ໃນ​ລະຫວ່າງວັນ​ທີ 4-5 ກັນຍາ 2019 ນີ້,  ທ່ານ ໂພໄຊ ໄຊຍະສອນ ຮອງເຈົ້າແຂວງ ສະຫວັນ ນະເຂດ ພ້ອມຄະນະ ໄດ້ລົງຕິດຕາມເບິ່ງສະພາບການນ້ຳຖ້ວມຢູ່ 3 ​ເມືອງ​ຄື: ​ເມືອງ​ໄຊ​ບູລີ, ​ເມືອງ​ພີນ ​ແລະ ​ເມືອງ​ເຊ​ໂປ​ນ ພ້ອມທັງວາງແຜນການຮັບມື ກັບ​ກັບ​ໄພ​ນ້ຳ​ຖ້ວມ ​​ແລະ ​ໄດ້​ມອບ​ເຄື່ອງ​ຊ່ວຍ​ເຫລືອບັນ​ເທົາ​ທຸກໃຫ້​ຈຳນວນ​ໜຶ່ງ.

ສະ​ເພາະ​ຢູ່ເມືອງໄຊບູລີ ມີເນື້ອທີ່ນາຂອງປະຊາຊົນຖືກນ້ຳຖ້ວມແລ້ວ 3.285 ເຮັກຕາ ໃນ 26 ບ້ານ, ມີ 2.285 ຄອບຄົວ​ໄດ້​ຮັບ​ຜົນ​ກະທົບ, ເຮືອນຖືກນ້ຳຖ້ວມ 104 ຫລັງຄາ ​ແລະ ປັດຈຸ ບັນ ໄດ້ຍົກຍ້າຍປະຊາຊົນເຂົ້າສູນ ແລະ ເຮືອນພີ່ນ້ອງແລ້ວ 35 ຄົວເຮືອນ, ມີບ້ານທີ່ຖືກ ຕັດຂາດລົດບໍ່ສາມາດທຽວໄດ້ 8 ບ້ານ, ໂຮງຮຽນ 35 ແຫ່ງຖືກຖ້ວມ, ຂົວເບເລ (ຫ້ວຍປາ ທູນ) ທາງແກ້ງກະເບົາ-ປາກເຊບັ້ງໄຟຖືກນ້ຳເຊາະເຈື່ອນເສຍຫາຍ (ກຳລັງເລັ່ງສ້ອມແປງ) ແລະ ຍັງມີຂົວແຫ່ງອື່ນໆທີ່ຖືກເສຍຫາຍ, ທົ່ວ​ເມືອງມີສູນຫລົບໄພ 5 ສູນ ເພື່ອຮອງຮັບ ຊ່ວຍຜູ້ຖືກຜົນກະທົບຈາກໄພນ້ຳຖ້ວມ.

ສ່ວນເມືອງພີນຖື​ວ່າ​ເປັນເຫດການນໍ້າຖ້ວມຄັ້ງໃຫຍ່ທີ່ສຸດໃນຮອບ 40 ປີ, ມີ 5 ເຂດທີ່ໄດ້ ຮັບຜົນກະທົບໜັກຄື: ເຂດຈຸດສຸມຕັງອາໄລ, ບ້ານຍາງ, ທູນຂາມ, ຫ້ວຍຫອຍ ແລະ ຕາດ ໄຮ, ກວມທັງໝົດ 20 ກວ່າບ້ານ, 12 ພັນກວ່າຄອບຄົວ, ສັດລ້ຽງງົວ, ຄວາຍ, ແບ້ ແລະ ອື່ນໆ ​ແຕ່ຍັງບໍ່ສາມາດເກັບກໍາລາຍລະອຽດໄດ້ແນ່ນອນ, ເນື່ອງຈາກເກີດນໍ້າຖ້ວມກະທັນ ຫັນໃນລະຫວ່າງວັນທີ 3-4 ກັນຍາ ປະຊາຊົນໜີອອກຈາກເຂດນໍ້າຖ້ວມບໍ່ສາມາດນໍາສັດ ລ້ຽງອອກມານໍາໄດ້ ແລະ ປະຊາຊົນກໍ່ຢູ່ກະແຈກກະຈາຍຍາກຕໍ່ການເຂົ້າໄປຊ່ວຍເຫລືອ.

ສຳລັບຢູ່​ເມືອງ​ເຊ​ໂປ​ນ ມີບ້ານທີ່ໄດ້ຮັບຜົນກະທົບ 42 ບ້ານ, 3.582 ຫລັງຄາເຮືອນ, ນາປີ ຖືກຖ້ວມ 526 ເຮັກຕາ, ໜອງປາ 18 ໜອງ ແລະ ອື່ນໆ. ສ່ວນການຊ່ວຍ​ເຫລືອ​ເບື້​ອງຕົ້ນ ​ແມ່ນ​ໄດ້​ແຈກ​ຢາຍ ນໍ້າດື່ມ, ປາກະປ໋ອງ, ຜ້າຫົ່ມ ແລະ ​ເຄື່ອງ​ໃຊ້​ຈຳ​ເປັນ​ອື່ນໆຈຳນວນ​ໜຶ່ງ.