ຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂ ພະຍາດ​ອັກ​ເສບ​ປອດ​ທີ່​ເກີດ​ຈາກ​ເຊື້ອຈຸລະ​ໂລກ​ສາຍ​ພັນໃໝ່ COVID-19 ຖະແຫຼງຂ່າວປະຈໍາວັນສຸກວັນທີ11 ກັນຍາ ປີ2020 ໂດຍ: ທ່ານ ດຣ. ສີສະຫວາດ ສຸດທານີລະໄຊ, ຮອງຫົວໜ້າກົມຄວບຄຸມພະຍາດຕິດຕໍ່, ​ກະຊວງສາທາລະນະສຸກ.

ກ່ຽວກັບສະພາບການລະບາດ​ຂອງ​ພະ​ຍາດ COVID-19 ຂອງບັນ​ດາປະເທດໃກ້ຄຽງ ແລະ ໃນໂລກ: ມາຮອດວັນທີ11 ກັນຍາ 2020, ທົ່ວໂລກມີການລາຍງານການລະບາດ ທັງໝົດ 213 (ປະເທດ/ເຂດ), ເຊິ່ງມີການຢັ້ງຢືນຜູ້ຕິດເຊື້ອພະຍາດ COVID-19 ແມ່ນ 28,292,747 ຄົນ; ເສຍຊິວິດ 912,754 ຄົນ ເຊິ່ງກວມເອົາ 3.22 % ຂອງຜູ້ຕິດເຊື້ອທັງໝົດ; ປີ່ນປົວຫາຍດີ 20,316,484 ຄົນ ເຊິ່ງກວມເອົາ 71.8% ຂອງຜູ້ຕິດເຊື້ອທັງໝົດ. ສ່ວນຢູ່ຂົງເຂດອາຊີຂອງພວກເຮົາກໍ່ແມ່ນປະເທດອິນເດຍທີ່ມີທ່າອ່ຽງໃນການຕິດເຊື້ອ COVID-19 ເພິ່ມຂຶ້ນ, ຈຳນວນຜູ້ຕິດເຊື້ອມື້ດຽວສູງເຖິງ96,760ຄົນ. ສຳລັບໃນບັນດາກຸ່ມປະເທດອາຊຽນ ມາຮອດວັນທີ 11 ກັນຍາ 2020 ມີການຢັ້ງຢືນຜູ້ຕິດເຊື້ອພະຍາດ COVID-19 ແມ່ນ 530,112 ຄົນ ແລະ ເສຍຊີວິດ 12,787 ຄົນ.

ສຳລັບ ສປປ ລາວ ໄດ້ສືບຕໍ່ສຸມໃສ່ເກັບຕົວຢ່າງມາກວດວິເຄາະ ແລະ ຄົ້ນຫາຜູ້ຕິດເຊື້ອພະຍາດ; ມາໃນວັນທີ 10 ກັນຍາ 2020 ໄດ້ເກັບຕົວຢ່າງມາກວດວິເຄາະທັງໝົດ 418 ຄົນ, ໃນນັ້ນມີ ນັກກິລາກອງທັບເດິນທາງກັບມາແຕ່ ສ.ຣັດເຊຍ, ແຮງງານລາວມາແຕ່ໄທ 394 ຕົວຢ່າງ, ແຮງງານລາວມາແຕ່ຫວຽດນາມ 06 ຕົວຢ່າງ, ແຮງງານລາວມາແຕ່ຈີນ 03 ຕົວຢ່າງ, ບຸກຄົນທົ່ວໄປທີ່ມີອາການ 07 ຕົວຢ່າງ ແລະ ບຸກຄົນທົ່ວໄປທີ່ບໍ່ມີອາການ 08 ຕົວຢ່າງ; ຜົນກວດວິເຄາະທັງໝົດແມ່ນ ແມ່ນພົບຜູ້ຕິດເຊື້ອ ຈຳນວນ 01 ຕົວຢ່າງ ແມ່ນ ເພດຊາຍ ອາຍຸ 29 ປີ, ສັນຊາດ: ລາວ, ອາຊີບ: ນັກກິລາກອງທັບ, ບັນຊາລົດຖັງ. ເຊິ່ງຜູ້ກ່ຽວໄດ້ເດີນທາງກັບມາຈາກການແຂ່ງຂັນກິລາຢູ່ ສ. ຣັດເຊຍ ແລະ ກວດພົບເຊື້ອຢູ່ສູນຈຳກັດບໍລິເວນຫຼັກ 27. (ກໍລະນີ 023)

ສຳລັບຜູ້ເດິນທາງຮ່ວມ ແລະ ຜູ້ໃກ້ຊິດຜູ້ຕິດເຊື້ອ ຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂ ພະຍາດ​ອັກ​ເສບ​ປອດ​ທີ່​ເກີດ​ຈາກ​ເຊື້ອຈຸລະ​ໂລກ​ສາຍ​ພັນໃໝ່ COVID-19 ໄດ້ເກັບຕົວຢ່າງໄປກວດ ແລະ ໃຫ້ສືບຕໍ່ກັກໂຕຕາມລະບຽບໃຫ້ຄົບຈຳນວນ 14 ວັນ.

Medialaos MMD (ແຫຼ່ງຂໍ້ມູນຈາກ: ສູນຂ່າວສານການແພດສຸຂະສຶກສາ)