ໃນວັນທີ 11 ກັນຍາ 2020 ທີ່ສຳນັກງານຫ້ອງວ່າການ ແຂວງຈຳປາສັກ, ທ່ານ ວິໄລວົງ ບຸດດາຄຳ ກຳມະການສູນກາງພັກ, ເລຂາພັກແຂວງ, ເຈົ້າແຂວງຈຳປາສັກ ພ້ອມຄະນະ ໄດ້ຕ້ອນຮັບ ທ່ານ ນາງ ບົວຄຳ ທິບພະວົງ ຄະນະປະຈຳສະພາແຫ່ງຊາດ, ປະທານກຳມາທິການຍຸຕິທຳ ສະພາແຫ່ງຊາດ ພ້ອມຄະນະ ໃນໂອກາດມາເຄື່ອນ ໄຫວວຽກງານ ຢູ່ແຂວງຈຳປາສັກ.

ທ່ານ ນາງ ບົວຄຳ ທິບພະວົງ ໄດ້ລາຍງານໃຫ້ທ່ານເຈົ້າ ແຂວງຈຳປາສັກ ຮູ້ເຖິງຈຸດປະສົງ ໃນການລົງມາເຄື່ອນໄຫວວຽກ ຢູ່ແຂວງຈຳປາສັກ, ຄັ້ງນີ້ແມ່ນເພື່ອລົງມາ ຕິດຕາມກວດກາ ການເຄົາລົບ ແລະ ປະຕິບັດລັດຖະທຳມະນູນ, ກົດໝາຍ, ມະຕິຂອງປະກອງປະຊຸມ ສະພາແຫ່ງຊາດ, ມະຕິຂອງຄະນະປະຈຳສະພາແຫ່ງຊາດ ໃນຂົງເຂດວຽກງານຍຸຕິທຳ; ການຈັດຕັ້ງປະຕິບັດມະຕິ ສະບັບເລກທີ 012, 104 ແລະ105/ສພຊ, ລົງວັນທີ 4/12/2018 ຂອງກອງປະຊຸມສະໄໝສາມັນ ເທື່ອທີ 8 ສະພາແຫ່ງຊາດ ຊຸດທີ VIII  ແລະ ເພື່ອຕິດຕາມການກວດກາ ແກ້ໄຂຄຳຮ້ອງຂໍຄວາມເປັນທຳ ຂອງອົງການໄອຍະການປະຊາຊົນ, ສານປະຊາຊົນ ຄຳຮ້ອງຟ້ອງຕ່າງໆ ທີ່ສະເໜີຜ່ານສະພາແຫ່ງຊາດ ແລະ ສະພາປະຊາຊົນແຂວງ.

ໂອກາດນີ້, ທ່ານ ວິໄລວົງ ບຸດດາຄຳ ໄດ້ສະແດງການຕ້ອນຮັບ ແລະ ພ້ອມທີ່ຈະໃຫ້ການຮ່ວມມື ຕໍ່ທ່ານ ນາງ ບົວຄຳ ທິບພະວົງ ຕະຫລອດໄລຍະການມາ ເຄື່ອນໄຫວວຽກງານຢູ່ ແຂວງຈຳປາສັກ ແລະເຈົ້າແຂວງຈຳປາສັກ ຍັງມີຄຳເຫັນສະເໜີ ຕໍ່ຄະນະຂອງສະພາແຫ່ງຊາດ ແລະ ລັດຖະບານ ເພື່ອຂໍການສະໜັບສະໜູນ ດ້ານງົບປະມານ ໃນການທີ່ຈະຂະຫຍາຍພື້ນທີ່ ແລະ ປັບປຸງ ໂດຍສະເພາະແມ່ນ ຄ້າຍຄຸມຂັງ ແລະ ສະຖານທີ່ເຮັດວຽກຂອງ ກຳລັງ ປກສ-ປກຊ ໃຫ້ແຂງແຮງຂຶ້ນຕື່ມ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)