ມອບ-ຮັບອາຄານຮຽນຫລັງໃໝ່ ໂຮງຮຽນປະຖົມສົມບູນບ້ານພອນໄຊ

0
57

ເມື່ອທ້າຍອາທິດຜ່ານມາ ທີ່ໂຮງຮຽນປະຖົມສົມບູນບ້ານພອນໄຊ ນະຄອນຫລວງພະບາງ ໄດ້ມີພິທີ ມອບ-ຮັບອາຄານຮຽນຫລັງໃໝຂຶ້ນ, ໂດຍແມ່ນ ທ່ານ ຄຳແພງ ໄຊສົມແພງ ອາດີດເຈົ້າແຂວງຫລວງພະບາງ ພ້ອມດ້ວຍຄອບຄົວ ແລະ ນັກທຸລະກິດ ເປັນຜູ້ໃຫ້ທຶນໃນການກໍ່ສ້າງ ລວມມູນຄ່າ 243 ລ້ານກວ່າກີບ. ເປັນອາຄານຖາວອນ ເບຕົງເສີມເຫລັກ, ຝາກໍ່ດ້ວຍດິນຈີ່, ຫລັງຄາມຸງກະເບື້ອງ, ເພດານໃສ່ແຜ່ນລຽບ ປະກອບມີ 2 ຫ້ອງ, 1 ຫ້ອງຮຽນ ແລະ 1 ຫ້ອງການ, ມີ ລວງຍາວ 12 ແມັດ, ກວ້າງ 7 ແມັດເຄິ່ງ, ລະບຽງນອກ 2 ແມັດ, ໄດ້ເລີ່ມລົງມືກໍ່ສ້າງແຕ່ວັນ 2 ມິຖຸນາ 2013 ແລະ ສໍາເລັດໃນວັນທີ 29 ກັນຍາ 2013, ລວມ 5 ເດືອນ, ແຕ່ຍ້ອນຜູ້ໃຫ້ທືນຕິດພາລະກິດ ຈຶ່ງຈັດພິທີມອບ-ຮັບຫລ້າຊ້າ.ນອກຈາກອາຄານຮຽນແລ້ວ ທ່ານ ຄຳແພງ ໄຊສົມແພງ ໄດ້ໃຫ້ທືນເຈາະນໍ້າບາດານໃຫ້ 1 ບໍ່, ກໍ່ສ້າງເສົາຫລັກທຸງ ແລະ ອຸປະກອນເຄື່ອງເຟີນີເຈີຄົບຊຸດ ລວມມູນຄ່າ 17 ລ້ານກີບ.

ໂອກາດນີ້, ທ່ານ ຄຳແພງ ໄຊສົມແພງ ໄດ້ກ່າວມອບອາຄານຮຽນ ໃຫ້ເຈົ້ານະຄອນຫລວງພະບາງ ແລະ ພະແນກສຶກສາທິການ ແລະ ກິລາແຂວງ ກໍຄື ຫ້ອງການສຶກສາທິການ ແລະ ກິລາເມືອງ ແລະ ຄະນະອຳນວຍການໂຮງຮຽນ ນຳໃຊ້ໃຫ້ເກີດປະໂຫຍດ. ພ້ອມນີ້, ທ່ານ ຄຳແພງ ໄຊສົມແພງ ໄດ້ມອບອຸປະກອນການຮຽນ, ນ້ຳຢາລ້າງມື ແລະ ເຄື່ອງນຸ່ງຈຳນວນໜຶ່ງ ລວມມູນຄ່າ 16 ລ້ານກວ່າກີບ ໃຫ້ນ້ອງນັກຮຽນ ແລະ ສັນຍາວ່າຈະລະດົມທືນ ມາຊ່ວຍປູເບຕົງເດີ່ນໂຮງຮຽນຕື່ມອີກ ແລະ ໃນຕອນທ້າຍໄດ້ຮ່ວມກັນປ່ອຍປ້າຍ ເພື່ອເປັນການເປີດນຳໃຊ້ ອາຄານຮຽນຢ່າງເປັນທາງການ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)