ໃນວັນທີ 11 ກັນຍາ 2020 ສະຫາຍ ພັນຄຳ ວິພາວັນ ກຳມະການກົມການ ເມືອງສູນກາງພັກ, ຜູ້ປະຈຳການຄະນະເລຂາ ທິການສູນກາງພັກ, ຮອງປະທານປະເທດແຫ່ງ ສປປ ລາວ ພ້ອມຄະນະ ໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງສາລະວັນ ເພື່ອເຂົ້າຮ່ວມພິທີມອບ-ຮັບ ໜ້າທີ່ ລະຫວ່າງ ສະຫາຍ ສີສຸວັນ ວົງຈອມສີ ກຳມະການສູນກາງພັກ, ເລຂາພັກແຂວງ, ເຈົ້າແຂວງສາລະວັນ (ຜູ້ເກົ່າ) ອອກພັກການຮັບອຸດໜູນບຳນານ ແລະ ສະຫາຍ ໂພໄຊ ໄຊຍະສອນ ກຳມະການສຳຮອງ ສູນກາງພັກ ເປັນເລຂາພັກແຂວງ, ຮັກສາການເຈົ້າ ແຂວງສາລະວັນ ໂດຍອີງຕາມເອກະສານເລກທີ 116/ກມສພ ລົງວັນທີ 19/8/2020 ແລະ ເອກະສານເລກທີ 031.ກມສພ ກົມການເມືອງສູນກາງພັກ.

ໃນພິທີ ສະຫາຍ ພັນຄຳ ວິພາວັນ ໄດ້ເນັ້ນໃຫ້ເຈົ້າແຂວງຄົນໃໝ່ ປະສານສົມທົບກັບ ພະນັກງານຫລັກແຫລ່ງຂອງແຂວງ ເພື່ອຊຸກຍູ້ການປະຕິບັດ ວຽກງານຕ່າງໆ ແລະ ກຽມກອງ ປະຊຸມໃຫຍ່ 3 ຂັ້ນຈົນສຳເລັດກອງປະຊຸມໃຫຍ່ຄັ້ງທີ IX ຂອງແຂວງ, ເຊິ່ງການປະຕິບັດວຽກງານ ຕ້ອງເຮັດແບບລວມສູນ ປະຊາ ທິປະໄຕ ບຸກຄົນຮັບຜິດຊອບ ຕັດສິນເປັນໝູ່ຄະນະ ເພື່ອລາຍງານຂັ້ນເທິງ; ຮັກສາຄວາມສາມັກຄີ, ຄວາມເປັນເອກະພາບພາຍໃນ ໂດຍສະເພາະແມ່ນຄະນະພັກ ຄວນສົມທົບກັບພະນັກງານບຳນານ ເພື່ອຖອດຖອນບົດຮຽນ; ຍຶດໝັ້ນມູນເຊື້ອ ອັນດີງາມ ແລະ ຮັກສາມູນເຊື້ອ ອັນພິລະອາດຫານ ເພື່ອເປັນການສຶກສາອົບຮົມໃຫ້ແກ່ພະນັກງານຫລັກແຫລ່ງ ໃຫ້ມີຄວາມໜັກແໜ້ນ ທາງດ້ານການເມືອງ, ການກະກຽມກອງປະ ຊຸມໃຫຍ່ຄັ້ງທີ IX ຂອງແຂວງ ຕ້ອງໄດ້ມີການກະກຽມ ຢ່າງຮອບດ້ານ ທັງດ້ານບຸກຄະລາກອນ, ເນື້ອໃນ ແລະ ຂະບວນການ ໂດຍການຕັດສິນໃຈສົ່ງເສີມອັນດີເລີດ ແລະ ແກ້ໄຂບັນຫາຄົງຄ້າງ. ສຳລັບຜູ້ແທນ ທີ່ຈະເຂົ້າຮ່ວມ ກອງປະຊຸມໃຫຍ່ ຕ້ອງມີຄວາມຮັບຜິດຊອບ ທາງດ້ານການເມືອງ ໃນການປ່ອນບັດເລືອກຕັ້ງ ແລະ ລົງປະຊາມະຕິ.

ໂອກາດດຽວກັນ, ສະຫາຍ ສີສຸວັນ ວົງຈອມສີ ກໍໄດ້ໃຫ້ຮູ້ວ່າ: ໃນໄລຍະທີ່ທົ່ວແຂວງ ກຳລັງກະ ກຽມສຸມໃສ່ ການດຳເນີນກອງປະຊຸມໃຫຍ່ 3 ຂັ້ນຂອງພັກ ເພື່ອເປັນການປູພື້ນຖານ ໃຫ້ແກ່ການດຳເນີນ ກອງປະຊຸມໃຫຍ່ ຄັ້ງທີ IX ຂອງແຂວງ, ບັນຫາຫລັກກໍແມ່ນ ການກໍານົດແນວທາງ ຍຸດທະສາດ, ແຜນຍຸດທະສາດການ ພັດທະນາ ເສດຖະກິດ-ສັງຄົມ, ການກະກຽມທາງ ດ້ານບຸກຄະລາກອນ ເພື່ອສະໝັກເຂົ້າໃນຄະ ນະບໍລິຫານງານພັກ ແຂວງຊຸດໃໝ່ ແລະ ບັນຫາອື່ນໆ ທີ່ສຳຄັນຈຳນວນໜຶ່ງ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)