ສູນເລືອດແຫ່ງຊາດ ຮ່ວມກັບ ອົງການກາແດງລາວ, ບໍລິສັດ​ເບຍ​ລາວ ຈຳກັດ ​ຈັດກິດຈະກໍາ ບໍລິຈາກເລືອດຊ່ວຍເຫລືອ ສັງຄົມ​​ແບບເປີດ​ກວ້າງ ຂຶ້ນ​ໃນ​ວັນ​ທີ 18 ກັນຍາ 2020 ​ເຊິ່ງ​ໄດ້​ຮັບ​ຄວາມ​ສົນ​​ໃຈ ຈາກ​ນັກຮຽນຊັ້ນມັດ​ທະ​ຍົມ​ຕອນ​ປາຍ ​ໃນ​ນະຄອນຫລວງ​ວຽງຈັນ ​ແລະ ບຸກຄົນ​ທົ່ວ​ໄປ ​​ເຂົ້າ​ຮ່ວມບໍ ລິຈາກເລືອດ​ເປັນຈຳນວນຫລາຍ ຄາດ​ວ່າຈະ​ໄດ້​ຮັບ​ເລືອດ​ຢ່າງໜ້ອຍ 500 ຖົງ ພາຍຫລັງ​ກວດ​ວິ​ເຄາະ​ເປັນ​ທີ່​ຮຽບຮ້ອຍ ຈະ​ນໍາ​ເລືອດ​ຈຳນວນດັ່ງກ່າວ, ສົ່ງ​ຕໍ່​ໃຫ້​ຄົນ​ເຈັບ ທີ່​ມີ​ຄວາມ​ຈຳ​ເປັນ ​ຕ້ອງການ​ເລືອດ.

ທ່ານ ຈັນທະລາ ສຸກສາຄອນ ຫົວໜ້າສູນເລືອດແຫ່ງຊາດ ກ່າວວ່າ: ປັດຈຸບັນ​ຄວາມ​ຕ້ອງການ​ເລືອດ​ນັບ​ມື້​ນັບ​ເພີ່ມ​ຂຶ້ນ ສະ​ເພາະ​ໃນ​ນະຄອນຫລວງ​ວຽງຈັນ, ​ແມ່ນ​ມີຕ້ອງການ​ເລື​ອດ 150 ຖົງ​ຕໍ່​ມື້ ​​ແຕ່​ການຕອບສະໜອງ​ເລື​ອດ ຍັງ​ບໍ່​ຫລາຍ​​ເທົ່າ​ຄວນ ​​ໃນ​ໄລຍະ 8 ​ເດືອນ ຜ່ານມາຂອງ​ປີ 2020 ທົ່ວ​ປະ​ເທດ​ສາມາດ​ເຈາະ​ເລືອດ​ໄດ້​ພຽງ 37.000 ​ກ່ວາຖົງ ຖ້າ​ທຽບ​ໃສ່​ແຜນການ​ປີ ປະຕິບັດ​ໄດ້​ພຽງ​ແຕ່ 61,24% ຂອງ​ແຜນການ​ປີ​ເທົ່າ​ນັ້ນ. ທັງ​ນີ້, ​ກໍ​ຍ້ອນ​ຜົນ​ກະທົບ​ຈາກ​ ການ​ແຜ່​ລະບາດ​ຂອງພະຍາດ​ ໂຄ​ວິດ-19 ​ແລະ ການລະບາດ​ຂອງ​ພະຍາດ​ໄຂ້ຍຸງ​ລາຍ ​ເຮັດ​ໃຫ້​ບໍ່​ສາມາດ​ປຸກ​ລະດົມ ​ແລະ ຮັບ​ບໍລິຈາກ​ເລືອດ​ໄດ້​ຕາມ​ແຜນ​ທີ່​ວາງ​ໄວ ​​ແນວ​ໃດ​ກໍ​ຕາມ ສູນ​ເລືອດ​​ແຫ່ງ​ຊາດ ຈະ​ສືບ​ຕໍ່​ຮ່ວມ​ກັບຫລາຍ​ພາກ​ສ່ວນ ຈັດ​ກິດຈະກຳ​ບໍລິຈາກ​ເລືອດ ​ໃນຂອບ​ເຂດ​ທົ່ວ​ປະ​ເທດ ​ເພື່ອ​​ບຸກບືນໃຫ້​ບັນລຸ​ຕາມ​ແຜນ​ທີ່​ວາງ​ໄວ້ ​ໃຫ້​ໄດ້​ເລືອດ 60.700 ຖົງ​ໃນ​ປີ 2020.

​ໃນ​ໂອກາດ​ນີ້, ທ່ານ ຄຳ​ຮຸ່ງ ​ເຮືອງ​ວົງ​ສີ ປະທານ​ອົງການ​ກາ​ແດງ​ລາວ ຍັງ​ໄດ້​ຝາກ​ເຖິງຜູ້​ທີ່​​ມີ​ເງື່ອນ​ໄຂອາຍຸ 17 ປີ​ຂຶ້ນໄປ, ນໍ້າໜັກ 45 ​ກິ​ໂລຂຶ້ນ​ໄປ ​ແລະ ມີ​ສຸ​ຂະພາບ​ແຂງ​ແຮງ ຈົ່ງປະກອບສ່ວນ ບໍລິຈາກ​ເລືອດ ຊ່ວຍ​ເຫລືອ​ສັງຄົມດ້ວຍ​ຄວາມ​ສະໜັກ​ໃຈ ເພື່ອ​ໃຊ້​ເຂົ້າ​ໃນ​ການ​ຮັກສາ​ຄົນ​ເຈັບ​ ​ແລະ ຜູ້​ຕ້ອງ ການ​​ເລືອດ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)