ໜ້າອອນລາຍພວກເຮົາເຄີຍນຳສະເໜີບົດກ່ຽວກັບຍຸດທະສາດຫັນປ່ຽນໂດຍສັນຕິມາແລ້ວ… ບໍ່ທໍ່ນັ້ນຍັງຍົກບັນຫາເລື່ອງການບໍລິໂພກຂ່າວຈາກສື່ຕ່າງໆ ໂດຍສະເພາະສື່ອອນລາຍວ່າໃຫ້ພວກເຮົາມີສະຕິບໍ່ເຊື່ອງ່າຍນໍ?

ແຕ່ຕ້ອງຍອມຮັບວ່າສັງຄົມສູ່ມື້ນີ້ເປັນສັງຄົມດີຈີຕອລ; ໃນວົງການສື່ນີ້ໃຜປ່ອຍຂ່າວໄວ ລະແມ່ນຜູ້ບໍລິໂພກມັກເຊື່ອໂລດຢ່າງໜ້ອຍກໍ່ 30% ສ່ວນວ່າມີຂ່າວຕາມຫຼັງອອກມາພັດວ່າເປັນການແກ້ຕົວຊື່ໆ ວ່າຊັ້ນ! ອັນນີ້ມັນອັນຕະລາຍແທ້ໆ.

ຫວ່າງມໍ່ໆ ມານີ້ສື່ຕ່າງປະເທດ ໂດຍສະເພາະສື່ຈາກປະເທດໄທ ໂພສທູເດ ລົງວັນທີ 4 ກັນຍາ 2020 ພາດຫົວຂໍ້ຂ່າວ: “.. ລາວຍອມໃຫ້ຈີນຄຸມເຂື່ອນ..” ເພື່ອນຜູ້ອ່ານຕິດຕາມສື່ອອນລາຍຄົງໄດ້ອ່ານແລ້ວ.

ຕໍ່ມາທາງການລາວເຮົາ ໂດຍສະເພາະແມ່ນຄຳເຫັນ ຂອງທ່ານ ຈັນສະແຫວງ ບຸນຍົງ ຫົວໜ້າກົມນະໂຍບາຍ ແລະ ແຜນພະລັງງານ; ກະຊວງພະລັງງານ ແລະ ບໍ່ແຮ່ ຕໍ່ການປັບປຸງໂຄງສ້າງດ້ານທຸລະກິດພະລັງງານໄຟຟ້າ ຢູ່ ສປປລາວ ໄດ້ລົງພິມຢ່າງລະອຽດ ໃນໜ້າ 4 ຂອງໜັງສືພິມປະຊາຊົນ ສະບັບລົງວັນທີ 15/9/2020 ນັ້ນກໍ່ເວົ້າວ່າແກ້ຕົວຊື່ໆ ເພາະຫາງສຽງແຮງ.

ຢາກບອກວ່າການບໍລິໂພກສື່ນີ້ພວກເຮົາຕ້ອງອ່ານ, ຟັງຫຼາຍແຫຼ່ງຂ່າວ ໂດຍສະເພາະແມ່ນແຫຼ່ງຂ່າວທາງການທໍ່ນັ້ນ ບໍ່ຊັ້ນພວກເຮົາຈະຫຼົງເຊື່ອແລ້ວຕົກຢູ່ໃນຍຸດທະສາດຫັນປ່ຽນໂດຍສັນຕິ.

ເລື່ອງບໍລິສັດໄຟຟ້ານີ້ຕ້ອງເຂົ້າໃຈວ່າເພີ່ນພວມຢູ່ໃນໄລຍະປັບປຸງຖອດຖອນບົດຮຽນຈາກຫຼາຍປະເທດ ທີ່ປະສົບຜົນ ສຳເລັດມາກ່ອນຄືແຍກອອກເປັນ: ບໍລິສັດຜະລິດໄຟຟ້າ; ບໍລິສັດສາຍສົ່ງ ແລະ ບໍລິສັດຊື້ ແລະ ຈຳໜ່າຍໄຟຟ້າ.

ສຳລັບປະເທດເຮົາຜ່ານມາແຍກບໍລິສັດຜະລິດໄຟຟ້າອອກແລ້ວ.. ມາບາດນີ້ກໍ່ແຍກບໍລິສັດສາຍສົ່ງອອກອີກ ແລະ ສຸດທ້າຍບໍລິສັດໄຟຟ້າ (EDL) ກໍ່ເຮັດໜ້າທີ່ຊື້ ແລະ ຈຳໜ່າຍໄຟຟ້າທໍ່ນັ້ນ.

ການເຊັນສັນຍາສ້າງຕັ້ງບໍລິສັດສາຍສົ່ງໄຟຟ້າແຫ່ງຊາດ ໃນວັນທີ 1 ກັນຍາ 2020 ຜ່ານມານັ້ນແມ່ນການຮ່ວມຮຸ້ນ ລະຫວ່າງລັດວິສາຫະກິດໄຟຟ້າລາວ (EDL)  ກັບລັດວິສາຫະກິດຕາຂ່າຍໄຟຟ້າພາກໃຕ້ ສປ ຈີນ (CSG) ບໍລິສັດ ໃໝ່ນີ້ມີຊື່ຫຍໍ້ (EDL-T) ເຊີ່ງບໍລິສັດນີ້ຝ່າຍລາວຖືຮຸ້ນ 10% ໃນເບື້ອງຕົ້ນ ແລະ ສາມາດຊື້ຮຸ້ນຕື່ມໄດ້ອີກ.

ຢາກໃຫ້ຊອກລາຍລະອຽດຕື່ມແລ້ວຈີ່ງຄ່ອຍເຊື່ອ ແລະ Comment. 

ບ.ກ ມີເດຍລາວ