທີ່ຂຶ້ນກັບ ເພື່ອສະຫຼຸບຕີລາຄາ ພ້ອມກັນຄັດເລືອກແມ່ຍິງ 3 ດີ ໃນແຕ່ລະໜ່ວຍ ຜ່ານການປະຕິບັດຂະບວນການແຂ່ງຂັນ ສາມາດຄັດເລືອກໄດ້ແມ່ຍິງ 3 ດີປະເພດ I ຈຳນວນ 79 ສະຫາຍ,ປະເພດ II ຈຳນວນ 7 ສະຫາຍ ແລະ ຄັດເລືອກໜ່ວຍແມ່ຍິງ 3 ດີ ໄດ້ສາມໜ່ວຍ.

ກອງປະຊຸມດັ່ງກ່າວ ຍັງໄດ້ມີການປ່ອນບັດຄັດເລືອກເອົາຄະນະບໍລິຫານງານສະຫະພັນ ແມ່ຍິງ ສານປະຊາຊົນສູງສຸດຊຸດໃໝ່ .ກອງປະຊຸມຄັ້ງປະຖົມມະລືກໄດ້ເປັນເອກະພາບເລືອກເອົາສະຫາຍ ນາງ ສຸກສະຫວາດ ບຸນມາແສງ ເປັນປະທານຄະນະບໍລິຫານງານສະຫະພັນແມ່ຍິງ ສານປະຊາຊົນສູງສຸດ ແລະ ສະຫາຍ ນາງ ປະພອນຈິດ ຈັນທະຈັກ ເປັນຮອງປະທານ ທັງເປັນປະທານກວດກາ.

Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)