ໃນວັນທີ 10 ກັນຍາ 2020 ຢູ່ຂົວມິດຕິພາບລາວ-ໄທ ແຫ່ງທີ 4 ແຂວງ ບໍ່ແກ້ວ ໄດ້ມີພິທີມອບ-ຮັບແຮງານລາວ ທີ່ໄປເຮັດວຽກຢູ່ປະເທດໄທ ຈຳນວນ 27 ຄົນ, ຍິງ 09  ຄົນກັບຄືນປະເທດ. ໃນນີ້, ແຮງງານຢູ່ແຂວງບໍ່ແກ້ວ 21 ຄົນ, ແຂວງຈຳປາສັກ, ອຸດົມໄຊ ແລະ ຫລວງພະບາງ ແຂວງລະ 2 ຄົນ. ຈາກນັ້ນ, ຄະນະສະເພາະກິດເພື່ອປ້ອງກັນ, ຄວາມຄຸມ ແລະ ແກ້ໄຂພະຍາດ ໂຄວິດ-19 ແຂວງບໍ່ແກ້ວ ຈະໄດ້ນຳສົ່ງໄປຈຳກັດບໍລິເວນ ຢູ່ສູນບ້ານມົກກະຕອກ ເມືອງຫ້ວຍຊາຍ ແລະ ໃນວັນດຽວກັນ ຄະນະ ສະເພາະກິດແຂວງ ກໍໄດ້ນຳເອົາແຮງງານ ຈາກ ສປ ຈີນ ທີ່ມາສືບຕໍ່ແກ້ໄຂວຽກ ທີ່ຍັງຄ້າງຢູ່ແຂວງ ບໍ່ແກ້ວ ຈຳນວນ 12 ຄົນ ເຂົ້າມາຈໍາກັດບໍລິເວນ ຢູ່ສູນດັ່ງກ່າວເຊັ່ນດຽວກັນ.

ທ່ານ ນາງ ຈັນທອນ ໄຊຍະວົງ ຜູ້ຮັບຜິດຊອບສູນຈຳກັດ ບໍລິເວນພະຍາດ ໂຄວິດ-19 ແຈ້ງໃຫ້ຮູ້ວ່າ: ມາຮອດປັດຈຸບັນ ມີແຮງງານເຂົ້າມາຈຳກັດ ບໍລິເວນຢູ່ສູນດັ່ງກ່າວທັງໝົດ 263 ຄົນ, ຍິງ 130 ຄົນ ແລະ ໄດ້ອອກໃບຢັ້ງຢືນ ຕິດຕາມສຸຂະພາບຄົບ 14 ວັນ ຈໍານວນ 237 ຄົນ. ໃນໄລຍະຈຳກັດບໍລິເວນ 14 ວັນນັ້ນ, ຜູ້ຖືກຈຳກັດບໍລິເວນ ໄດ້ປະຕິບັດຕາມມາດຕະການ ຄື: ໃສ່ຜ້າອັດປາກ-ດັງ, ຮັກສາໄລຍະຫ່າງ 1 ແມັດຂຶ້ນໄປ ແລະ ມີແພດເຝົ້າຕິດຕາມ ອາການໃນແຕ່ລະວັນ, ມີການວັດອຸນຫະພູມເຊົ້າ-ແລງ, ເກັບຕົວຢ່າງມາກວດຫາ ເຊື້ອໂຄວິດ-19 ພາຍຫລັງຄົບ 14 ວັນ ຖ້າບໍ່ພົບເຊື້ອ ທາງຄະນະສູນຈະອອກໃບ ຢັ້ງຢືນໃຫ້  ແລະ ນຳສົ່ງກັບຄືນຫາຄອບຄົວ ເພື່ອໃຊ້ຊິດວິດເປັນປົກກະຕິ.

ໂອກາດນີ້, ທ່ານ ນາງ ຈັນທອນ ໄຊຍະວົງ ຍັງຮຽກຮ້ອງມາຍັງ ແຮງງານລາວ ຜູ້ໄປເຮັດວຽກຢູຕ່າງປະເທດ ທີ່ມີຈຸດປະສົ່ງຈະກັບຄືນປະເທດ ໃຫ້ກັບມາແບບຖືກຕ້ອງ ຕາມລະບຽບກົດໝາຍ, ຖ້າບຸກຄົນໃດຫາກຝາຝືນ ໜ່ວຍສະເພາະກິດກວດພົບເຫັນ ແມ່ນຈະປະຕິບັດຕາມ ຂັ້ນຕອນຂອງກົດໝາຍ ໂດຍບໍ່ມີຂໍ້ຍົກເວັ້ນໃດໆ. ພ້ອມນີ້, ຍັງໄດ້ຮຽກຮ້ອງມາຍັງ ທຸກພາກສ່ວນສັງຄົນ ຜູ້ທີ່ມີເງື່ອນໄຂໃນການ ຊ່ວຍເຫລືອເຄື່ອງ ອຸປະໂພກ-ບໍລິໂພກ, ເຂົ້າສານອາຫານແຫ້ງ ໃຫ້ແກ່ສູນຈຳກັດບໍລິເວນ ບ້ານມົກກະຕອກ ເມືອງຫ້ວຍຊາຍ, ແຂວງບໍ່ແກ້ວ ກໍສາມາດຕິດຕໍ່ນຳຄະນະ ຮັບຜິດຊອບໄດ້ ຫລື ຕິດຕໍ່ຜ່ານໂທລະສັບໝາຍເລກ: 020 55683638 ຫລື 030 4766510. ເນື່ອງຈາກວ່າອາຫານການກິນ ແລະ ເຄື່ອງໃຊ້ສອຍຕ່າງໆສຳລັບ ຜູ້ຈຳກັດບໍລິເວນ ແມ່ນຍັງ ບໍ່ພຽງພໍ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)