ສະພາບນ້ຳຖ້ວມຢູ່ບັນດາພາກກາງ ແລະ ພາກໃຕ້ ຂອງ ສປປ ລາວ ປີນີ້, ຖືວ່າໜັກໜ່ວງ ກວ່າປີຜ່ານມາ ເນື່ອງຈາກໄດ້ຮັບອິດທິພົນຈາກພະຍຸເຂດຮ້ອນທີ່ພັດຜ່ານ 2 ຮອບໃນໄລຍະ ບໍ່ເຖິງອາທິດ ສົ່ງຜົນໃຫ້ປະລິມານນ້ຳໃນບັນດາແມ່ນ້ຳສາຂາ ແລະ ແມ່ນ້ຳຂອງເພິ່ມຂື້ນຢ່າງ ໄວວາ ໄຫຼເຂົ້າຖ້ວມບ້ານເຮືອນ, ໄຮ່ນາຮົ້ວສາວ ແລະ ສຳນັກງານອົງການຕ່າງໆໄດ້ຮັບຄວາມ ເສຍຫາຍຢ່າງໜັກໜ່ວງ.

ອີງຕາມການລາຍງານຂ່າວຈາກກົມສັງຄົມສົງເຄາະ ກະຊວງແຮງງານ ແລະ ສະຫວັດດີການ ສັງຄົມ ໃນວັນທີ 5 ກັນຍາ 2019 ໃຫ້ຮູ້ວ່າ: ນ້ຳຖ້ວມໜັກຢູ່ 6 ແຂວງ ພາກກາງ ຫາ ພາກໃຕ້ ນັ້ນ ໄດ້ເຮັດໃຫ້ມີການເສຍຊີວິດ 2 ຄົນ (ແຂວງສະຫວັວນະເຂດ ແລະ ຈຳປາສັກ), ສູນເສຍ ອີກ 2 ຄົນ (ແຂວງຈຳປາສັກ) ແລະ 54,207 ຄອບຄົວ ໄດ້ຮັບຜົນກະທົບໜັກຈາກເຫດການ ດັ່ງກ່າວ.

ຂ່າວຍັງລາຍງານໃຫ້ຮູ້ອີກວ່າ: ອິດທິພົນຂອງລົມພະຍຸໂພດູ ແລະ ລົມພະຍຸດີເປຼຊັນ ທີ່ພັດ ຜ່ານເຂົ້າມາ ສປປ ລາວ ໃນຊ່ວງດ້າຍເດືອນສິງຫາ ຫາ ຕົ້ນເດືອນກັນຍາ 2019 ເຮັດໃຫ້ມີ ຝົນຕົກໜັກ ແລະ ເກີດນ້ຳຖ້ວມຢູ່ ແຂວງຄຳມ່ວນ, ສະຫວັນນະເຂດ, ຈຳປາສັກ, ສາລະວັນ, ເຊກອງ ແລະ ອັດຕະປື ເຊິ່ງສົ່ງຜົນກະທົບໂດຍກົງຕໍ່ປະຊາຊົນໃນ 37 ເມືອງ, 788 ບ້ານ. ປະຈຸ ບັນຄວາມຕ້ອງການອັນຮີບດ່ວນແມ່ນ ເຄື່ອງອຸປະໂພກ-ບໍລິໂພກ ເປັນຕົ້ນແມ່ນ: ອາຫານ ນ້ຳດື່ມ, ເຄື່ອງໃຊ້ໃນຄົວເຮືອນ, ເຄື່ອງນອນ, ເຮືອພ້ອມຄົນຂັບ ແລະ ງົບປະມານຮັບໃຊ້ອື່ນໆ