ກອງປະຊຸມໃຫຍ່ຄັ້ງທີ VII ອົງຄະນະພັກແຂວງບໍລິຄຳໄຊ ໄດ້ໄຂຂຶ້ນໃນວັນທີ 24 ກັນຍາ 2020 ໂດຍການເປັນປະທານຂອງ ສະຫາຍ ກອງແກ້ວ ໄຊສົງຄາມ ກຳມະການສູນກາງພັກ ເລຂາຄະ ນະບໍລິຫານງານພັກແຂວງ, ມີຜູ້ແທນສົມບູນ 237 ສະຫາຍ, ຍິງ 26 ສະຫາຍ ເປັນຕົວແທນໃຫ້ ແກ່ສະມະຊິກພັກ ທົ່ວແຂວງ 13.467 ສະຫາຍ, ຍິງ 3.295 ສະຫາຍ ແລະ ແຂກຖືກເຊີນຈາກສູນກາງ ແລະ ທ້ອງຖີ່ນເຂົ້າຮ່ວມ. ກອງປະຊຸມໄດ້ເປັນກຽດຕ້ອນຮັບ ສະຫາຍ ບຸນທອງ ຈິດມະນີ ກໍາມະການກົມການ ເມືອງສູນກາງພັກ, ຄະນະເລຂາທິການສູນກາງພັກ, ປະທານກວດກາສູນກາງພັກ.

ກອງປະຊຸມ ສະຫາຍ ກອງແກ້ວ ໄຊສົງຄາມ ໄດ້ເປັນກຽດຂຶ້ນຜ່ານ ບົດລາຍງານການເມືອງ ທັງສອງພາກ, ເຊິ່ງສະຫາຍ ໄດ້ຍົກໃຫ້ເຫັນຜົນງານ ການນຳພາ-ຊີ້ນຳ ຂອງອົງຄະນະພັກ ແຂວງບໍລິຄຳໄຊ ຕະຫລອດໄລຍະ 5 ປີຜ່ານມາ ເຖິງວ່າແຂວງບໍລິຄຳໄຊ ໄດ້ຮັບຜົນກະທົບຈາກ ໄພພິບັດທໍາມະຊາດຮ້າຍແຮງ ປີ 2017-2019 ການແຜ່ລະບາດຂອງພະຍາດ ສັດອະຫິວາໝູອາຟິກກາ ແລະ ຜົນກະທົບຕໍ່ເສດຖະກິດ ຂອງການລະບາດໂຄວິດ 19, ບັນຫາປະກົດການຫຍໍ້ທໍ້ ໃນສັງຄົມຕ່າງໆ ໄດ້ສົ່ງຜົນກະທົບ ຕໍ່ການພັດທະນາ ເສດຖະກິດຂອງ ແຂວງບໍລິຄໍາໄຊ ແຕ່ພາຍໃຕ້ການນໍາພາ-ຊີ້ນຳ ຂອງຄະນະບໍລິຫານງານພັກແຂວງ ໃນການຈັດຕັ້ງ ຜັນຂະຫຍາຍ ມະຕິກອງປະຊຸມໃຫຍ່ ອົງຄະນະພັກແຂວງ ຊຸດທີ VI ແລະ ແຜນພັດທະນາ ເສດຖະກິດ-ສັງຄົມ 5 ປີ ຄັ້ງທີ IV 2016-2020 ແຂວງບໍລິຄຳໄຊ ໄດ້ສຸມໃສ່ການແກ້ໄຂບັນຫາ 4 ເຖື່ອນ ແລະ 9 ຫົວຂໍ້ວິທະຍາສາດ ເຂົ້າສູ່ວຽກງານຕົວຈິງ ຢູ່ແຕ່ລະຂະແໜງການ ແລະ ໄດ້ເຮັດໃຫ້ແຂວງ ມີຄວາມສະຫງົບ ໂດຍພື້ນຖານ ແລະ ໜັກແໜ້ນ, ເສດຖະກິດມີການ ຂະຫຍາຍຕົວຢ່າງຕໍ່ເນື່ອງ ໃນອັດຕາ​ສະ​ເລ່ຍ 6,5% ຕໍ່ປີ ລວມຍອດຜະລິດຕະພັນ ພາຍໃນບັນລຸ 5.878 ຕື້ກີບ, ສະເລ່ຍໃສ່ພົນລະເມືອງໄດ້ 18.336.343 ກີບ ເທົ່າກັບ 2.060 ໂດລາສະຫະລັດ, ໂຄງປະກອບເສດຖະກິດ: ຂະແໜງກະສິກໍາ ກວມ 26%, ອຸດສາຫະກໍາ 48,9% ແລະ ການບໍລິການ 25,1%, ການລົງທຶນບັນລຸ 7.914 ຕື້ກີບ ກວມ 29,8% ຂອງລວມຍອດຜະລິດຕະພັນພາຍໃນ 5 ປີ ການຈັດເກັບລາຍຮັບເຂົ້າງົບປະມານ ໄດ້ຕາມແຜນທີ່ວາງໄວ້, ການຜະລິດສະບຽງອາຫານ ເຮັດໃຫ້ແຂວງສາມາດ ກຸ້ມຕົນເອງດ້ານສະບຽງອາຫານໄດ້ໂດຍພື້ນຖານ, ຫລຸດຜ່ອນການນໍາເຂົ້າ ແລະ ມີຜົນຜະລິດສົ່ງອອກ, ຊຸກຍູ້ສົ່ງເສີມການປູກພືດເປັນສິນຄ້າ ໄດ້ຂະຫຍາຍຕົວຢ່າງກວ້າງຂວາງ ສິ່ງທີ່ພົ້ນເດັ່ນ ແມ່ນກຸ່ມປູກຜັກອິນຊີ ບ້ານຫົວນາເມືອງບໍລິຄັນ,  ກໍາຈັດການຖາງປ່າເຮັດໄຮ່ ແບບເລື່ອນລອຍຢ່າງເຂັ້ມງວດ, ສ້າງໃຫ້ທຸກຄົນມີສ່ວນຮ່ວມໃນການປົກປັກຮັກສາ, ຄຸ້ມຄອງແຫລ່ງນ້ຳ, ຟື້ນຟູ ແລະ ພັດທະນາປ່າໄມ້ ໃຫ້ມີຄວາມສົມດຸນ, ທົ່ວແຂວງມີເນື້ອທີ່ປົກຫຸ້ມ ຂອງປ່າໄມ້ກວມ 70,41%, ສົ່ງເສີມການປູກ-ການລ້ຽງ ແລະ ການປະມົງແບບທໍາມະຊາດ ຫັນໄປສູ່ການນໍາໃຊ້ ເຕັກນິກວິທະຍາສາດ ແລະ ຫັນເປັນກຸ່ມ, ເປັນຟາມ ສາມາດສະໜອງຊີ້ນ, ປາ ແລະ ໄຂ່ ເພື່ອບໍລິໂພກໄດ້ເປັນຢ່າງດີ ສະເລ່ຍ 52,4 ກິໂລ ຕໍ່ຄົນຕໍ່ປີ, ໂຮ​ງງານອຸດສາຫະກຳ, ຫັດຖະກຳ​ປຸງ​ແຕ່ງ​ເພີ່ມຂຶ້ນ 15,4% ທຽບໃສ່ປີ 2015, ທົ່ວແຂວງໄດ້ມີລະບົບໄຟຟ້າ, ການຄົມມະນາຄົມ ແລະ ການບໍ ລິການໂທລະຄົມ ໄດ້ເຂົ້າເຖິງປະຊາຊົນ ຢູ່ຂັ້ນຮາກຖານຢ່າງທົ່ວເຖີງ, ການຈັດເກັບລາຍຮັບເຂົ້າງົບປະມານ ພູດສູນກາງປະຕິບັດໄດ້ 2.650 ຕື້ກີບ, ເທົ່າ​ກັບ 103,43%, ພູດຂອງແຂວງ ປະຕິບັດໄດ້ 956 ຕື້ກີບ, ເທົ່າກັບ 94,19% ຂອງແຜນການ.

ຄຽງຄູ່ກັບການພັດທະນາດ້ານອື່ນໆ ກອງທຶນໜຶ່ງດວງໃຈບໍລິຄໍາໄຊ ຊ່ວຍເຫລືອສັງຄົມ ໄດ້ເຄື່ອນໄຫວສ້າງກິດຈະກໍາຫາລາຍໄດ້ ແລະ ລະດົມທຶນ ຈາກທຸກພາກສ່ວນໃນສັງຄົມ ມາຮອດປັດຈຸບັນມີເງິນກອງທຶນ 8 ຕື້ກວ່າກີບ ແລະ ປະກອບສ່ວນຊ່ວຍເຫລືອສັງຄົມ ເຊັ່ນ: ກໍ່ສ້າງ ແລະ ສ້ອມແປງໂຮງ ຮຽນຈໍານວນ 50 ຫລັງ ມູນຄ່າ 5 ຕື້ກວ່າກີບ, ມອບລົດຮັບສົ່ງຄົນເຈັບ 2 ຄັນ, ວັດຖຸອຸປະກອນການແພດ ໃຫ້ໂຮງໝໍແຂວງ, ຊ່ວຍຕ້ານໄພນໍ້າຖ້ວມ 2 ແຂວງພາກໃຕ້ 90 ລ້ານກວ່າກີບ, ບັນເທົາທຸກໃຫ້ແກ່ຄອບຄົວອານາຖາ ແລະ ຖືກເຄາະຮ້າຍ ຈາກໄພພິບັດຕ່າງໆເປັນມູນຄ່າ 1,3 ຕື້ກວ່າກີບ, ປະກອບລົດດັບເພີງ 2 ຄັນ ໃຫ້ແກ່ກອງບັນຊາການ ປກສ ແຂວງ, ປະກອບສ່ວນຊ່ວຍສັງຄົມ ແລະ ວຽກອື່ນໆ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາ)