ກະຊວງສາທາລະນະສຸກ ລາຍງານໃຫ້ຮູ້ໃນວັນທີ 15 ກັນຍາ 2020 ນີ້ວ່າ: ສປປ ລາວ ບໍ່ມີຜູ້ຕິດເຊື້ອພະຍາດໂຄວິດ-19 ເພີ່ມ ຕົວ​ເລກ​ສະ​ສົມ​ມີພຽງ 23 ຄົນ, ຂະນະດຽວກັນ ຜູ້​ຕິດ​ເຊື້ອ​ທີ 22 ​ແມ່ນ​ໄດ້​ຮັບ​ການ​ປີ່​ນປົວ​ດີ​ແລ້ວ ​ແລະ ຍັງມີພຽງແຕ່ 1 ຄົນ(ຜູ້​ທີ 2)ເທົ່ານັ້ນ ທີ່ນອນຕິດຕາມອາການຢູ່ໂຮງໝໍ ໂດຍມີອາການປົກກະຕິ ເຊິ່ງຈະໄດ້ສືບຕໍ່ຕິດຕາມຕໍ່ໄປ ຈົນກວ່າຜົນ​ກວດ​ອອກ​ມາ​ບໍ່​ພົບເຊື້ອ ແລ້ວຈຶ່ງຈະອະນຸຍາດ ໃຫ້ອອກ​ມາ​ດຳ​ລັງ​ຊີວິດ​ປົກກະຕິ.

ທ່ານ ດຣ. ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ກ່າວ ໃນພິທີຖະແຫລງຂ່າວວ່າ: ໃນວັນທີ 14 ກັນຍາ 2020 ໄດ້ເກັບຕົວຢ່າງ ມາກວດວິເຄາະ ທັງໝົດ 563 ຕົວຢ່າງ, ໃນນັ້ນມີ ແຮງງານລາວມາແຕ່ໄທ 128 ຕົວຢ່າງ, ແຮງງານໄທ 1 ຕົວຢ່າງ, ແຮງງານຈີນ 411 ຕົວຢ່າງ, ແຮງງານລາວກັບແຕ່ຈີນ 4 ຕົວຢ່າງ ແລະ ບຸກຄົນທົ່ວໄປບໍ່ມີອາການ 19 ຕົວຢ່າງ ໂດຍຜົນກວດວິເຄາະ ທັງໝົດແມ່ນບໍ່ພົບເຊື້ອ ໝາຍຄວາມວ່າໃນວັນທີ 14 ກັນຍາ 2020 ບໍ່ມີຜູ້ຕິດເຊື້ອໃໝ່. ນັບແຕ່ເດືອນມັງກອນ ຮອດວັນທີ 14 ກັນຍາ 2020  ໄດ້ເກັບຕົວຢ່າງມາກວດ ທັງໝົດມີ 45.351 ຕົວຢ່າງ ເຊິ່ງກວດພົບເຊື້ອສະສົມພຽງແຕ່ 23 ຄົນ ແລະ ປິ່ນປົວຫາຍດີແລ້ວ 22 ຄົນ. ປັດຈຸບັນນີ້, ທົ່ວປະເທດມີສູນ ຈໍາກັດບໍລິເວນ ທັງໝົດ 49 ສູນ ໂດຍມີຜູ້ຈຳກັດບໍລິເວນ ຢູ່ສູນທັງໝົດ 2.662 ຄົນ ເຊິ່ງໄດ້ເກັບຕົວຢ່າງມາ ກວດວິເຄາະທັງໝົດ ແລະ ບໍ່ພົບຜູ້ຕິດເຊື້ອ.

ທ່ານ ດຣ. ຣັດຕະນະໄຊ ເພັດສຸວັນ ກ່າວຕື່ມວ່າ: ສະພາບການລະບາດ ຂອງພະຍາດໂຄວິດ-19ໃນທົ່ວ​ໂລກ ກໍຄື ບັນດາປະເທດໃນອາຊຽນ ເຮັດໃຫ້ຈຳນວນຜູ້ຕິດເຊື້ອ ແລະ ຜູ້ເສຍຊີວິດ ມີທ່າອ່ຽງເພີ່ມສູງຂຶ້ນຢ່າງຕໍ່ເນື່ອງ, ສະນັ້ນ ເພື່ອຈຳກັດການລະບາດ ຂອງເຊື້ອພະຍາດດັ່ງກ່າວ ບໍ່ໃຫ້ຂະຫຍາຍວົງກວ້າງ ຈຶ່ງຂໍຮຽກຮ້ອງໃຫ້ ທຸກພາກສ່ວນໃນສັງຄົມ ຈົ່ງຮ່ວມແຮງຮ່ວມໃຈກັນ ເປັນເຈົ້າການໃນການສືບຕໍ່ ປະຕິບັດແຈ້ງການຂອງ ຫ້ອງວ່າການສຳນັກງານ ນາຍົກລັດຖະມົນຕີທີ່ໄດ້ວາງອອກ, ພ້ອມທັງປະຕິບັດມາດຕະການ ປ້ອງກັນການຕິດເຊື້ອ ຢ່າງເຂັ້ມງວດ, ປະຕິບັດການດຳລົງຊີວິດ ປົກກະຕິແບບໃໝ່ ໃຫ້ກາຍເປັນຄວາມຊິນເຄີຍ ແລະ ຖ້າທ່ານເດີນທາງມາຈາກປະເທດ ຫລື ເຂດທີ່ມີການລາຍງານ ການລະບາດຢ່າງຕໍ່ເນື່ອງ ຕ້ອງຈຳກັດບໍລິເວນ ຕົນເອງຈົນຄົບ 14 ວັນ ໂດຍໃຫ້ຖືວ່າເປັນພາລະ ແລະ ໜ້າທີ່ ຂອງໝົດທຸກຄົນ ເພື່ອເປັນການປະກອບສ່ວນ ອັນສຳຄັນໃຫ້ແກ່ຊາດ.

ພ້ອມດຽວກັນນັ້ນ, ກໍໃຫ້ໝັ່ນສັງເກດອາການຂອງຕົນເອງ ແລະ ຄອບຄົວ ຫາກທ່ານຮູ້ສຶກບໍ່ສະ ບາຍ ໃຫ້ຮີບຮ້ອນໄປພົບແພດ ເພື່ອປິ່ນປົວ, ທັງ​ນີ້ ກໍ​ເພື່ອສະກັດພະຍາດ ໂຄວິດ-19 ບໍ່ໃຫ້ກັບຄືນມາ​ ແຜ່​ລະບາດຮອບໃໝ່ ໃນປະເທດເຮົາ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)