ໃນວັນທີ 22 ກັນຍາ 2020 ທີ່ຫ້ອງວ່າການແຂວງຈຳປາສັກ, ກຸ່ມນັກລົງທຶນ ສ.ເກົາຫລີ ມີ ທ່ານ ໂຈນາທານ ຄິມ (Mr Jonathan KIM) ທີ່ປຶກສາ ບໍລິສັດ ຊໍາອານ (SAM-AN Corpo ration), ທ່ານ ຮົງ ຊອງໂຮ (Mr HONG Jung-O) ຜູ້ປະສານງານ ອົງການ ເຊມາອຶນ ອຸນດົງ ແຫ່ງ ສ.ເກົາຫລີ (Saemaul Undong of Korea) ປະຈຳ ສປປ ລາວ ແລະ ທ່ານ ຊິມ ຊົງກູ (Mr SHIM Sung-Ku) ປະທານບໍລິສັດ ລາວ ຟາມຮາວສ (Lao Farm House Co., Ltd), ໂດຍມີ ທ່ານ  ວິໄລສຸກ ພິມມະສອນ ສະມາຊິກສະພາແຫ່ງຊາດເຂດ 9 ເປັນທີ່ປຶກສາ ໄດ້ນຳເອົາຊຸດອຸປະກອນ ເຄື່ອງຄອມ ພິວເຕີ PC ຈຳນວນ 20 ເຄື່ອງ, ຄອມພິວເຕີ ໂນດບຸກ 5 ເຄື່ອງ ແລະ ເຄື່ອງພິມ ຈຳນວນ 22 ເຄື່ອງ ມາມອບໃຫ້ແຂວງຈຳປາສັກ ເພື່ອປະກອບສ່ວນເຂົ້າໃນການຊຸກຍູ້ ແລະ ພັດທະນາ ວຽກງານຂອງແຂວງຈຳປາສັກ ແລະ ຖືໂອກາດ ເຂົ້າພົບປະເຮັດວຽກ ຮ່ວມກັບຄະນະນຳແຂວງຈຳປາສັກ.

ໃນໂອກາດກ່າວຮັບ ຊຸດອຸປະກອນເຄື່ອງຄອມພິວເຕີດັ່ງກ່າວ, ທ່ານ ວິໄລວົງ ບຸດດາຄຳ ເຈົ້າ ແຂວງຈຳປາສັກ ພ້ອມຄະນະ ໄດ້ກ່າວຂອບໃຈ ຕໍ່ກຸ່ມນັກລົງທຶນ ສ.ເກົາຫລີ ທີ່ໄດ້ປະກອບສ່ວນເຂົ້າ ໃນການຊຸກຍູ້ ພັດທະນາວຽກງານ ຂອງແຂວງຈຳປາສັກ ແລະ ທ່ານ ໄດ້ຕີລາຄາສູງ ຕໍ່ການມາເຮັດວຽກຂອງສອງຝ່າຍ ລະຫວ່າງຄະນະຂອງຊ່ຽວຊານ ນັກລົງທຶນ ສ.ເກົາຫລີ ກັບ ຄະນະນຳ, ພະແນກການກ່ຽວຂ້ອງ ແຂວງຈຳປາສັກ ແລະ ສອງຝ່າຍມີຄວາມເປັນເອກະພາບສູງ ພ້ອມກັນສືບຕໍ່ຊຸກຍູ້ແກ້ໄຂຄວາມທຸກຍາກ ແລະ ພັດທະນາຊົນນະບົດ ໂດຍສະເພາະ ບ້ານທີ່ມີຄວາມຈຳເປັນ, ຮ່ວມມືຊ່ວຍເຫລືອໃນວຽກງານກະສິກຳ ສົ່ງເສີມກະສິກຳສະອາດ ຕິດພັນກັບການທ່ອງທ່ຽວ ອະນຸລັກທຳມະຊາດ ແນ່ໃສ່ສົ່ງເສີມການທ່ອງທ່ຽວ ລາວ-ສ.ເກົາຫລີ, ພັດທະນາເມືອງມະຫາວິທະຍາໄລ ແລະ ສຶກສາເຂດອຸດສະຫະກຳ ໄປຄວບຄູ່ກັນນັ້ນ ແມ່ນຈະໄດ້ມີການຮ່ວມມືກັນໃນຕໍ່ໜ້າ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)