ພິທີເຊັນສັນຍາ ສຳປະທານໂຄງການຂຸດຄົ້ນ ແລະ ປຸງແຕ່ງຫີນອ່ອນມາໂບ

0
104

ພິທີເຊັນສັນຍາ ສຳປະທານໂຄງການຂຸດຄົ້ນ ແລະ ປຸງແຕ່ງຫີນອ່ອນມາໂບ ຢູູ່ບ້ານແດນສະ ຫວ່າງ ນະຄອນຫລວງພະບາງ ໄດ້ຈັດຂຶ້ນເມື່ອທ້າຍອາທິດຜ່ານມາ ທີ່ພະແນກ ແຜນການ ແລະ ການລົງ ທືນແຂວງ,​ໂດຍມີທ່ານ ຄຳຂັນ ຈັນທະວີສຸກ ເຈົ້າແຂວງຫລວງພະບາງ ພ້ອມດ້ວຍຄະນະ ຕະຫລອດຮອດຜູ້ສຳປະທານ ແລະ ຄະນະກຳມະການຄຸ້ມຄອງ ການລົງທືນຂອງລັດເຂົ້າຮ່ວມ.

ໂຄງການສຳປະທານຂຸດຄົ້ນ ແລະ ປຸງແຕ່ງຫີນອ່ອນ ຢູູ່ບ້ານແດນສະຫວ່າງ ນະຄອນຫລວງພະບາງ ໄດ້ຮັບການອານຸມັດ ຈາກອົງການປົກຄອງແຂວງ ຕາມລະບຽບ ແລະ ກົດໝາຍ ການລົງທືນ ຂອງລັດ ມີອາຍຸສັນຍາ 5 ປີ ນັບແຕ່ວັນທີ 11 ກັນຍາ 2020 ເປັນການລົງທືນຂອງບໍລິສັດເອກະຊົນພາຍໃນ ມູູນຄ່າການລົງທືນ 4 ລ້ານໂດລາສະຫະລັດ, ເນື້ອທີ່ຂຸດຄົ້ນທັງໝົດ 4 ເຮັກຕາ, ໂດຍແມ່ນບໍລິສັດ ລາວໄອເອັດຊີ ມາຍນີງ ຈຳກັດຜູ້ດຽວ ເປັນຜູ້ລົງທືນຂຸດຄົ້ນ.

ໂອກາດນີ້, ທ່ານເຈົ້າແຂວງຫລວງພະບາງ ກ່າວວ່າ: ການສຳປະທານໂຄງການຂຸດຄົ້ນ ແລະ ປຸງແຕ່ງຫີນອ່ອນ ຢູູ່ບ້ານແດນສະຫວ່າງ ນະຄອນຫລວງພະບາງ ເປັນໂຄງການລິເລີ່ມ ໃນການພັດທະນາຊັບ ພະຍາກອນທຳມະຊາດ ທີ່ມີຢູູ່ທ້ອງຖີ່ນໃຫ້ເປັນສີນຄ້າ ສົ່ງອອກທີ່ໄດ້ມາດຕະຖານສາກົນ ແລະ ກາຍເປັນຜະລິດຕະພັນ ທີີ່ຈະເປັນສີນຄ້າໃໝ່ຂອງປະເທດລາວ ກໍ່ຄື ຂອງແຂວງຫລວງພະບາງ ໃນອານາຄົດ.

 ໃຫ້ກຽດລົງນາມສັນຍາ ຝ່າຍອົງການປົກຄອງ ແຂວງຫລວງພະບາງ ຕາງໜ້າໂດຍ ທ່ານ ນາງ ສີລີພອນ ສຸພັນທອງ ຫົວໜ້າພະແນກແຜນການ ແລະ ການລົງທືນແຂວງ, ຝ່າຍບລິສັດສຳປະທານ ຕາງໜ້າໂດຍ ທ່ານ ປີຊາໄຊ ແກ້ວໄຊຍະຈັກ ປະທານບໍລິສັດ ລາວໄອເອັດຊີ ມາຍນີງຈຳກັດຜູ້ດຽວ, ໂດຍມີຄະນະກຳມະການ ຄຸ້ມຄອງການລົງທືນຂອງລັດ ແລະ ພາກສ່ວນກ່ຽວຂ້ອງ ເຂົ້າຮ່ວມເປັນສັກຂີພິຍານ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)