ໝາກເບັງ, ດອກໄມ້, ທູບທຽນ ແລະ ເຮືອໄຟຮູບນາກ ສ້າງລາຍຮັບໃຫ້ແກ່ຄອບຄົວໄດ້ເປັນຢ່າງດີ

0
65

ເປັນທີ່ຮູ້ນຳກັນແລ້ວວ່າ ຄົນລາວຊາວພຸດທັງຫລາຍ ເມື່ອເຖິງວັນພະ-ວັນສິນ ຫລື ການໄປກາບໄຫວ້ຊັກກະລະບູຊາ ພະສົງອົງພະເຈົ້າ ແລະ ສິ່ງສັກສິດຕ່າງໆຢູ່ໃນວາອາຮາມ ແລະ ບ້ານເຮືອນຂອງຕົມຕາມຄວາມເຊື່ອສັດທາ, ສິ່ງທີ່ຂາດບໍ່ໄດ້ນັ້ນກໍຄື ດອກໄມ້ທູບທຽນ ແລະ ເຄື່ອງບູຊາຕ່າງໆ ໂດຍສະເພາະແມ່ນ ໝາກເບັງບູຊາພະ ທີ່ເຮັດຈາກໃບຕອງກ້ວຍ, ເຊິ່ງຈະມີຫລາຍຂະໜາດ ຄື ຫ້າກີບ, ເຈັດກີບ ແລະ ເກົ້າກີບ ທີ່ປະດັບດ້ວຍດອກດາວເຮືອງ ແລະ ດອກພຸດ, ໂດຍມີປະຊາຊົນຈຳນວນໜຶ່ງ ໄດ້ຫັນມາເຮັດໝາກເບັງ ຂາຍເປັນອາຊີບຫລັກ ເນື່ອງຈາກວ່າເຮັດງ່າຍ ແລະ ຂາຍໄດ້ລາຄາດີ, ເຊິ່ງຈະມີລາຄາແຕ່ 5.000-20.000 ກີບ.

ເມື່ອໃກ້ຮອດວັນສິນ ຄື 8 ຄ່ຳ ແລະ 15 ຄ່ຳ ຈະເຫັນໄດ້ວ່າຢູ່ຕາມຕະຫລາດ, ແຄມທາງ, ໜ້າວັດ ແລະ ເຂດຊຸມຊົນຕ່າງໆ ຈະເຫັນຜູ້ຄົນນຳ ເອົາໝາກເບັງ, ດອກໄມ້, ທູບທຽນ ມາວາງຂາຍ, ເພື່ອໃຫ້ຜູ້ຄົນໄດ້ຊື້ນຳໄປບູຊາພະ ແລະ ອື່ນໆ. ນີ້ກໍເປັນອີກອາຊີບໜຶ່ງ ທີ່ສ້າງລາຍຮັບ ໄດ້ດີພໍສົມຄວນ. ດັ່ງກໍລະນີ ທີ່ວັດທົ່ງທາດ ເມືອງຫາດຊາຍຟອງ ທີ່ກຳລັງໂດ່ງດັ່ງ ແລະ ເປັນກະແສນິຍົມ ຂອງຄົນທີ່ມີ ຄວາມເຊື່ອ, ຄວາມສັດທາໃນພະພຸດ ທະສາສະໜາ ແລະ ພະຍານາກ, ໂດຍສະເພາະວັດດັ່ງກ່າວ, ທີ່ມີເອກະລັກທີ່ໂດດເດັ່ນ ກ່ອນວັດອື່ນໆ ກໍຄືຮູບປັ້ນຂອງພະຍານາກ ທີ່ກຳລັງຂຶ້ນມາຈາກນ້ຳແມ່ຂອງ, ເຊິ່ງຫລາຍຄົນອາດຈະໄດ້ໄປເຫັນແລ້ວ ແລະ ບາງຄົນກໍອາດກຳລັງ ວາງແຜນທີ່ຈະໄປຢ້ຽມຊົມວັດດັ່ງກ່າວນີ້ຢູ່.

ວັດທົ່ງທາດ ຕັ້ງຢູ່ແຄມແມ່ນ້ຳຂອງ ເຂດບ້ານຫ້ອມໃຕ້ ເມືອງຫາດຊາຍຟອງ ນະຄອນຫລວງວຽງຈັນ, ພໍຮອດປະຕູໂຂງທາງເຂົ້າວັດ ສິ່ງທໍາອິດທີ່ໄດ້ພົບເຫັນກໍແມ່ນ ໂຕະທີ່ເຕັມດ້ວຍໝາກເບັງ, ເຮືອໄຟ ທີ່ປະດິດຈາກໃບຕອງກ້ວຍ, ເຮັດເປັນຮູບພະຍານາກນ້ອຍໃຫຍ່ ແຕກຕ່າງໆກັນໄປ ພ້ອມດ້ວຍດອກໄມ້ທູບທຽນ, ກ້ວຍ, ໝາກພ້າວ ແລະ ເຄື່ອງບູຊາຫລາຍໆຢ່າງ ທີ່ພໍ່ແມ່ປະຊາຊົນ ນຳມາວາງຂາຍລຽນກັນ ຢູ່ເຕັມຕາມສອງຝາກທາງ ຈົນຮອດທາງໃນຂອງເດີ່ນວັດ ນັບລວມແລ້ວປະມານ 200 ໂຕະ ເພື່ອໃຫ້ບັນດາຜູ້ຄົນທີ່ມີຄວາມໃສສັດທາ ຊື້ໄປກາບໄຫວ້ບູຊາ ແລະ ຂໍພອນຕາມຄວາມເຊື່ອ.

ທ້າວ ວິໄລ ພົມມະຫາໄຊ ປະຊາຊົນ ຢູ່ບ້ານຖິ່ນເພຍ ກໍແມ່ນຜູ້ໜຶ່ງທີ່ໄດ້ເຂົ້າມາ ຂາຍເຄື່ອງດັ່ງກ່າວ ຢູ່ໃນວັດແຫ່ງນີ້ ແລະ ໄດ້ໃຫ້ສຳພາດຕໍ່ຂ່າວ ສຳນັກຂ່າວສານປະເທດລາວ ໃນວັນທີ 17 ກັນຍາ 2020 ນີ້ວ່າ: ເມື່ອກ່ອນຄອບຄົວຂອງຂ້າພະເຈົ້າ ແມ່ນມີອາຊີບ ເຮັດສວນ ຫລັງຈາກເຮັດສວນແລ້ວ ກໍບໍ່ມີວຽກເຮັດ ພໍດີເຫັນຄົນມີສັດທາ ເຂົ້າມາກາບໄຫວ້ ຢູ່ວັດທົ່ງທາດນີ້ຫລາຍ ຈຶ່ງເຮັດໃຫ້ຂ້າພະເຈົ້າ ແລະ ຄອບຄົວ ຫັນມາຂາຍດອກໄມ້ທູບທຽນ ແລະ ເຄື່ອງບູຊາຕ່າງໆຢູ່ວັດແຫ່ງນີ້, ເພື່ອເປັນການສ້າງລາຍ ຮັບເຂົ້າຄອບຄົວ. ຂ້າພະເຈົ້າໄດ້ເລີ່ມມາຂາຍຕັ້ງ ແຕ່ມື້ຫໍ່ເຂົ້າປະດັບດິນ ຂາຍມານີ້ກໍໄດ້ປະມານເດືອນປາຍແລ້ວ ເຄື່ອງທີ່ເອົາມາຂາຍ ກໍຈະມີເຮືອໄຟຮູບນາກ ແລະ ໝາກເບັງ ທີ່ເຮັດຈາກໃບຕອງ, ດອກໄມ້, ທູບທຽນ ແລະ ເຄື່ອງບູຊາຕ່າງໆ ໂດຍມີຫລາຍລາຄາ ຂຶ້ນກັບແບບ ແລະ ຂະໜາດ ຄືເຮືອໄຟນາກ 9 ສຽນ ເປັນຂະໜາດໃຫຍ່ແດ່ ກໍຈະມີລາຄາປະມານ 180.000 ກີບ, ສ່ວນ 7 ສຽນແມ່ນ 150.000 ກີບ, 5 ສຽນແມ່ນ 80-100.000 ກີບ ແລະ ສຽນດຽວແມ່ນ 30-40.000 ກີບ. ສຳລັບເຄື່ອງບູຊາ ຈະມີລາຄາແຕ່ 30 ພັນ ຫາ 45 ພັນກີບ. ມື້ທຳມະດາຈະຂາຍໄດ້ປະມານ 20-30 ອັນ, ຖ້າເປັນວັນເສົາ ແລະ ອາທິດ ຈະຂາຍໄດ້ 70-80 ອັນ,  ຂາຍໄດ້ມື້ໜຶ່ງມີລາຍໄດ້ ສະເລັ່ຍແລ້ວບໍ່ຫລຸດ 8 ແສນ ຫາ 1 ລ້ານກວ່າກີບ, ເຊິ່ງສາມາດສ້າງລາຍຮັບ ໃຫ້ຄອບຄົວໄດ້ດີສົມຄວນ. ສຳລັບເຄື່ອງທີ່ເອົາມາວາງຂາຍ ແມ່ນພໍ່ແມ່ປະຊາຊົນແຖວບ້ານໃກ້ຄຽງນີ້ ມາສົ່ງໃຫ້ຕາມ ທີ່ເຮົາ ເອົາແບບໃຫ້ເພິ່ນເບິ່ງ ຫລື ລູກຄ້າສັ່ງ, ບາງອັນພວກເຮົາກໍໄດ້ເຮັດເອງ ເຊິ່ງມັນເປັນການສົ່ງເສີມ ໃຫ້ພໍ່ແມ່ປະຊາຊົນ ໄດ້ມີອາຊີບເສີມ, ມີວຽກເຮັດງານທໍາ ຫລັງຈາກເຮັດສວນແລ້ວ ທັງເປັນການສ້າງລາຍຮັບໃຫ້ເຂົາເຈົ້ານຳອີກ. ປັດຈຸບັນ, ທາງພາກລັດ ກໍໄດ້ມີການໂຄສະນາ ໃຫ້ພໍ່ແມ່ປະ ຊາຊົນທີ່ເຂົ້າມາທຳບຸນ ກາບໄຫວ້ບູຊາຕ່າງໆ ຫ້າມໃຊ້ພະລາສະຕິກ, ໂຟມ, ຢາງເຮັດເຮືອໄຟ ໃຫ້ໃຊ້ຕົ້ນກ້ວຍເຮັດແທນ ເພື່ອຫລຸດຜ່ອນບັນຫາຂີ້ເຫຍື້ອດັ່ງກ່າວ.

ນາງ ສົມສະໜຸກ ປະຊາຊົນ ຢູ່ບ້ານຫ້ອມໃຕ້ ໄດ້ກ່າວວ່າ: ຕົນເອງໄດ້ມາຂາຍເຄື່ອງບູຊາ ຢູ່ວັດແຫ່ງນີ້ ໄດ້ປະມານມາເດືອນກວ່າແລ້ວ ທຳອິດແມ່ນຕົນເອງ ແລະ ລູກໃນຄອບຄົວ ໄດ້ຫຍິບໝາກເບັງ ແລະ ປະດິດເຮືອໄຟເປັນຮູບ ພະຍານາກຈາກໃບຕອງ ແມ່ນໄດ້ຂາຍດີ ຈົນເຮັດບໍ່ທັນ ຈຶ່ງໄດ້ສັ່ງໃຫ້ພີ່ນ້ອງເຮັດຊ່ວຍ ແລະ ນຳມາຂາຍໃຫ້. ນອກຈາກນີ້, ກໍຍັງໄດ້ສັ່ງຊື້ນໍາປະຊາຊົນ ຈາກບ້ານອື່ນເພີ່ມອີກ. ສ່ວນປະເພດ ເຄື່ອງບູຊາ ລາຄາປະມານ 59-69 ພັນກີບ, ມື້ໜຶ່ງສະເລັ່ຍຂາຍໄດ້ບໍ່ຫລຸດ 7-8 ແສນກີບ. ເມື່ອຄົນນິຍົມກັນມາ ວັດຫລາຍຄື ແນວນີ້ ກໍຮູ້ສຶກດີໃຈເພາະວ່າເຮັດ ໃຫ້ຄອບຄົວມີລາຍໄດ້ເພີ່ມ ເພາະເມື່ອກ່ອນມີອາຊີບເຮັດສວນປູກຜັກຂາຍ ແລະ ຕຳຫູກ (ຕ່ຳສິ້ນ).

ນາງ ບົວໄຫລ ອາຍຸ 50 ປີ ປະຊາຊົນບ້ານຖິ່ນເພຍ ໄດ້ໃຫ້ສໍາພາດວ່າ: ເມື່ອກ່ອນຕົນເອງ ກໍເຮັດສວນປູກຜັກຂາຍ ແລະ ເວລາຫວ່າງຈາກ ການເຮັດສວນແລ້ວ ກໍມາຫຍິບໝາກເບັງຂາຍທຸກໆວັນສິນ, ແຕ່ດຽວນີ້ໄດ້ຫຍິບຂາຍທຸກໆມື້ ເພາະມີຄົນເຂົ້າມາກາບໄຫວ້ບູຊາ ເປັນນວນຫລວງຫລາຍ ຕົນເອງກໍຮູ້ສຶກດີໃຈຫລາຍ ແລະ ໄດ້ມາຂາຍຢູ່ນີ້ທຸກມື້ ເພາະວ່າມັນເປັນການສ້າງວຽກເຮັດງານທຳ ແລະ ລາຍຮັບເພີ່ມ ໃຫ້ແກ່ຄອບຄົວ. ເມື່ອກ່ອນຫຍິບແຕ່ໝາກເບັງ, ດຽວນີ້ແມ່ນໄດ້ປະດິດເຮືອໄຟ ທີ່ເປັນຮູບຊົງຄ້າຍຄືພະຍານາກຂາຍນຳ ແລະ ຮ້ານຂອງເຮົາ ກໍມີໝາກເບັງ, ເຮືອໄຟ, ດອກໄມ້ທູບທຽນ, ເຄື່ອງບູຊາຕ່າງໆ. ນອກຈາກນີ້ ຍັງມີ ປາ, ອ່ຽນ ແລະ ເຕົ່າ ເພື່ອໃຫ້ຄົນ ໄດ້ຊື້ໄປປ່ອຍ, ເຊິ່ງແຕ່ລະມື້ຂາຍໄດ້ລວມທັງ ຕົ້ນທຶນ ແລະ ກຳໄລແລ້ວ ປະມານລ້ານກວ່າກີບ ຫັກຈາກຕົ້ນທຶນ, ຄ່າຂີ້ເຫຍື້ອ ແລະ ປະກອບສ່ວນໃຫ້ ວັດແລ້ວກໍໄດ້ປະມານ 4-5 ແສນກີບຕໍ່ມື້, ຖືເປັນການສ້າງລາຍຮັບ ໃຫ້ແກ່ຄອບຄົວ ໄດ້ຫລາຍພໍສົມຄວນ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)