ໃນຕອນບ່າຍ ວັນທີ 16 ກັນຍາ 2020, ທີ່ຫ້ອງປະຊຸມ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໄດ້ມີກອງປະຊຸມພົບປະສອງຝ່າຍ, ຝ່າຍລາວນຳໂດຍ ທ່ານ ສຈ. ດຣ ກິແກ້ວ ໄຂຄຳພິທູນ ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແລະ ຝ່າຍໄທນຳໂດຍ ທ່ານ ອິດທິພົນ ຄຸນປື້ມ ລັດຖະມົນຕີກະຊວງວັດທະນະທຳ ແຫ່ງ ຣາຊະອານາຈັກໄທ ພ້ອມດ້ວຍຄະນະຜູ້ແທນທັງສອງປະເທດເຂົ້າຮ່ວມ (ແບບທາງໄກ).

ໃນກອງປະຊຸມ ທ່ານລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຫ່ງ ສປປ ລາວ ໄດ້ສະແດງຄວາມເຫັນເປັນເອກະພາບຢ່າງສູງຕໍ່ການສະຫຼຸບຕີລາຄາ ກ່ຽວກັບການຮ່ວມມືລະຫວ່າງສອງຝ່າຍ ລາວ-ໄທ ໃນຊຸມປີຜ່ານມາ. ພ້ອມທັງ ລາຍງານສະພາບການລະບາດຂອງພະຍາດ ອັກເສບປອດ Covid -19 ຢູ່ ສປປ ລາວ ແລະ ພາກພື້ນ ມາຕັ້ງແຕ່ທ້າຍປີ 2019 ທີ່ໄດ້ລຸກລາມໄປຫຼາຍປະເທດໃນທົ່ວໂລກ ແລະ ໄດ້ຂົ່ມຂູ່ຕໍ່ຊີວິດຂອງປະຊາກອນໂລກ. ສຳລັບ ສປປ ລາວ ຖືວ່າສາມາດເອົາຊະນະເບື້ອງຕົ້ນເໜືອພະຍາດດັ່ງກ່າວໄດ້ແລ້ວ, ມີຜູ້ປ່ວຍຕິດເຊື້ອ 19 ຄົນທຳອິດ ສາມາດປິ່ນປົວຫາຍດີທັງໝົດ ໃນວັນທີ 9 ມິຖຸນາ 2020 ແລະ ບໍ່ມີລາຍງານຜູ້ຕິດເຊື້ອເພິ່ມເຕີມເປັນເວລາ 3 ເດືອນໃນຂອບເຂດທົ່ວປະເທດ. ພໍມາຮອດທ້າຍເດືອນ ກໍລະກົດ 2020 ໄດ້ມີລາຍງານຜູ້ຕິດເຊື້ອເພີ່ມອີກ 04 ກໍລະນີ ຊຶ່ງເປັນບຸກຄົນທີ່ເດິນທາງມາແຕ່ຕ່າງປະເທດ, ປະຈຸບັນແມ່ນໄດ້ປິ່ນປົວຫາຍດີ ແລະ ອອກຈາກໂຮງໝໍ 03 ກໍລະນີ ຍັງກຳລັງປິ່ນປົວ 01 ກໍລະນີ ລວມທັງໝົດ 23 ກໍລະນີ.

ສຳລັບ ສປປ ລາວ ແລະ ຣາຊະອານາຈັກໄທ ແມ່ນເປັນປະເທດບ້ານໃກ້ເຮືອນຄຽງທີ່ມີພູຜາປ່າໄມ້ແມ່ນ້ຳລຳເຊ ແລະ ຊາຍແດນຕິດຈອດກັນ, ມີວັດທະນະທຳ ແລະ ປະເພນີທີ່ຄ້າຍຄືກັນ ແລະ ປະຊາຊົນສອງຊາດມີມູນເຊື້ອແລກປ່ຽນການຢ້ຽມໄປມາຫາສູ່ຊຶ່ງກັນ ແລະ ກັນຕະຫຼອດມາ.

ສຳລັບວຽກງານການຮ່ວມມືສອງຝ່າຍ ລາວ-ໄທ ພິເສດປີ 2020 ນີ້ ສອງປະເທດ ມີແຜນຈັດຕັ້ງສະເຫຼີມສະຫຼອງ ວັນສ້າງຕັ້ງສາຍພົວພັນການທູດ ລາວ-ໄທ ຄົບຮອບ 70 ປີ ຢ່າງເປັນຂະບວນຟົດຟື້ນ ຊຶ່ງມີຫຼາຍກິດຈະກຳປິ່ນອ້ອມ. ແຕ່ເນື່ອງຈາກວ່າ ສະພາບການລະບາດຂອງພະຍາດ Covid -19 ຈຶ່ງບໍ່ທັນສາມາດຈັດຕັ້ງປະຕິບັດບັນດາກິດຈະກຳໄດ້.

ເຖິງຢ່າງໃດກໍຕາມ, ໃນຊຸມປີທີ່ຜ່ານມາ ສອງປະເທດພວກເຮົາ ໄດ້ປະຕິບັດການຮ່ວມມືໃນຂົງເຂດດ້ານວຽກງານວັດທະນະທຳດ້ວຍຫຼາຍຮູບແບບໃນຂອບການຮ່ວມມືສອງຝ່າຍ ແລະ ຫຼາຍຝ່າຍຢູ່ໃນພາກພື້ນ ແລະ ສາກົນ ຢ່າງຟົດຟື້ນ. ໄດ້ມີກິດຈະກຳສາຍຮູບເງົາ ແອນີເມເຊິນ ເລື້ອງ: “ພະລັກ ພະລາມ ຫຼື ບົດກະວີ ຣາມາຍານະ”. ນອກຈາກນີ້ ຍັງມີການແລກປ່ຽນສິລະປະການສະແດງ, ງານວາງສະແດງຮູບພາບ, ຈັດສຳມະນາທາງດ້ານວິຊາການ ແລະ ການຮ່ວມມີລະຫວ່າງດ້ານວັດທະນະທຳຂອງສອງປະເທດອີກດ້ວຍ.

ພ້ອມດຽວກັນນີ້, ທ່ານລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຫ່ງ ສປປ ລາວ ສະແດງຄວາມເຫັນດີເປັນເອກະພາບຢ່າງສູງ ແລະ ຂອບອົກຂອບໃຈເປັນຢ່າງຍິ່ງມາຍັງທ່ານ ລັດຖະມົນຕີກະຊວງວັດທະນະທຳ ແຫ່ງ ຣາຊະອານາຈັກໄທ ທີ່ໄດ້ມີການຈັດງານສະແດງດົນຕີ ແລະ ສິລະປະວັດທະນະທຳພື້ນບ້ານ ພາຍໃຕ້ຫົວຂໍ້: “ນ້ຳຂອງບໍ່ກັ້ນ ໂຄວິດບໍ່ໃກ້ 70 ປີ ໄທ-ລາວ, ໄທ-ລາວ ຮັກແພງ ແບ່ງປັນ ແລະ ໝັ້ນຄົງ” ທີ່ໂຮງລະຄອນແຫ່ງຊາດ, ນະຄອນຫຼວງບາງກອກ ໃນວັນທີ 28 ກັນຍາ 2020 ທີ່ຈະມາເຖິງນີ້.

Medialaos MMD