ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ໄດ້ສົ່ງສານເພື່ອສະແດງຄວາມຊົມເຊີຍ ເນື່ອງໃນໂອກາດສະເຫລີມສະຫລອງ ວັນຄົບຮອບການສ້າງຕັ້ງ ອົງການສະຫະປະຊາຊາດ(ສປຊ) ຄົບຮອບ 75 ປີ ຜ່ານການບັນທຶກວິດີໂອ, ​ເຊິ່ງພິທີດັ່ງກ່າວໄດ້ຈັດຂຶ້ນໃນວັນທີ 21 ກັນຍາ 2020, ທີ່ອົງການ ສປຊ ທີ່ ນິວຢອກ ສ.ອາເມລິກາ.

 ໂດຍມີເນື້ອໃນລະບຸວ່າ: “ຂ້າພະເຈົ້າໃນນາມຕາງໜ້າລັດຖະບານ ແລະ ປະຊາຊົນລາວບັນດາເຜົ່າຂໍສະແດງ ຄວາມຊົມເຊີຍອັນອົບອຸ່ນ ມາຍັງອົງການ ສປຊ ເນື່ອງໃນໂອກາດສະເຫລີ​ມ ສະຫລອງວັນສ້າງ ຕັ້ງອົງການ ສປຊ ຄົບຮອບ 75 ປີ ທີ່ມີຄວາມໝາຍສໍາຄັນໃນມື້ນີ້. ອົງການ ສປຊ ໄດ້ຮັບການສ້າງຕັ້ງຂຶ້ນ ບົນພື້ນຖານ ຄວາມມຸ່ງມາດປາຖະໜາ ຂອງມວນມະນຸດ ທີ່ຢາກຢູ່ຮ່ວມກັນຢ່າງສັນຕິ, ມີການຮ່ວມມືກັນ ແລະ ຊ່ວຍເຫລືອ​ເຊິ່ງກັນ ແລະ ກັນ ເພື່ອພ້ອມກັນເຮັດໃຫ້ໂລກນີ້ ມີ ສັນຕິພາບ, ສະຖຽນລະພາບ ແລະ ຄວາມຈະເລີນຮຸ່ງເຮືອງສີວິໄລ.

ຕະຫລອດໄລຍະ 75 ປີ ຜ່ານມາ, ພວກເຮົາໄດ້ເຫັນຜົນງານ ແລະ ຜົນສຳເລັດທີ່ສຳຄັນ ຫລາຍດ້ານຂອງອົງການ ສປຊ. ຫລາຍປະເທດໄດ້ຮັບຄວາມເປັນ ເອກະລາດແຫ່ງຊາດ ແລະ ເປັນເຈົ້າຕົນເອງ ໃນການຕັດສິນຊາຕາກຳຂອງຊາດຕົນ; ການເຈລະຈາ ແລະ ປຶກສາຫາລືບັນຫາໂດຍສັນຕິວິທີ ໄດ້ກາຍເປັນຫລັກການ ແລະ ແນວໂນ້ມ ໃນການແກ້ໄຂຂໍ້ຂັດແຍ້ງຕ່າງໆ; ການຮ່ວມມືເພື່ອການພັດທະນາ ໄດ້ຮັບການເຊີດຊູ ອັນໄດ້ເຮັດໃຫ້ຫລາຍລ້ານຄົນໃນທົ່ວໂລກ ໄດ້ຫລຸດພົ້ນອອກຈາກຄວາມທຸກຍາກ; ບັນຫາການຈໍາແນກເຊື້ອຊາດ-ຜິວພັນ, ຄວາມບໍ່ສະເໝີພາບຍິງ-ຊາຍ ໄດ້ຮັບການແກ້ໄຂເປັນກ້າວໆມາ ອັນເປັນການປະກອບສ່ວນທີ່ສຳຄັນ ໃນການປົກປັກຮັກສາສັນຕິພາບ ແລະ ຄວາມໝັ້ນຄົງສາກົນ ແລະ ການພັດທະນາ ໄດ້ເຕີບໃຫຍ່ຂະຫຍາຍຕົວ.

ເຖິງວ່າສະພາບແວດລ້ອມໃນ 7 ທົດສະຫວັດກວ່າຜ່ານມາ ຈະແຕກຕ່າງຈາກສະພາບ ໃນປັດຈຸບັນ, ແຕ່ຂ້າພະເຈົ້າເຫັນວ່າ ຈຸດປະສົງເປົ້າໝາຍ ແລະ ຫລັກການ ທີ່ໄດ້ກໍານົດໄວ້ໃນກົດບັດ ສປຊ ແມ່ນຍັງມີຄຸນຄ່າສູງ ແລະ ແທດເໝາະກັບສະພາບປັດຈຸບັນ. ສະນັ້ນ, ມັນຮຽກຮ້ອງໃຫ້ບັນດາປະເທດສະມາຊິກ ຈົ່ງພ້ອມໃຈກັນ ສືບຕໍ່ສົ່ງເສີມຈຸດປະສົງ ເປົ້າໝາຍຂອງອົງການ ສປຊ ແລະ ຊ່ວຍກັນປັບປຸງກົນໄກການປະຕິບັດໜ້າທີ່ຂອງອົງການ ສປຊ ໃຫ້ແທດເໝາະກັບສະພາບ ແວດລ້ອມໃນປັດຈຸບັນ ແນໃສ່ຮັບປະກັນການປະຕິບັດພາລະບົດບາດ ແລະ ໜ້າທີ່ຂອງຕົນ ໃຫ້ໄດ້ຮັບສຳເລັດຜົນ ຢ່າງມີປະສິດທິພາບສູງ ແລະ ສືບຕໍ່ແກ້ໄຂສິ່ງທ້າທາຍຕ່າງໆ ຂອງວົງຄະນາຍາດສາກົນ.

ສປປ ລາວ ພວກຂ້າພະເຈົ້າ ພ້ອມແລ້ວ ທີ່ຈະຮ່ວມກັບບັນດາ ປະເທດສະມາຊິກ ປະກອບສ່ວນຢ່າງຕັ້ງໜ້າ ເພື່ອເຮັດໃຫ້ອົງການ ສປຊ ມີຄວາມເຂັ້ມແຂງ, ສາມາດປະຕິບັດໜ້າທີ່ຂອງຕົນ ໃຫ້ມີປະ ສິດທິພາບສູງ ແນໃສ່ເຮັດໃຫ້ ສັນຕິພາບມີຄວາມຍືນຍົງ, ເສດຖະກິດ-ສັງຄົມ ຂອງບັນດາປະຊາຊາດ ໄດ້ຮັບການພັດທະນາ ແລະ ສີວິໄລຮຸ່ງເຮືອງ.”

ອົງການສປຊ ໄດ້ສ້າງຕັ້ງຂຶ້ນ ໃນວັນທີ 24 ຕຸລາ 1945 ຈຸດປະສົງ ແມ່ນເພື່ອປົກປັກຮັກສາສັນຕິພາບ ແລະ ຄວາມໝັ້ນຄົງຂອງໂລກ, ພັດທະນາສາຍພົວພັນມິດຕະພາບ ບົນພື້ນຖານຫລັກການ ເຄົາລົບອະທິປະໄຕ​ເຊິ່ງກັນ ແລະ ກັນ, ສິດສະເໝີພາບ ແລະ ການຮ່ວມມືສາກົນ ໃນການແກ້ໄຂບັນຫາຕ່າງໆ ຂອງສາກົນໃນດ້ານເສດຖະກິດ, ສັງຄົມ ແລະ ວັດທະນະທຳ. ປັດຈຸບັນອົງການ ສປຊ ມີສະມາຊິກທັງໝົດ 193 ປະເທດ ແລະ 2 ລັດສັງເກດການ (ລັດວາຕີກັງ ແລະ ລັດປາເລສຕີນ), ມີສຳນັກງານໃຫຍ່ຕັ້ງຢູ່ນິວຢອກ. ອາເມລິກາ ແລະ ມີພາສາທີ່ໃຊ້ເປັນທາງການ 6 ພາສາ ຄື: ອັງກິດ, ຝລັ່ງ, ຈີນ, ລັດເຊຍ, ອາຣັບ ແລະ ແອດສະປາຍໂຍນ. ສຳລັບ ສປປ ລາວ ໄດ້ເຂົ້າເປັນສະມາຊິກອົງການ ດັ່ງກ່າວໃນວັນທີ 14 ທັນວາ 1955.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)