ໃນວັນທີ 16 ກັນຍາ 2020 ອົງການກາແດງລາວ ໄດ້ຈັດພິທີສະເຫລີມສະຫລອງ ວັນປະ ຖົມພະຍາບານໂລກຂຶ້ນ ທີ່ໂຮງຮຽນມັດທະຍົມສົມບູນໂພນທັນ, ເມືອງສີສັດຕະນາກ ນະຄອນຫລວງວຽງຈັນ, ໂດຍການໃຫ້ກຽດເຂົ້າຮ່ວມຂອງ ທ່ານ ສິງ ເມໂນລາດ ຮອງປະທານອົງການກາແດງລາວ, ທ່ານຮອງອຳນວຍການໂຮງຮຽນ ມັດທະນົມສົມບູນໂພນທັນ, ແຂກຖືກເຊີນ, ຄູ-ອາຈານ, ນ້ອງນັກຮຽນ ແລະ ພາກສ່ວນທີ່ກ່ຽວຂອງເຂົ້າຮ່ວມ ຢ່າງຫລວງຫລາຍ.

ການສະເຫລີມສະຫລອງ ວັນປະຖົມພະຍາບານໂລກໃນປີນີ້, ມີຄຳຂັວນວ່າ: “ການປະຖົມພະຍາ ບານໃນໄລຍະການລະບາດຂອງພະຍາດ”, ຍ້ອນໃນທົ່ວໂລກກຳລັງມີ ການແຜ່ລະບາດ ຂອງເຊື້ອໄວຣັດ ໂຄໂລນາ ຫລື ໂຄວິດ- 19, ເຊິ່ງແນໃສ່ການບໍລິການ ທີ່ຈຳເປັນໃນການຊ່ວຍເຫລືອຄົນ ໃນໄລຍະການແຜ່ລະບາດນີ້, ເຊິ່ງແມ່ນສະຫະພັນກາແດງ ແລະ ຊີກວົງເດືອນແດງສາກົນ ເປັນຜູ້ລິເລີ່ມການປະຖົມພະຍາ ບານຂຶ້ນ ເພື່ອໃຫ້ຮູ້ຄວາມສຳຄັນ ຂອງການປະຖົມພະຍາບານ, ໂດຍສະເພາະໃນດ້ານ ຄວາມຮູ້ ແລະ ທັກສະ ທັງເປັນການພັດທະນາ ການຝຶກອົບຮົມ ດ້ານການປະຖົມພະຍາບານ ໃນຊີວິດປະຈຳວັນ ແລະ ໃນຍາມເກີດໄພພິບັດ. ສະນັ້ນ, ຈຶ່ງຖືເອົາວັນເສົາ ໃນອາທິດທີສອງຂອງເດືອນກັນຍາ ຂອງທຸກໆປີ ເປັນວັນປະຖົມ ພະຍາບານໂລກ, ເຊິ່ງປີນີ້ກົງກັບວັນທີ 12 ກັນຍາ 2020.

ສະນັ້ນຈຶ່ງເຫັນວ່າວຽກງານປະຖົມພະຍາບານ ມີຄວາມສຳຄັນຫລາຍ ອົງການກາແດງລາວ ຈຶ່ງໄດ້ພະຍາຍາມ ໃນການໃຫ້ທຸກຄົນ ໃນສັງຄົມໄດ້ຮັບຮູ້ ແລະ ຮຽນຮູ້ວຽກງານດັ່ງກ່າວ, ເຊິ່ງປີນີ້ ແມ່ນເນັ້ນໃສ່ນ້ອງນັກຮຽນ, ຄູອາຈານ ເພື່ອໃຫ້ເຂົາເຈົ້າໄດ້ຮັບຮູ້ ການປ້ຳຫົວໃຈທຽມ, ການຊ່ວຍເຫລືອຄົນແຄ້ນອາຫານ, ການຊ່ວຍເຫລືອຄົນເປັນລົມ, ວິທີການຫ້າມເລືອດ, ການຄົງທີ່ກະດຸກແຂນຫັກ, ການຄົງທີ່ກະດູກຂາຫັກ ແລະ ວິທີການເຄື່ອນຍ້າຍຄົນເຈັບ ເພື່ອໃຫ້ເຂົາເຈົ້າໄດ້ມີຄວາມຮູ້ເບື້ອງຕົ້ນ ໃນການຊ່ວຍເຫລືອສຸກເສີນ. ໃນປີຜ່ານມາ ອົງການກາແດງລາວ ໄດ້ຈັດຝຶກອົບຮົມວຽກງານດັ່ງກ່າວໃຫ້ຄູ, ນັກຮຽນ, ພະນັກງານ-ທະຫານຕຳຫລວດ, ບໍລິສັດເອກະຊົນ, ພະນັກງານ ແລະ ອາສາສະໝັກກາແດງລາວ, ໂດຍມີຜູ້ເຂົ້າຮ່ວມທັງໝົດ 427 ເທື່ອຄົນ, ຍິງ 120 ເທື່ອຄົນ.

ສະຫະພັນກາແດງ ແລະ ຊີກວົງເດືອນແດງສາກົນ ເປັນຄູຝຶກທີ່ນຳໜ້າໂລກ, ເປັນຜູ້ສະໜອງປະ ຖົມພະຍາບານຫລາຍກວ່າ 150 ປີມາແລ້ວ, ໃນປີ 2016 ຫລາຍກວ່າ 15 ລ້ານຄົນ ໄດ້ຮັບການຝຶກອົບຮົມ ປະຖົມພະຍາບານໃນທົ່ວໂລກຈາກ 190 ປະເທດກາແດງແຫ່ງຊາດ. ໃນກິດຈະກຳດັ່ງກ່າວ, ແມ່ນໄດ້ຮັບຄວາມສົນໃຈ ໃຫ້ແກ່ຄູ-ອາຈານ ແລະ ນ້ອງນັກຮຽນ, ເຊິ່ງສະແດງອອກ ໃນການເຂົ້າຮ່ວມຖາມ-ຕອບ ຂອງຄູ-ອາຈານ ແລະ ນ້ອງນັກຮຽນ. ພິທີສະເຫລີມສະຫລອງວັນດັ່ງກ່າວ, ໂດຍໄດ້ຮັບການສະໜັບສະໜູນ ຈາກສະຫະພັນກາແດງ ແລະ ຊີກວົງເດືອນແດງສາກົນ ແລະ ສະພາກາແດງຍີ່ປຸ່ນ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)