ແຫລ່ງຂ່າວ, ຈາກແຂວງໄຊສົມບູນ ແຈ້ງໃຫ້ຮູ້ວ່າ: ທ່ານ ຄຳພັນ ພົມມະທັດ ກຳມະການກົມການເມືອງສູນກາງພັກ, ເລຂາທິການສູນພັກ, ຫົວໜ້າຄະນະໂຄສະນາ ອົບຮົມສູນກາງພັກ, ຫົວໜ້າອະນຸກຳມະການ ເນື້ອໃນກອງປະຊຸມໃຫຍ່ ຄັ້ງທີ 11 ຂອງພັກ, ພ້ອມຄະນະ ໄດ້ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງໄຊສົມບູນ ເພື່ອຊີ້ນຳຊຸກຍູ້ການກະກຽມ ກອງປະຊຸມໃຫຍ່ອົງຄະນະພັກ ແຂວງໄຊສົມ ບູນ ໃນວັນທີ 11 ກັນຍາ 2020 ຢູ່ຫ້ອງປະຊຸມ ຫ້ອງວ່າການແຂວງ ໂດຍໄດ້ຮັບການຕ້ອນຮັບ ຈາກ ທ່ານ ພົຕ ຄຳລຽງ ອຸທະໄກສອນ ເລຂາພັກແຂວງ, ເຈົ້າແຂວງໄຊສົມບູນ, ມີຮອງເລຂາພັກແຂວງ ແລະ ຮອງເຈົ້າແຂວງ ພ້ອມດ້ວຍພາກສ່ວນທີ່ກ່ຽວຂ້ອງ ເຂົ້າຮ່ວມ.

ທ່ານ ພົຕ ຄຳລຽງ ອຸທະໄກສອນ ໄດ້ລາຍງານສະພາບ ການພັດທະນາ ເສດຖະກິດ-ສັງຄົມ ໄລຍະ 5 ປີ ຜ່ານມາ ແລະ ການກະກຽມກອງປະຊຸມໃຫຍ່ ອົງຄະນະພັກແຂວງ ໃຫ້ທ່ານຫົວໜ້າຄະນະໂຄສະນາ ອົບຮົມສູນກາງພັກໄດ້ຮັບຊາບ, ເຊິ່ງໄລຍະ 5 ປີຜ່ານມາ ເສດຖະກິດ ແຂວງໄຊສົມບູນ ມີການຂະຫຍາຍ ຕົວສະເລ່ຍ 6,99% ຕໍ່ປີ, ລວມຍອດຜະລິດຕະພັນພາຍໃນ GDP ບັນລຸໄດ້ 1.050,8 ຕື້ກີບ, ລາຍຮັບສະເລຍຕໍ່ຫົວຄົນ 11 ລ້ານກວ່າກີບ ຫລື 1.377 ໂດລາສະຫະລັດ/ຄົນ/ປີ. ສຳລັບການກະກຽມກອງປະ ຊຸມອົງຄະນະພັກແຂວງ ມາຮອດປັດຈຸບັນ ແມ່ນໄດ້ກະກຽມບົດກ່າວເປີດ, ກ່າວປິດ, ບົດຮັບຄຳໂອວາດ ຈາກຄະນະພັກຂັ້ນເທິງ, ບົດໂອ້ລົມຂອງຄະນະພັກຂັ້ນເທິງ, ຮ່າງມະຕິກອງປະຊຸມໃຫຍ່ ແລະ ບົດອື່ນໆ ແມ່ນສຳເລັດເປັນສ່ວນໃຫຍ່ແລ້ວ, ດ້ານບຸກຄະລາກອນ ຜູ້ທີ່ຈະສະໝັກ ຮັບເລືອກຕັ້ງ ເຂົ້າໃນຄະນະບໍລິຫານ ງານພັກແຂວງ ຊຸດໃໝ່ ຈຳນວນ 31 ສະຫາຍ, ເລືອກເອົາ 29 ສະຫາຍ, ຄາດຄະເນກຳມະການພັກແຂວງ ເອົາ 9 ສະຫາຍ, ຈະມີຜູ້ແທນສົມບູນເຂົ້າຮ່ວມທັງໝົດ 123 ສະຫາຍ, ພ້ອມເລືອກເອົາຜູ້ແທນສົມບູນ ທີ່ຈະໄປເຂົ້າຮ່ວມກອງປະຊຸມໃຫຍ່ ຄັ້ງທີ 11 ຂອງພັກ 15 ສະຫາຍ, ສຳຮອງ 2 ສະຫາຍ, ພ້ອມກັນນີ້ ຍັງໄດ້ສຳເລັດການທາບທາມ ບຸກຄະລາກອນຮອບ 1, ຮອບ 2 ແລະ ຮອບ 3 ທັງດຳເນີນຊີວິດການ ເມືອງເປັນທີ່ຮຽບຮ້ອຍ, ໄດ້ສັງລວມການກະກຽມ ດຳເນີນກອງປະຊຸມໃຫຍ່ຂອງແຂວງ ເພື່ອໄປລາຍງານຕໍ່ຄະນະ ພັກຂັ້ນເທິງພິຈາລະນາ, ມີທິດຊີ້ນຳ ແລະ ອະນຸມັດເປີດກອງປະຊຸມ ໃຫຍ່ຢ່າງເປັນທາງການ.

ໃນໂອກາດນີ້, ທ່ານ ຄຳພັນ ພົມມະທັດ ກໍໄດ້ເນັ້ນໜັກໃຫ້ບັນດາ ອະນຸກຳມະການກະກຽມ ກອງປະຊຸມໃຫຍ່ ອົງຄະນະພັກແຂວງ ເປັນຕົ້ນ ອະນຸກຳມະ ການເນື້ອໃນ ຕ້ອງເອົາໃສ່ກະກຽມ ຮ່າງບົດລາຍງານການເມືອງໃຫ້ລະອຽດ ແລະ ຖືກຕ້ອງກັບສະພາບ ຄວາມເປັນຈິງຂອງແຂວງ, ສ່ວນອະນຸກຳມະການດ້ານອື່ນ ກໍໃຫ້ຂຸ້ນຂ້ຽວ ຈັດຕັ້ງປະຕິບັດ ບັນດາໜ້າວຽກຂອງຕົນ ທີ່ໄດ້ຮັບມອບໝາຍ ແລະ ໃຫ້ສຳເລັດຕາມແຜນ ການທີ່ວາງໄວ້ ເພື່ອຮັບປະກັນໃຫ້ແກ່ ການດຳເນີນກອງ ປະຊຸມໃຫຍ່ ທີ່ຈະໄຂຂຶ້ນໃນຕໍ່ໜ້ານີ້ ໃຫ້ມີ ຄວາມພ້ອມຮ້ອຍສ່ວນຮ້ອຍ. ພ້ອມນີ້, ທ່ານຍັງໄດ້ເນັ້ນໜັກ ໃຫ້ຄະນະພັກ-ອົງການປົກຄອງ ແຂວງທຸກຂັ້ນ ຈົ່ງເອົາ ໃຈໃສ່ສຶກສາອົບຮົມ ການເມືອງ-ແນວຄິດ ໃຫ້ສະມາຊິກພັກ ກໍຄື ພະນັກງານ-ລັດຖະກອນ ເປັນບັນຫາສຳ ຄັນ, ພ້ອມທັງເຕົ້າໂຮມ ຄວາມສາມັກຄີພາຍໃນ ໃຫ້ເປັນ ປຶກແຜ່ນ ໄປຄຽງຄູ່ກັບການແກ້ໄຂ ຄວາມທຸກຍາກຂອງປະຊາຊົນບັນເຜົ່າ ໂດຍການຊຸກຍູ້ສົ່ງເສີມ ການປູກຝັງ-ລ້ຽງສັດ ເພື່ອຜະລິດເປັນສິນຄ້າ ແນໃສ່ເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂວງ ດ້ວຍຕົນເອງເທື່ອລະກ້າວ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)