ຮຽກຮ້ອງ! ຄວາມສັດທາ ຕ້ອງມີຄວາມຮັບຜິດຊອບ ສິ່ງແວດລ້ອມ ແລະ ຕໍ່ສັງຄົມ

0
63

ຫລາຍທ່ານອາດຈະສັງເກດເຫັນ ໄດ້ຈາກສື່ສັງຄົມອອນລາຍ ທີ່ໄດ້ນຳເອົາຮູບພາບສິ່ງເສດເຫລືອ ແລະ ສິ່ງຂອງຕ່າງໆ ທີ່ຄົນເອົາມາເຮັດບຸນ ຢູ່ສະຖານທີ່ຕ່າງໆ ໂດຍສະເພາະກໍແມ່ນ ວັດ ລົງເຜີຍແຜ່, ບັນຫານີ້ໄດ້ສະທ້ອນໃຫ້ເຫັນວ່າ ການເຮັດບຸນສິນກິນທານ ແລະ ຄວາມເຫລື້ອມໃສສັດ ທາ ໃນຄວາມເຊື່ອຕ່າງໆຂອງຄົນເຮົາ ຖ້າມີຄວາມສັດທາແລ້ວ ຕ້ອງມີຄວາມ ຮັບຜິດຊອບຕໍ່ສັງຄົມ ແລະ ສິ່ງແວດລ້ອມນຳ. ດັ່ງເປັນທີ່ຮູ້ນຳກັນແລ້ວວ່າ ຄົນລາວຊາວພຸດທັງຫລາຍ ເມື່ອເຂົ້າວັດກໍຕ້ອງໄດ້ເຂົ້າໄປ ກາບໄຫວ້ສັກກະລະບູຊາ ພະສົງອົງພະເຈົ້າ ແລະ ສິ່ງສັກສິດຕ່າງໆ ຢູ່ໃນວັດວາອາຮາມຕາມຄວາມເຊື່ອສັດທາ, ສິ່ງທີ່ຂາດບໍ່ໄດ້ທີ່ພໍ່ແມ່ ປະຊາຊົນຖືມານັ້ນກໍຄື ດອກໄມ້ທູບທຽນ ແລະ ເຄື່ອງບູຊາຕ່າງໆ.

ທ່ານ ບຸນ ແສງດາລາ ເລຂາພັກບ້ານ, ນາຍບ້ານຫ້ອມໃຕ້ ໄດ້ໃຫ້ສຳພາດຕໍ່ນັກຂ່າວ ສຳນັກຂ່າວສານປະເທດລາວ ເມື່ອທ້າຍອາທິດຜ່ານມານີ້ວ່າ: ປັດຈຸບັນນີ້ ເຫັນວ່າມີພໍ່ແມ່ປະຊາຊົນ ໄດ້ຫລັງໄຫລກັນເຂົ້າມາທ່ຽວຊົມ ແລະ ສັກກະລະບູຊາ ວັດທົ່ງທາດແຫ່ງນີ້ຫລາຍຂຶ້ນ ລວມທັງຜູ້ຂາຍເຄື່ອງ ແລະ ຜູ້ມາທ່ຽວຊົມ, ເຊິ່ງສະຖານທີ່ຂອງວັດ ຕັ້ງຕິດກັບແຄມແມ່ນ້ຳຂອງ ຢູ່ເຂດບ້ານຫ້ອມໃຕ້, ເມືອງຫາດຊາຍຟອງ ນະຄອນຫລວງວຽງຈັນ ແລະ ສິ່ງທີ່ພໍ່ແມ່ປະຊາຊົນ ຖືຕິດໄມ້ຕິດມືມາ ປາສະຈາກບໍ່ໄດ້ກໍຄື ດອກໄມ້ທູບທຽນ, ກ້ວຍ, ໝາກພ້າວ.

ນອກນີ້, ຍັງມີໝາກເບັງ, ເຮືອໄຟ ແລະ ເຄື່ອງບູຊານ້ອຍໃຫຍ່ຕ່າງໆ ແລ້ວແຕ່ຜູ້ມີສັດທາ, ຫລັງຈາກທີ່ກາບໄຫວ້ບູຊາແລ້ວ ສິ່ງທີ່ເຫລືອໄວ້ໃຫ້ເຫັນ ກໍແມ່ນບັນ ດາເຄື່ອງບູຊາຕ່າງໆນັ້ນ, ເຊິ່ງມັນໄດ້ກາຍ ເປັນຂີ້ເຫຍື້ອ ແລະ ໄດ້ທຳລາຍສິ່ງແວດລ້ອມ ອັນບໍລິສຸດໄປໃນຕົວ, ເຊິ່ງສິ່ງຂອງເຫລົ່ານີ້ ແມ່ນພໍ່ແມ່ປະຊາຊົນເຮົາເປັນຜູ້ປະດິດຂຶ້ນມາ ແຕ່ເນື່ອງຈາກວ່າວັດສະດຸທີ່ນຳມາປະດິດນັ້ນ ບາງອັນກໍເຮັດ ຈາກທຳມະຊາດ (ໃບຕອງກ້ວຍ) ແລະ ບາງອັນ ກໍມີສ່ວນປະກອບຂອງພະລາສະຕິກ ທີ່ຈະຍ່ອຍສະຫລາຍໄດ້ຍາກ ໂດຍສະເພາະແມ່ນກ່ອງໂຟມ ທີ່ເອົາປະດິດ ແລະ ປະກອບໃນເຮືອໄຟ.

ທ່ານ ບຸນ ແສງດາລາ ກ່າວຕື່ມວ່າ: ປັດຈຸບັນນີ້, ພວກເຮົາກໍໄດ້ກຳກັບ ບໍ່ໃຫ້ມີການໄຫລເຮືອ ໄຟອີກ ເພາະມັນໄດ້ສ້າງຄວາມ ບໍ່ຈົບບໍ່ງາມຕໍ່ແມ່ນ້ຳຂອງ ໂດຍສະເພາະແມ່ນ ເຮືອໄຟທີ່ປະດິດ ມາຈາກກ່ອງໂຟມ, ເຊິ່ງມັນບໍ່ສາມາດ ຍ່ອຍສະຫລາຍໄດ້ງ່າຍ ແລະ ໄດ້ແຕ່ງໜ່ວຍງານຮັບຜິດຊອບ ລົງເກັບມ້ຽນເປັນທີ່ຮຽບຮ້ອຍແລ້ວ ແລະ ຂໍຮຽກຮ້ອງ ມາຍັງບັນດາພໍ່ແມ່ ປະຊາຊົນທັງຫລາຍ ທີ່ເຂົ້າມາທຳບຸນ ກາບໄຫວ້ບູຊາຕ່າງໆທີ່ວັດແຫ່ງນີ້ ຈົ່ງພ້ອມໃຈກັນຮັກສາຄວາມ ສະອາດຊ່ວຍກັນ ພ້ອມກັນນີ້, ຜູ້ປະດິດ ແລະ ຜູ້ຂາຍເຄື່ອງສິ່ງຂອງບູຊາຕ່າງໆ ກໍຕ້ອງຮ່ວມແຮງຮ່ວມໃຈກັນ ຈົ່ງຫັນມານຳໃຊ້ວັດຖຸດິບ ທີ່ເປັນທຳມະຊາດ ທີ່ເປັນມິດຕໍ່ສິ່ງແວດລ້ອມ ແລະ ບໍ່ໃຊ້ພະລາສະຕິກ, ໂຟມ, ຢາງເຮັດເຮືອໄຟ ໃຫ້ຫັນມາໃຊ້ຕົ້ນກ້ວຍເຮັດແທນ ເພື່ອຫລຸດຜ່ອນ ບັນຫາຂີ້ເຫຍື້ອດັ່ງກ່າວ.

ນອກຈາກນີ້, ຍັງເປັນໄລຍະທີ່ພະຍາດ ໂຄວິດ-19 ລະບາດຢູ່ໃນທົ່ວໂລກ ສປປ ລາວ ເຮົາກໍໄດ້ຮັບຜົນກະທົບເຊັ່ນດຽວກັນ, ແຕ່ເຖິງຢ່າງໃດກໍຕາມ ບ້ານຫ້ອມໃຕ້ ກໍຄື ວັດທົ່ງທາດ ຂອງພວກເຮົາ ກໍໄດ້ປະສານງານກັບ ພະແນກສາທາລະນະສຸກເມືອງ ໃຫ້ເພິ່ນມາວັດແທກອຸນຫະພູມ ພ້ອມນຳເອົາຜ້າອັດດັງ-ປາກ ມາຈຳໜ່າຍໃຫ້ແກ່ ພໍ່ແມ່ປະຊາຊົນ ແລະ ແຂກຄົນທີ່ເຂົ້າ ມາທ່ຽວຊົມ ເພື່ອປ້ອງກັນການ ຕິດເຊື້ອດັ່ງກ່າວ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)